Mờ bơta krơi is bơh làng bol kòn cau Tây Nguyên dê uă ngan geh rài kis ờ kờñ tìp mat mờ cau bơdìh, uă ngan kis mờ ală gah broă lơh sa tàm ƀòn lơgar, uă ngan cau ờ hềt geh tŭ lik bơh ƀòn tàm uă nam. Den tàng, broă lơh mblàng yal, ngan là mblàng yal bè dà lềng, bồt bơlào sồr pal chài ngan, mờ broă lơh, pơgồp bal đah mblàng yal mờ hòi jà làng bol. Tổng Kông ty Tân Cảng Sài Gòn neh pơgồp bal mờ ală tiah, ală mpồl bơyai lơh git nđờ jơt dơ̆ mblàng yal bè dà lềng, bồt bơlào, gơ hòi gơ jà ală mpồl cau ai rlau 4 rbô nă kwang bàng, đảng viên, cau ling yau, làng bol, cau lơh phan, cau bơsram dờng mờ kơnòm bơsram tàm ù tiah Tây Nguyên in. Ồng A Bớt, Phó Ƀí thư Duh broă sùm càr Kon Tum pà git: “Tân Cảng Sài Gòn neh sồr cau yal jơnau tus ală kơnhoàl ngài bơh càr dê nàng yal tơnggit, mblàng yal jơnau dong kwang bàng, đảng viên, làng bol, ngan là ală kơnòm bơsram git wă bè bơta kuơ bơh dà lềng, bồt bơlào Việt Nam dê. Pơrjum là tŭ nàng Ƀan Tuyên giáo ală càr sền sơ wì wơl broă lam lơh broă lơh pơgồp bal mờ tìp mat bơsram, cribơyai mờng chài bè ală broă lơh niam tàm broă lam lơh kơnòl cíñ trị bơh Đảng mờ Dà lơgar dê”.

Dơ̆ pơrlòng jòi git tàm internet “Tân Cảng Sài Gòn 35 nam brồ guh kâp dunia, tàmt ơrbŏ bal gùt plai ù” neh gơ hòi gơ jà mờr 50 rbô dơ̆ cau tàm 63 càr, ƀòn dờng tus bal; lơh gơlik bơta gơ rề bè gơnoar broă, bơta kuơ dờng màng bơh dà lềng, bồt bơlào Việt Nam tàm gùt lơgar đơs bal mờ bơh Tân Cảng Sài Gòn dê đơs is. Nàng tơnguh broă lơh pơgồp bal mblàng yal dà lềng, bồt bơlào mờ ală càr, ồng Huỳnh Thế Mạnh, Kwang atbồ Ƀan Tuyên giáo càr Gia Lai sồr: “Sồr cau yal jơnau dong ai Ƀan Tuyên giáo in bè rê tàm ală kơnhoàl yal bè broă gơlik geh pah ngai, gơnoar broă, bơta kuơ dờng màng bơh dà lềng, bồt bơlào Việt Nam dê, bơta tàm dà lềng đah mat tơngai lik tŭ do. Pơn jat tai bơyai lơh pơrlòng geh kuơ ngan ngồn, lơh gơ rề uă bơta kờñ gơboh dà lềng, bồt bơlào tus làng bol”.

Đại tá ồng Nguyễn Năng Toàn, Ƀí thư Đảng ủy, Củ tịc Tổng Kông ty Tân Cảng Sài Gòn đơs nền: Tàm nam 2024, Tổng Kông ty Tân Cảng Sài Gòn đơs is git nền rơp sơlơ tơnguh tai ală broă lơh pơgồp bal mờ Ƀan Tuyên giáo ală càr Tây Nguyên jơh bal bè broă lam lơh mờ khà broă. Tàm hơ̆, tơrgùm tam gơl pa, lơh li la ală broă lơh mblàng yal, sền gròi tus tơnguh tai cau mblàng yal, mờ kung pơgồp bal bơyai lơh broă lơh mblàng yal dà lềng, bồt bơlào mờ broă lơh “Kis git jơnau git adat”, dong kờl gàr lơngăp lơngai rài kis mpồl bơtiàn nàng kờñ tơnguh bơta niam mờ cồng nha ai broă lơh mblàng yal in tus làm uă rơnàng làng bol: “Rơp pơn jat tai tơnguh khà cau yal jơnau rê tàm ală tiah, pơn jat tai tam gơl pa broă lơh mblàng yal, mblàng yal jơnau tus uă cau rlau tai gơ wèt mờ làng bol kòn cau Tây Nguyên, pơn jat tai sơlơ tơnguh tai cau mblàng yal, sền gròi tus ală kơnòm bơsram, cau bơsram dờng, mpồl lơh sa kă bro, mpồl lơh broă bal, cau bơcri priă mờ ngui niam bơta pràn bơrlŭ bal, hòi jà uă ngan rlau jơh tơl bơnah priă jền nàng tơnguh cồng nha broă lơh mblàng yal”.

Kwang đơng lam bồ ling dà lềng ồng Đỗ Văn Yên, Phó Cíñ ủy Ling dà lềng pà git: Đảng ủy, Gah đơng lam Ling dà lềng pơn jat tai pơgồp bal jơh nùs, lam lơh gơtùi mờ sơrlèt ală jơnau kờñ, kơnòl broă ai tơlik, pơn jat tai kơlôi sơnơng tơngume, broă lơh pa; pơgồp bal mờ sơlơ tơnguh tai srơh “Tài dà lềng, bồt bơlào Việt Nam” mờ srơh “Gùt lơgar tài Trường Sa, Trường Sa tài gùt lơgar: “Kơnòl broă sền gàr gơnoar tờm dà lềng, bồt bơlào tàm bơta pa geh jơnau sồr uă rlau gơ wèt mờ broă lơh mblàng yal. Ling dà lềng pơn jat tai tàm tơngai tus pơgồp bal mờ ală càr, ƀòn dờng, ƀộ, mpồl, gah lơh broă dà lơgar tơnguh bơta niam mblàng yal bè dà lềng, bồt bơlào, git nền do là kơnòl broă tờm ngan”.

Tổng Kông ty lam lơh geh cồng nha broă lơh dong kờl, gàr lơngăp lơngai rài kis mpồl bơtiàn tàm 3 càr kĭ; ròng siam 28 nă mè Việt Nam khin cha jak chài, cau pròc mhàm tờm cau ling chơt màng tàm càr; dong kờl lơh 15 nơm hìu nùs nhơm; pà priă dong kờl bơsram “Sòl àng bơta kơp kờñ” ai ală kơnòm bơsram rƀah sơrlèt gan kal ke bơsram jak. Jàu pà phan ai ală cau geh sră dong kờl bơh dà lơgar, cau geh màng mờ dà lơgar, làng bol geh rài kis kal ke, cau ling sồt să, cau ling kòp tê jê să tàm càr.