Ngan bơta pràn tam klăc dờng jơh gùt làng bol bơh bơta lam bồ bơh Đảng dê là dùl jơnau hơ pơrgon nàng gùng dà tam lơh mờ bol Mỹ, dong klàs dà lơgar lơh geh bơta pha lin.

Ală ngai nhai 04 kah yau, Thượng tá mò Nguyễn Thị Minh, lài do là kwang bàng kwang àng ƀòn dờng Hà Nội sùm kah wơl ală nam tam lơh bềng bơta bòl glar kal ke mờ cui rơcai ngan, Thượng tá mò Nguyễn Thị Minh yal, mò geh rwah ai mŭt lơh broă tàm gah kwang àng bơh tŭ mò pa 13 sơnam mờ là dùl êt nă ngan cau bơsram bơh hìu bơsram “Ùr triñ sát krơi is” tŭ hơ̆ geh rwah lòt dong kờl ai tiah tam lơh tiah đah jum dà lơgar in. Thượng tá mò Nguyễn Thị Minh, pà gĭt, uă nam lơh broă tàm tiah tam lơh, pal kis tàm rài kis “piang sàu ờ geh, boh sa ờ tơl, kòp mprơm sùm”, mơya bơta pràn bơh sơnam kơnòm să dê neh dong mò sơrlèt gan kal ke lơh gơs kơnòl broă. Mò gŏ gơlơh chờ hờp ngan tài bơh neh tă pơgồp dà kơlhề jơh sơnam kơnòm să ai broă lơh tơngklàs tiah đah jum tơrgùm dùl dà lơgar in. Thượng tá mò Nguyễn Thị Minh, yal: 06 nam lơh broă tàm tiah tam lơh, sơnam kơnòm să mơya geh lòng bơh bềng lơm gar phàu ƀồm mền gar năt mờ bơh bòl glar kal ke ngan gĭt lơh bơh tam lơh dê. Añ gŏ gơlơh he tih dờng mờ dờng kràñ rlau uă. Uă dơ̆ añ geh lòt lơh broă drơng broă tam lơh mờ đơng lam broă tam lơh bal mờ ồng Võ Chí Công. Tŭ hơ̆, să bồ añ gam dềt rơhền ngan mờ añ neh pal cèng bal dùl nơm măy vô tuyến điện mờ dùl nơm măy pờ đèng kuài mờ tê nàng ntoăt jăt mpồl, bol añ bòl ngan mờ rơngòt ngan tài bơh tŭ hơ̆ bol sò tơm digơlan cuh chơ̆t halà digơlan kŭp ris.

Tam lơh jai pha ngai 30/04/1975 là cồng nha bơh bơta tam lơh, phi să, kơ̆ nùs sùm tàm 30 nam bơh uă rơnàng cau Việt Nam dê. Hơ̆ kung là cồng nha bơh bơta pràn tàm tơrgùm bal gơlik bơh mpồl tam klăc dờng jơh gùt jơi bơtiàn pơgồp bal mờ bơta pràn tŭ tơngai dê, ơn bơh bơta lam bồ àng sơrdah ngac ngar ngan bơh Đảng Kộng sản Việt Nam dê. Tam lơh jai pha do kung gơlik geh bơh nùs nhơm kơ̆p kờñ ngan lơngăp lơngai is, khăt gơboh is, kơ̆p kờñ ngan ring lơngai tơrgùm dùl Dà lơgar bơh jơh gùt jơi bơtiàn Việt Nam dê. Phó Giáo sư, Tiến sĩ ồng Nguyễn Danh Tiên, Kwang ătbồ Viện Kah yau Đảng, Họk viện Cíñ trị Dà lơgar Hồ Chí Minh, đơs nền: Pha lin dờng ngan bơh dơ̆ tam lơh mờ Mỹ sò tơm dong klàs dà lơgar bơh làng bol he dê lài ngan là pha lin bơh gùng dà cíñ trị, gùng dà ling klàng krơi is, rơcăng lài is, bơceh lơh bơh Đảng dê. Tàm dơ̆ tam lơh mờ bol Mỹ sò tơm, ngan kơnờm bơh Đảng hòi tơrgùm geh bơta pràn bơh jơh gùt làng bol dê tam lơh mờ bol sò tơm mờ jơh bal 3 mpồl ling neh bal mờ mpồl cíñ trị geh tŭ pơgồp bal niam ngan đah tam lơh rah rài mờ tam lơh dờng, pơgồp bal tam lơh phàu crong mờ tam lơh cíñ trị, pơgồp bal tam lơh ling klàng mờ bơta ntàu guh bơh làng bol dê mờ jơnau đơs “jơh gùt làng bol tam lơh, tơl jơh ală bơta tam lơh”.

