Mờ bơhiàn rài lài do jăk chài, khin cha, pràn kơl dang tàm tam lơh kăc màng, nam 2019, xã Quảng trực neh geh Thủ tướng Cíñ phủ dờp là xã Tiah lơngăp lơngai mờ dờp sră săp sèng tiah lời wơl kấp càr.

Ală ngai nhai 4, jăt gah gùng tàm tiah tờm xã Quảng trực, kơnhoàl Tuy Đức, càr Dăk Nông geh àng gơcrà bồng bi pơrhê, sơrmañ rơmit. Tàm nùs nhơm bơh ală rơnàng lài do, ală kwang bàng kăc màng rài lài do, nùs nhơm bè ală ngai tus bal tam lơh, hơ̆ sồng tus ngai geh tơnklàs Đah jum dà lơgar, dà lơgar tơrgùm bal kung gam geh sùm mờ geh uă bơta pơnyờ să ngan. Ồng Điểu Đi, kra ƀòn Ƀon Bu Păng 2, Củ tịc UɃÑZ xã Quảng Trực lài do kah wơl, bơh ală nam 1965 tus tŭ geh tơnklàs càr Dăk Nông, tiah nhàr dà lơgar xã Quảng Trực tus càr Bình Phước gơtìp ling lơgar Mỹ mờ lơgar Việt Nam Kộng hoà đùh ƀồm cui rơcai ngan.

Mơya mờ nùs nhơm pràn kơl dang, làng bol kung gam lơh ngan sền gàr ù tiah, sền gàr ƀòn lơgar, geh uă ngan klao pơnu, ùr ơruh tàm ală ƀòn lòt jăt kăc màng: “Ƀòn Bu Păng do là ù tiah mò ồng lài do neh kis tàm do bloh. Tŭ tam lơh, ling Mỹ nguỵ kung rồn bơklơn làng bol ntrờn tàm tiah ndai, mơya làng bol ờ bài mờ mìng kis, chơ̆t tàm do. Rài tam lơh den bal mờ kăc màng tam lơh sền gàr ù tiah do, tŭ neh tơnklàs den tơrgùm lơh sa, bơ̆t bơtàu ƀòn lơgar. Tŭ do Quảng Trực neh tơnguh bơtàu ngan bloh, rài kis geh gơguh ngan bloh, kung kơnờm Đảng, Dà lơgar sền gròi, bơcri priă ai làng bol in”.

Mờ bơhiàn rài lài do jăk chài, pràn kơl dang tàm tam lơh kăc màng, nam 2019, xã Quảng Trực neh geh Thủ tướng Cíñ phủ dờp là xã Tiah lơngăp lơngai mờ dờp sră săp sèng tiah lời wơl kấp càr. Bơh tŭ do, xã Quảng trực geh càr Dăk Nông sền gròi ngan, ai uă ngan priă bơcri nàng bơ̆t bơtàu phan bơna.

Ù tiah pơrhê bazan geh uă bơta mƀùr do neh lơh geh tơlir niam ală suơn kơphe, tờm măk ka, cèng geh uă bơta pràn tơn jơh jơgloh tơmù rơƀah mờ brồ guh lơh pas. Ntào tềng đah suơn tam tờm măk ka ơnàng 2 lồ geh tam bơrlŭ bal mờ suơn kơphe, mò Thị Nớ, dùl nă kwang bàng tàm xã Quảng trực pà git, pơgăp mờ do 10 nam, tờm măk ka geh tam tàm ù tiah do. Mờ nùs nhơm, kwang bàng, đảng viên lam lài, làng bol ƀòn lơgar jăt bal, mò Nớ tơrlòng tam tờm măk ka, hơ̆ sồng lam sồr làng bol tam jăt bal. Tơl lồ ù tam tŭ tờm neh geh plai, priă tăc geh bơh 300 tus 500 tơlăk đong tàm 1 nam: “Añ pơnyờ să ngan tŭ geh kis tàm ƀòn lơgar do, tŭ dờng geh lòt bơsram, lòt lơh broă hơ̆ sồng rê wơl mờ ù tiah kăc màng Quảng Trực do nàng lơh broă. Kơnờm mờ broă sền gròi bơh Đảng, Dà lơgar, bal mờ broă bơcri priă lơh ală phan bơna, làng bol kis tàm ƀòn kung neh git ngui khoa họk kĩ thuật, geh tam ală bơta phan tam, phan ròng. Uă hìu neh sơrlèt mờ kal ke, tơn jơh jơgloh, tơmù rơƀah, lơh pas di pal”.

