Pơgap mờ do 70 nam, bơh bơta đơng lam di ngan, jak chài ngan bơh Đảng dê, ling klàng mờ làng bol he neh lơh geh Tam lơh pha lin Điện Biên Phủ “Pơn rơ làm gùt ală tiah- lơh nrơ̆t làm gùt plai ù”, lơh tơn jơh gơnoar atbồ jàñ bơsak, mut sơgràm phà bơh bol sò tơm lơgar Tây mờ bơta tus bal bơh lơgar Mỹ dê. Pha lin dơ̆ tam lơh hơ̆ neh tơn jơh dơ̆ tam lơh, lơh geh wơl ring lơngai tàm Đông Dương. Tŭ tơngai tŭ ring lơngai geh ai wơl, Điện Biên Phủ kung mìng gam là dùl tiah tam lơh mờ uă ngan tềl lời wơl bơh ƀồm mền, gar phàu dê lơh aniai bal mờ ală bơta jê sồt roh rui uă ngan. Ồng Vũ Văn Kiệm, làng bol ơm tàm sơnah ƀòn Mường Thanh, ƀòn dờng Điện Biên Phủ, càr Điện Biên, kah wơl:“Ù tiah gùt dar tŭ hơ̆ gơprah gơpring ngan, mìng geh 3, 4 nơm hìu lơm, bơh Bơnơm A1 guh tus rềp drà tiah tờm ờ geh anih lơh broă lơi ờ. Điện Biên Phủ tơngklàs rau mơya làng bol kung gam jơ gloh rƀah, bòl glar kal ke ngan, ngan là làng bol jơi bơtiàn, ngai sào 2 dơ̆ kung ờ gŏ hờm”.

Ală nam pa do, Đảng ƀộ, gơnoar atbồ mờ làng bol ală jơi bơtian càr Điên Biên sùm cih kah bơhiàn kăc màng, yờ tơnguh uă nùs nhơm Điện Biên Phủ khin cha jak chài tàm broă bơtàu tơnguh lơh sa, tam klăc bal, bơsong jơnau gơ lời wơl tơnơ̆ tơngai tam lơh. Bơh dùl tiah tam lơh nrah nring ƀồm mền, gar phàu, geh uă dà kơl hề mờ mhàm ntìng bơh ling klàng mờ làng bol he dê, Điện Biên tŭ do neh tam gơl pa, brồ guh tàm dùl rùp să ƀòn dờng kơnòm să ngăc ngar, pa ngan, bơtàu tơnguh mờ mut gơrờm bal pràn kơl dang bal mờ jơh gùt lơgar. Uă broă lơh bơt bơtàu dờng geh lơh sir mờ ai ngui bè ƀlàng rơndeh par Điện Biên Phủ tàm tơrbŏ bal mờ 2 kơnhoàl ù tiah lơh sa tờm bơh Dà lơgar dê là ƀòn dờng Hà Nội mờ ƀòn dờng Hồ Chí Minh.

Tŭ do broă lơh tiah drà càr Điện Biên gam geh rề ơnàng mờ bơtàu tơnguh jat gùng dà pơlam rơndăp ù tiah kơnhoàl ù tiah, rơndăp ù tiah càr. Broă lơh rơndăp ù tiah tiah drà, rơndăp ù tiah bơt bơtàu geh sền gròi, gàr tơl bơta tơl làm mờ lòt lài dùl cơnđoà, lơh bơnàng jă nàng bơt bơtàu broă rơndăp lơh mờ lam lơh ală rơndăp broă lơh bơcri priă bơt bơtàu, bơtàu tơnguh tiah drà. Tàm tơngai bơh nam 2020-2023, càr Điện Biên neh kĭ ring bal pơgap 20 rơndăp broă rơndăp ù tiah tàm ală tiah tiah drà, ngan là tàm ù tiah ƀòn dờng Điện Biên Phủ. Tus tŭ do, khà lơh jơh rơndăp ù tiah nền cê tàm rơndăp ù tiah bal kờp bal jơh gùt càr lơh geh pơgap 36%. Kwơ màng, jơnau kờñ tus nam 2025, càr rơ̆p lơh pràn tam gơl pa tơl làm, lơh geh bơta bơtàu tơnguh mhar tàm broă bơtàu tơnguh lơh sa- mpồl bơtiàn, tơrgùm hòi jà tă pơgồp bal priă jền nàng bơt bơtàu phan bơna mờ tiah drà dùl ròt bal jat gùng dà pa ngan.

