Làng bol ală jơi bơtiàn tàm Tây Nguyên neh geh bơhiàn tam klăc bal, lòt jăt kăc màng tam lơh mờ bol sò tơm sơgràm phà mờ jòi tơrkwĕt jơh bol Fulro. Tŭ kơno yal bè dơ̆ lơh roh bơta lơngăp lơngai cíñ trị tàm Dăk Lăk, ală kra ƀòn tàm Tây Nguyên jơh nùs ngan dră wơl mờ hòi jà làng bol tam klăc bal tam dră wơl mờ ală cau lơh roh bơta lơngăp lơngai. Ồng Kră Jañ Ha Xuyên, cau K’Ho, ơm tàm thôn Dà Tế, xã Dà Mrong, kơnhoàl Dam Rong, càr Lâm Đồng neh geh tŭ gơtìp bol Fulro hoài jà ơm kis bòl glar ndơ̆p mpồn 12 nam tơn tàm brê dờng, ồng gĭt wă jơh ngan bơta bòl glar kal ke tŭ gơtìp gơ ơm tàm bơta tìs gùng tìs dà. Ồng Kră Jañ Ha Xuyên, đơs: Lài do, añ kis tàm brê 12 nam rƀah lờ ời jơgloh ngan, kal ke ngan, lòt jòi biăp brê bùm brê nàng kis đau pah ngai, kòp jê sùm. Tŭ añ rê wơl, Đảng, Dà lơgar, gơnoar ătbồ kung ai tơl bơta sơl ai añ in geh broă lơh, oh kòn geh lòt bơsram. Kơnờm bơh Đảng, Dà lơgar dong kờl ai añ in lơh broă dà lơgar, tŭ do añ neh geh hìu đam niam, geh rơndeh lòt rê ƀươn, lơh sa hìu bơnhă bơtàu tơnguh rlau. Añ geh bàr pe dờ kờñ đơs mờ oh mi kòn cau bañ lơh jăt añ tài bơh añ là dùl nă cau neh rlau lòt tìs gùng, lòt jăt bol Fulro 12 nam ờ gŏ geh dùl bơta kwơ lơi ờ, den tàng añ neh wơl dô rê wơl mờ geh Đảng, Dà lơgar dong kờl. Ai jơnau bơsram bơh să tờm añ, añ jà jơh tơl nă cau pal dùl nùs tĕ lòt jăt Đảng, Dà lơgar ờ gŏ di iăt jăt jơnau bol iơh bơchồt, pơndờm...hơ̆ là bơta mờ añ kờñ đơs wơl mờ jơh tơl nă cau in.

Ai ồng Y Đoan, kòn cau M’nông, kwang atbồ Ƀan Mặt trận ƀòn R’Bút, xã Quảng Sơn, kơnhoàl Dăk Glong, càr Dăk Nông den đơs: Sơrlèt gan git nđờ bơta bòl glar, kal ke, dà lơgar hơ̆ sồng ai geh lơngăp lơngai is, ring lơngai nàng làng bol in iang nùs lơh sa, bơtàu tơnguh lơh sa. Den tàng, làng bol tàm ƀòn đơs lah kràñ ngan ală broă lơh lơh roh bơta tam klac bal, lơh roh bơta rơndap tap sèng lơngăp lơngai, lơh gơ rềngt us rài kis làng bol dê: Kal ke ngan hơ̆ sồng dà lơgar geh lơngăp lơngai is, geh ring lơngai nàng iang nùs lơh sa den tàng làng bol tàm ƀòn do đơs lah kràñ ngan ală broă lơh roh bơta rơndap tap sèng lơngap lơngai bè tàm Cư Kuiñ, càr Dăk Lăk. Tàm ƀòn bol hi neh pal sùm pơrjum nàng mblàng yal làng bol in tam klac, bañ đòm, bañ iat bol ờ niam bơ chồt, rơcang sơndră gơlik geh roh bơtă rơndap tap sèng lơngăp lơngai tàm ƀòn lơgar.