Ồng Nguyễn Hải Lý, Củ tịc UɃÑZ xã Quảng Trực, kơnhoàl Tuy Đức, càr Dăk Nông pà git, gùt xã tŭ do geh mờr 3 rơbô hìu làng bol, rơlao 10 rơbô nă làng bol, khà cau kòn cau geh rơlao 50%. Mờ broă sền gròi nền nòn ngan bơh Dà lơgar dê bal mờ broă tam gơl mhar tàm bồ tơngoh lơh sa làng bol dê tai, khà hìu rơƀah tàm xã gam gơmù mhar ngan, bơh 69% tàm bồ nam 2022 tŭ do neh gơmù gam 49%. Ồng Nguyễn Hải Lý pin dờn mờ đơs tai, mờ ală bơta geh ƀuơn ai broă tơnguh bơtàu lơh sa mpồl bơtiàn bè tŭ do, gam ờ jŏ tai, Quảng Trực geh klàs mờ mpồl bơh “xã kal ke kơnhoàl rơƀah 30a dê”: “Tàm jơh ală broă lơh jăt jơnau kờñ bơcri priă ai làng bol in den bol añ sền gròi bè bàr gah broă lơh sa suơn sre là phan tam, phan ròng mờ khoa họk kỹ thuật, dong kờl làng bol, bơto sồr làng bol. Nàng tơnguh geh gơnoar bơta pràn bơh dà lơgar, kung bè broă di nùs bal bơh làng bol, dong kờl rài kis lơh broă sa làng bol in tơnguh bơtàu rơlao. Bơh tŭ hơ̆ geh dong kờl xã di pal là xã khin cha jăk chài tàm rài tam lơh, kung bè xã lam lài tàm broă tơnguh bơtàu phan tam, phan ròng di pal nàng tơnguh bơtàu lơh sa tàm rài lơngăp lơngai”.

Ồng Điểu Thái, Phó Ƀí thư Thường trựk Huyện ủy Tuy Đức pà git, xã Tiah lơngăp lơngai Quảng Trực geh gơnoar kwơ màng tàm tơngai tam lơh mờ tŭ do kung geh gơnoar kwơ màng tàm broă tơnguh bơtàu lơh sa mpồl bơtiàn kơnhoàl dê. Tŭ do, kơnhoàl gam sền gròi mờ ai geh uă ngan priă bơcri tus xã Quảng Trực in, nàng tơnguh bơtàu lơh sa mờ prăp gàr, tơnguh uă ală bơta kwơ niam chài ờs mờng, nùs nhơm kờñ gơboh mờ dà lơgar dê: “Xã Quảng Trực làng bol neh geh bơhiàn kăc màng. Tàm tơngai do mờ tàm tơngai tus, bol añ tàm broă lơh jăt 3 broă lơh jăt jơnau kờñ Dà lơgar dê, do là bơta pràn kwơ màng ngan nàng bol añ pơn jăt tai bơcri priă tus xã Quảng Trực, tơnguh bơta kwơ niam chài ală jơi bơtiàn kòn cau, tơnguh bơtàu lơh sa mpồl bơtiàn”.

Tơnơ̆ mờ 48 nam tơnklàs đah jum, dà lơgar tơrgùm bal, mờ broă sền gròi, bơcri priă bơh Dà lơgar bal mờ broă lơh ngan bơh làng bol kis tàm xã do dê, Quảng Trực dùl xã tiah nhàr dà lơgar gơtìp kal ke gam rơhời brồ guh. Đảng ƀộ, gơnoar atbồ bal mờ làng bol tàm xã gam lơh ngan tơnguh bơhiàn jăk chài kăc màng, lơh ngan brồ guh ai xã Tiah lơngăp lơngai gơs xã lam lài tàm broă lơh sa kơnhoàl rơƀah 30a Tuy Đức dê.