Ală bơta tam gơl sùm hơ̆ ờ mìng lơh năc lòt nhơl nrơ̆t lơm mờ să tờm làng bol kis tàm càr Điện Biên kung ngoh rngăc ngan sơl. Ồng Lò Văn Diên, làng bol kis tàm sơnah ƀòn Him Lam, ƀòn dờng Điện Biên Phủ, yal:“Añ gŏ bè gah phan bơna bơt bơtàu den bơtàu tơnguh ngan, ngan là ală nam pa do, den tàng làng bol chờ hờp ngan bè gah bơtàu tơnguh lơh sa phan bơna bơt bơtàu bơh ƀòn dờng dê. Să tờm añ mờ làng bol kung kơ̆p kờñ đòm jat niam bơta pràn  tàm dơlam nàng pơgồp bơnah bơt bơtàu càr ngai sơlơ bơtàu tơnguh tai”.

Ồng Lê Thành Đô, Củ tịc Ủy ƀan Ñân zân càr Điện Biên pà gĭt: Nam 2022, càr Điện Biên ơm dơ̆ 2 bè khà gơguh lơh sa tàm 14 càr tàm tiah thiòng lơyah mờ tiah kơh bơnơm đah tô Dà lơgar dê, ơm khà dơ̆ 24 tàm 63 càr, ƀòn dờng tàm gùt lơgar, là khà gơguh lơh sa uă ngan rlau jơh tàm uă nam pa do. Rài kis làng bol jơh bal bè phan bơna mờ nùs nhơm geh bơtàu tơnguh loh làng, phan bơna bơt bơtàu geh bơcri priă lơh ngai sơlơ dùl ròt bal mờ dờng niam. Nam 2023, khà gơguh GRDP bơh càr dê kờp dŭ lơh geh 7,1%, uă rlau pơndrờm mờ jơnau kờñ Nghị quyết pơrjum dờng Đảng ƀộ càr dê, lơh geh khà uă ngan pơndrờm kờp bal jơh gùt lơgar dê, gơwèt mpồl lam lài bơh 14 càr tàm tiah thiòng lơyah mờ tiah kơh bơnơm đah tô Dà lơgar dê. Priă lơh geh bơh broă lơh lòt nhơl kờp dŭ geh 1 rơbô 750 tơmàn đong mờ kung là nam sơnrờp lòt nhơl bơh càr dê lơh geh khà 1 tơlak dơ̆ năc.

Nam do, càr Điện Biên rơ̆p tơngkah kir sơnrai 70 nam Tam lơh pha lin Điện Biên Phủ mờ bơyai lơh nam Lòt nhơl Dà lơgar- Điện Biên nam 2024, càr neh geh bơta rcang lài tàm broă lơh rcang ală bơta mờ kơ̆p kờñ lơh geh ală bơtàu tơnguh mhar tàm bơtàu tơnguh lơh sa- mpồl bơtiàn bơh tiah đah đah tô mat tơngai mut dê tàm tơngai tus. Ồng Lê Thành Đô, đơs nền:“Kwang bàng, kông cứk, viên cứk, mpồl ling phàu crong, làng bol ală jơi bơtiàn mờ ală mpồl lơh sa bơh càr Điện Biên dê gam tơrgùm pơnđơl pràn lơh ngan đòm jat niam bơhiàn yau Điện Biên Phủ khin cha jak chài dê, lơh pràn tam gơl pa, bơceh lơh, ngui geh cồng nha bơta ƀuơn, bơta pràn bơh càr dê nàng lơh geh bơtàu tơnguh mhar ngan tàm broă bơtàu tơnguh lơh sa- mpồl bơtiàn mờ sền gàr niam Dà lơgar- lơngăp lơngai tàm ù tiah do dê. Bơh hơ̆ lơh geh cồng nha geh ngan gờm chờ tơngkah kir sơnrai 70 nam tam lơh pha lin Điện Biên Phủ”.

70 nam tơnơ̆ dơ̆ tam lơh pha lin pơn rơ ngan ală tiah, lơh nrơ̆t jơh gùt plai ù mờ geh gơtha kwơ màng, gơnoar broă cèng bơta tàm tơngai pa, mờ bơta pin dờn pơn yờ să gơ gơs bơta gơn kơnờm pràn kơl dang bal mờ bơta pràn bơh mpồl tam klăc dờng bơh jơh gùt làng bol, Đảng ƀộ, gơnoar atbồ mờ làng bol ală jơi bơtiàn tàm tiah do neh mờ gam lơh càr Điện Biên in gơ gơs tiah bơtau tơnguh niam ngan tàm gùng lòt tam gơl pa tiah lồi đah mat tơngai lik Dà lơgar dê.