Phó Giáo sư, Tiến sĩ ồng Bùi Đình Phong, lơh broă tàm Họk viện Cíñ trị Dà lơgar Hồ Chí Minh, đơs là: Pha lin bơh dơ̆ tam lơh mờ Mỹ sò tơm dong klàs dà lơgar là pha lin dờng ngan bơh làng bol Việt Nam dê. Pha lin do geh uă bơta. Tàm hơ̆, bơta tờm ngan, là: kơnờm geh gùng dà di pal ngan, Đảng he neh bơtòm tơrgùm bơta pràn tam klăc bơh jơh gùt làng bol dê, bơta pràn bơh 2 tiah đah tô- đah jum dê mờ bơta pràn tam klăc dunia. Ngai do, nùs nhơm tam klăc dờng gùt jơi bơtiàn kờñ pal pơn jăt tai geh prăp gàr, bơ̆t bơtàu pràn kơldang nàng sơlơ ngai sơlơ gơ in kơ̆ kơl jăp ngan. Giáo sư, Tiến sĩ ồng Bùi Đình Phong, đơs: Ngai do, kăc màng tơngklàs tiah đah jum dà lơgar neh rlau gĭt nđờ jơ̆t nam. Tŭ do, tàm tam gơl pa tŭ do geh uă bơta pal lơh mơya dùl tàm ală bơta kwơmàng ờ gơtùi ờ lơh là pal ngui niam geh bơta pràn tam klăc dờng jơh gùt jơi bơtiàn dê. Kờñ tam klăc pal geh jơnau kờñ bal, ai tơlik geh ală broă nàng bơtòm tơrgùm geh bơta kwơ ai jơh tơl nă cau in nàng cau in gĭt geh Đảng ai tơlik gùng dà broă lơh, ai tơlik broă loh làng. Kwơmàng lơh broă bơh Đảng dê là wèt tus bơsong rài kis phan bơna, tŭ cau gĭt gŏ geh bơta hơ̆ den cau rơ̆p tam klăc, bơtòm tơrgùm tềng hơđơm bồng bi Đảng dê mờ bol he rơ̆p geh bơta pràn dờng ngan sền gàr rài ătbồ, sền gàr Đảng.

Neh 48 nam lòt gan. Jơnau kah yau sơlơ gơlòt ngài, bol he sơlơ gĭt wă jrô ơnàng rlau tai bơta pha lin dờng ngan, nùs nhơm mờ bồ tơngoh Việt Nam dê, ală jơnau bơsram mờng chài kwơmàng bơh dơ̆ tam lơh mờ bol Mỹ sò tơm, dong klàs dà lơgar mờ rlau mờ tŭ lơi jơh, hơ̆ là bơta pràn tam klăc dờng jơi bơtiàn neh lơh gơs bơta pha lin kah yau. Mờ bơta pin dờn tàm bơta tam gơl pa mờ bơta lam bồ ngăc ngar àng sơrdah bơh Đảng dê, tàm rài tơnơ̆ do bơh dà lơgar dê, làng bol kơ̆p kờñ Đảng pơn jăt tai tơnggŏ gơnoar broă là mpồl cau tờm bơh mpồl tam klăc dờng jơh gùt jơi bơtiàn nàng bơ̆t bơtàu mờ sền gàr dà lơgar. Ngui niam geh bơta pràn tam klăc dờng gùt jơi bơtiàn den Đảng pal tam klăc, kwang đơng lam bồ bơh Dà lơgar dê pal tam klăc, pal là krơh àng, pơn jăt tai ngui niam bơta pràn tam klăc dờng nàng lơh jăt broă lơh tam gơl lơh sa dà lơgar dê bơh lơh sa mờ măy mok tus măy mok lơh jơh lơm.