Tàm pơrjum, uă jơnau đơs đơs là, bơnah priă bơcri broă lơh bơh Broă lơh jơnau kờñ dà lơgar bè bơtàu tơnguh lơh sa- mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2025 ờ hềt geh dà lơgar yal den tàng uă càr gơtìp kal ke tàm bơt bơtàu broă rơndap lơh ngui priă bơcri.

2, 3 sở, gah broă lơh geh jàu kơnòl đơng lam ală rơndap broă lơh, mơya ờ hềt lam lơh kơnòl bơt bơtàu broă rơndap lơh, pơlam lơh jat mờ tơrgùm cồng nha lam lơh bal bơh rơndap broă lơh, rơndap broă dềt dê… Ủy ƀan Ñân zân ală kơnhoàl lam lơh Broă lơh do gam kwi kuơ tàm broă kơlôi sơnơng, ngui lam lơh jat ală sră nggal pơlam bơh dà lơgar mờ càr dê, ờ hềt geh broă lơh nàng tam gơl pa broă lam lơh.

Tàm nam 2022, jơh ală kơnhoàl ờ hềt ai priă bơcri bơh kes priă kơnhoàl dê nàng lam lơh Broă lơh do. Ồng Trần Văn Mẫn, Kwang atbồ Ƀan Zân tộk càr Quảng Ngãi đơs là, Rơndap broă lơh sồ 9 bơh Broă lơh jơnau kờñ dà lơgar bơtàu tơnguh lơh sa- mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm dê bè “Bơcri priă bơtàu tơnguh mpồl jơi bơtiàn kòn cau dùl êt nă cau mờ mpồl jơi bơtiàn kòn cau gam uă kal ke” ờ hềt geh pơlam ngan ngồn bè broă lơh ai càn, khà ai càn, tơngai ai càn mờ priă cồng ai càn gơ wèt mờ broă dong kờl ală hìu bơnhă làng bol jơi bơtiàn kòn cau dùl êt nă cau gam gơtìp uă kal ke. Tŭ do, càr Quảng Ngãi geh uă bơnah priă bơcri mơya ờ gơtùi lam lơh: “Bol hi dan bè do, broă lơh ai càn do gơtùi lam lơh jat broă lơh jàu gơnoar ai Ngân hàng Cíñ sác in ai càn. Ndrờm bè gơnoar atbồ ală tiah tŭ do gam lơh, ai priă bơcri, jàu gơnoar ngân hàng Cíñ sác in ai càn. Cau càn geh uă mpồl, lơh gơlik bơta ƀuơn ai bơtàu tơnguh in”.

Gơ rềng tus broă lam lơh rơndap broă lơh sồ 1 “Dong kờl bơsong bơta ờ tơl ù ơm, hìu ơm, ù lơh sa, dà ngui sa”, gơ wèt broă lơh jơnau kờñ dà lơgar bè bơtàu tơnguh lơh sa- mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm, ồng Trường Trung Tuyến, Phó kwang atbồ Ƀan Zân tộk càr Gia Lai yal bơta geh ngan bè do: Nam 2022, ală tiah gơ ơm tàm Broă lơh neh ring bal mat cau gơ wèt hìu bơnhă rƀah geh dong kờl hìu ơm. Tŭ hơ̆, ală hìu bơnhă làng bol do geh dong kờl ai càn priă ngân hàng nàng lơh hìu ơm. Tus bồ nam 2023, uă hìu bơnhă gơ wèt cau geh dong kờl ờ gam ơm tàm mat hìu bơnhă rƀah tai den tàng tŭ do kung gam ờ hềt geh dờp priă dong kờl lơh hìu ơm. Ồng Trường Trung Tuyến pà git, càr gơ lơh kwi kuơ ngan tàm broă bơsong tă priă dong kờl ai làng bol in: “Tŭ do, khi neh càn ngân hàng bloh, phan lơh hìu gam dồs, tŭ do gam kòl tàm bơta do là kal ke ngan. Bol hi neh geh sră nggal pơyua Ủy ƀan Zân tộk in nàng geh jơnau hơ càr in bè bơta do”.

Tàm pơrjum, ala mat ală tiah neh tam pà mờng chài mờ đơs ală kal ke, kòl yan bơh mùl màl lam lơh ală rơndap Broă lơh jơnau kờñ dà lơgar bơtàu tơnguh lơh sa mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm. Nàng lam lơh Broă lơh do geh cồng nha, ồng Hầu A Lềnh, Ƀộ trưởng- Củ ñiệm Ủy ƀan Zân tộk sồr ală mpồl, ală tiah kơlôi sơnơng sră nggal nền nòn tàm tŭ ai tơlik jơnau đơs Ủy ƀan Ñân zân càr in lam lơh jat: “Bol he pal geh kơnòl pơlam ai kâp kơnhoàl, kâp xã in. Ală broă lơi gơ wèt gơnăp gơnoar kâp càr den bơsong, ờ duh pal kơp dà lơgar. Ală tiah sơlơ tơnguh rlau tai broă lơh tàm pơgồp bal, tàm yal jơnau tơnggit, mờng chài. Sồr Ủy ƀan Zân tộk ală càr là anih tờm đơng lam tàm càr pal git loh, pah nhai pal geh jơnau yal jat tŭ tơngai lam lơh neh hơ pơrgon, broă neh lơh bè lơi, cồng nha bè lơi mờ gam kòl yan bơta lơi,..”.

Di dơ̆ do, Ƀộ trưởng- Củ ñiệm Ủy ƀan Zân tộk ồng Hầu A Lềnh pa lam bồ mpồl kwang bàng bơh Ủy ƀan Zân tộk dê neh lơh broă mờ kwang đơng lam bồ càr Quảng Ngãi bè cồng nha lam lơh broă lơh jơnau kờñ dà lơgar bơtàu tơnguh lơh sa- mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm nam 2022 mờ 3 nhai bồ nam 2023. Jat jơnau yal, khà ai priă bơcri broă lơh do in tàm càr tàm nam 2022 mìng geh pơgap 49%, nam 2023, khà ai priă bơcri mìng rơp mờr 5%. Đơs tàm dơ̆ lơh broă, ồng Hầu A Lềnh đơs tus 2, 3 bơta dong càr Quảng Ngãi lam lơh geh cồng nha broă lơh do: “Ù tiah càr do ngài ngan, ơnàng ngan. Cau geh dong kờl den li la ngan den tàng kal ke ngan. Broă lơh bol he dê krơi mờ ală broă lơh jơnau kờñ ndai den tàng pal tam pà kâp. Do là dùl broă lơh bơrlŭ bal den tàng pal geh bơta tàm pơgồp bal nàng lam lơh. Bơta tàm pơgồp bal do pal bơh mpồl mờ kơrnuat lơh brơ đah ală anih lơh broă, nàng lơh bè lơi bơh bơt bơtàu broă rơndap lơh, bơsong bơta kòl yan pal ring niam”.

Mpồl kwang bàng bơh Ủy ƀan Zân tộk dê rơp tơrgùm yal Cíñ phủ mờ ală Ƀộ, gah broă lơh dà lơgar in sền sơ wì, ai tơlik ală broă lơh tă bơsong kòl yan, kal ke tàm tŭ lam lơh broă lơh Jơnau kờñ dà lơgar bơtàu tơnguh lơh sa- mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm.