Kờp tus jơh nhai 4 nam do, Dăk Lăk neh ai priă bơcri dà lơgar geh rlau 1 rbô tơmàn đông, geh 25% broă rơndap lơh, jơnhua rlau 12% pơn drờm dùl tŭ bal mờ nam lài. Gơ wèt mờ ală rơndap broă lơh kuơmàng, bè: rơndap broă lơh gùng rơndeh ntoat mhar Khánh Hòa – Buôn Ma Thuột neh ai geh rlau 27% priă bơcri nam 2024. 

Rơndap broă lơh gùng Hồ Chí Minh gơl gùng pleh tiah đah mat tơngai lik ƀòn dờng Buôn Ma Thuột neh ai geh rlau 1 rbô 50 tơmàn đông tàm 1 rbô 500 tơmàn đông priă bơcri geh ai tus tŭ do, geh rlau 70% broă rơndap lơh. Bulah bè hơ̆, jat ồng Phạm Ngọc Nghị, Củ tịc Ủy ƀan Ñân zân càr Dăk Lăk pà git, bulah ai priă bơcri dà lơgar càr dê tàm ală nhai bồ nam geh uă tam gơl niam mơya ờ hềt lơh geh jat bè bơta kơp kờñ. Ală sở, gah broă lơh, ală tiah pal sền gròi rlau tai tus tơngume do.