Pah dơ̆ tơngkah kir sơnrai Ngai tơngklas tiah đah Jum, tơrgùm dùl Dà lơgar, ồng Y Nguôm Byă, ơm tàm ƀòn Dăk Tuôr, xã Cư Pui, kơnhoàl Krông Bông, càr Dăk Lăk den kah wơl ală nam nhai tus bal lòt ling gàr ƀòn tam lơh mờ bol sò tơm lơgar Mỹ. Ồng yal wơl, tàm rài hơ̆, mpồl ling gàr ƀòn bơh ƀòn dê bơh bơta đơng lam bơh xã đội trưởng ồng Y Ơn Niê dê neh uă dơ̆ tam dră wơl mờ bơta sơgràm phà, jơh nùs lơh ngan ờ lời bol sò tơm kŭp làng bol tus ơm “tàm tiah tơrgùm bal”. Ồng Y Nguôm Byă đơs, bulah tơdùh uă ngan ƀồm, rah uă ngan gar phàu mơya  làng bol ƀòn Dăk Tuôr kung gam bơtàu tơnguh lơh sa, dong kờl ai kăc màng in sơl:“ Nàng drơng ai tiah tam lơh, drơng ai mpồl ling he in cau dềt lơh broă dềt cau dờng lơh broă dờng ờ gŏ lời gơtìp pờ tê, he pal dong klàs dà lơgar he dê. Tiah sar lơgar ngài, gĭt là làng bol jơi bơtiàn kòn cau mơya ờ gơ tùi lời roh Dà lơgar ờ”.

Tơnơ̆ ngai Dà lơgar tơrgùm dùl, Đảng ƀộ, gơnoar atbồ, làng bol ală jơi bơtiàn xã Cư Pui mhar ngan mut lơh bơsong jơnau gơ lời wơl bơh dơ̆ tam lơh dê, ai jơh bơta pràn tàm pơrlòng lơh broă, lơh sa jơh nùs lơh ngan bơt bơtàu ƀòn lơgar ngai sơlơ bơtàu tơnguh. Bơh tiah ờ tơl sa, ờ tơl soh, lơh sa bơr ngơl gơla, tŭ do uă hìu bơnhă tàm xã neh brồ guh lơh pas mờ priă lơh geh gĭt nđờ rơhiang tơlak đong pah nam. Ồng Y Sự Byă, ơm tàm ƀòn Khanh, xã Cư Pui, chờ hờp đơs:“Bơta pràn bơh làng bol dê tŭ do pơndrờm mờ lài do hời rơ hời geh tam gơl. Làng bol tŭ do ai jơh tŭ tơngai niam lơh broă  sa tàm suơn tàm ù tiah pôs đồng kăc màng bơh he dê. Geh bàr pe hìu bơnhă ngui bơta chài măi mok pa den tŭ do khi neh bơtàu tơnguh rlau pơndrờm mờ lài do”.

 Xã Cư Pui, kơnhoàl Krông Bông, càr Dăk Lăk geh 13 thôn, ƀòn, mờ 2 rơbô 700 hìu bơnhă làng bol, rlau 14 rơbô nă cau, làng bol jơi bơtiàn dồ ết nă cau geh mờr 90%. Tus tŭ do, tiah sar lơgar ngài neh geh gùng che ồs đèng sòl àng, ală broă lơh bơt bơtàu hìu bơsram, hìu sơnơm, bơtơ̆t rbòng dà, dà sàng goh... neh mờ gam ngui niam geh cồng nha. Ồng Y Kok M’Drang, Ƀí thư Đảng ủy xã Cư Pui, pà gĭt, bal mờ bơta tus bal sền gròi bơcri priă bơh Dà lơgar dê, làng bol ală jơi bơtiàn tàm xã gam sơm bat tê bal dùl nùs bal bơt bơtàu ƀòn lơgar pa. Xã rơ̆p pơn jat tai ngui niam gơnoar broă lơh krơh niam bơh đảng viên dê nàng hòi jà làng bol tam gơl bơta kơlôi sơnơng, broă lơh, pơgồp bal mờ tàm jàu ngui măi mok pa tàm broă lơh sa, bơtàu tơnguh lơh sa. Ồng Y Kok M’Drang, đơs:“Tơrgùm mờ pơlam gùng dà ai ală oh mi là đảng viên in pal là cau lơh krơh niam lam lai tàm broă bơtàu tơnguh lơh sa- mpồl bơtiàn. Mờ gùng dà broă lơh “Đảng viên lơh lài làng bol rơ̆p lơh jat bal”. Jat tàm gùng dà broă lơh bè hơ̆ den jơh kwang bàng, đảng viên bơdìh mờ broă lơh bơt bơtàu Đảng, bơt bơtàu ală anih lơh broă cíñ trị bol añ pơlam gùng dà bơtàu tơnguh lơh sa là tờm ngan nàng tơnguh uă kơnòl broă bơtàu tơnguh hìu bơnhă lơh sa nàng bơtàu tơnguh lơh tus măi mok lơh jơh lơm”.

Đòm jat niam bơhiàn kăc màng, bơh tiah sar lơgar ngài, tiah làng bol jơi bơtiàn dồ ết nă cau kal ke, xã Cư Pui gam brồ guh pràn kơl dang bè lơh sa mpồl bơtiàn nàng di pal mờ sră jờng rơ cau ling khin cha jak chài dê.