Bi H’Giang Niê, Ƀí thư Tỉñ đoàn Dăk Lăk pà git: Tơnơ̆ tŭ tơngai lam lơh tus tŭ do, ală tơngume bơsram lơh jat bồ tơngoh, nùs nhơm, rài kis Bác Hồ dê neh cèng wơl cồng nha niam, lơh gơlik bơta tam gơl niam tàm git wă bơh tơl nă đoàn viên, ơruh pơnu dê: “Broă bơsram mờ lơh jat bồ tơngoh, nùs nhơm Bác Hồ dê geh bol hi lam lơh ring bal tàm jơh gùt mpồl lơh broă Đoàn. Broă lài ngan bol hi lơh là bơsram ală jơnau mìng dùl tơngume bơh ală pơrjum mờ bơh ală dơ̆ cribơyai cíñ trị jat ală dơ̆ lơh broă uă  bơh ală kâp ƀộ đoàn dê. Dơ̆ 2 là bol hi lam lơh pơgồp bal tàm ală dơ̆ pơrjum cíñ trị, ală srơh, ală broă lơh kac màng. Bơdìh hơ̆ tai, bol hi gam lam lơh bơsram mờ lơh jat Bác Hồ bơh ală dơ̆ bơyai lơh, ală dơ̆ pơrlòng mờ dut ndơl bol hi bơh bơta lam lơh uă ală krơh pơn rơ gơguh jak nàng bơh hơ̆ lơh gơlik bơta gơrề làm uă tàm ală kâp ƀộ đoàn mờ tàm jơh gùt mpồl bơtiàn”.

Bơsram mờ lơh jăt ơnà jăk Ƀác Hồ, kwang bàng, đảng viên bal mờ làng bol tàm tiah kòn cau càr Kon Tum neh geh broă lơh niam, broă lơh geh cồng nha ai geh bơta niam tàm mpồl bơtiàn ƀòn lơgar bè: pơgồp Dơ̆ lam sồr “Lơh tam gơl nùs nhơm kơlôi sơnơng broă lơh tàm tiah làng bol kòn cau lơh làng bol kòn cau brồ guh klàs mờ rơƀah kơl jăp”, “Gùt làng bol tam klăc bơ̆t bơtàu ƀòn lơgar pa, tiah drà gơguh jăk”, broă lơh “Gùt lơgar tus bal tài cau rơƀah - ờ lời cau lơi gơtìp sơbì is hờ tơnơ̆”... Là dùl nă cau geh pơnrơ jăk tàm broă bơsram mờ lơh jăt ơnà jăk, nùs nhơm niam, broă lơh Ƀác Hồ dê pa geh Củ tịc UɃÑZ kơnhoàl Đăk Hà pà sră jờng rơ, mò Y Hlá, Phó Ƀí thư Ci ƀộ thôn Đăk Wek, xã Đăk Pxi pà git: “Añ sùm kơ̆p kờñ geh bơsram mờ lơh jăt ơnà jăk, nùs nhơm niam Ƀác Hồ dê. Tài ơnà jăk, nùs nhơm niam, broă lơh lơh broă bơh Ƀác Hồ dê di pal ngan, jăk chài ngan. Să tờm añ kung bè jơh làng bol kis tàm do gŏ là, bơta lơi mờ Ƀác Hồ neh bơto den he pal nền nòn lơh jăt niam. Rài mò pàng lài do ờ hềt git nàng ngui tàm lơh broă sa, ờ hềt git rơwah sơntìl phan tam, phan ròng, mìng git lơh jăt bơhiàn lài do, tùc kòi, tam bùm... ờ geh cồng nha, rài kis sùm gơtìp kal ke. Tŭ do, kơnờm mờ Đảng, Dà lơgar sền gròi, kơnờm Ƀác Hồ bơto he neh git tam gơl bồ tơngoh kơlôi sơnơng tàm broă lơh, git rơwah sơntìl phan tam, phan ròng geh kwơ tàm lơh sa uă bè tam phan jŏ tơngai, ròng sur, iar... lơh sa hìu nhă neh tơnguh bơtàu rơlao, rài kis ƀòn lơgar neh tơnguh bơtàu”.

Bi Mlê là Phó Củ tịc Mpồl cau ùr xã Chư Á, ƀòn dờng Pleiku, càr Gia Lai. Sùm tàm uă nam do neh pờ dùl ơdŭ bơsram ờ sa priă tàm hìu he dê tàm ală ƀùi mho nàng dong kờl, tề lam oh kòn tàm ƀòn Wâu. Kơnờm bơta jơh nùs bi dê, uă kơnòm bơsram tàm ƀòn bơh bơta ờ chài đơs, ờ chài cih dà Yoan neh gơs kơnòm bơsram jak bơh hìu bơsram dê. Rlau mờ hơ̆ tai, jơh ală oh ndrờm pin dờn tŭ lòt bơsram. Tàm srơh cau ùr tàm ƀòn lơgar, bi kung là cau jơh nùs, ngac ngar tàm ală broă lơh, ală srơh geh mpồl cau ùr cih dờp. Nam do, bi kung là krơh geh pơn rơ gơguh jak geh ƀòn dờng Pleiku jờng rơ mờ dan pà phan ƀàn. Bi Mlê pà git, bơta jơh nùs bi dê gơtùi geh kơnờm dùl bơnah là sùm bơsram, lơh jat krơh niam Bác Hồ kờñ gơboh dê: “He bơsram jat Bác Hồ 4 bơta hơ̆ là tryăng tryồng- tềm pềr- song dơ pă- nùs nhơm niam, bơsram tàm Bác Hồ bơta kờñ gơboh làng bol, lơh khat dùl broă lơi he kung pal sơnơng tus bơta kuơ làng bol dê lài. Bơta lơi geh kuơ làng bol in den he lơh, bơta lơi ờ niam, ờ cèng wơl bơta kuơ làng bol in den he pleh. Bơsram tàm Bác Hồ bơta pơn dềt să, song dơpă, ờ sơmờm ai bơta kuơ să tờm in, lơh broă lơi kung sùm sơnơng tus bơta kuơ bal, bơta kuơ làng bol dê lài. Pơn đơl kis gơ in niam nàng gơ gơs cau geh kuơ ai hìu bơnhă, ai ƀòn lơgar in, dờng rlau là ai dà lơgar in”.

Ồng Y Nhất Buôn Krông, Phó Ƀí thư Đảng ủy xã Cư̆ Huê, kơnhoàl Ea Kar, càr Dăk Lăk pà git, mờ broă đơng lam, lam lơh bơh kấp ủy bal mờ gơnoar atbồ, làng bol ndrờm geh ƀuơn, tus bal bơ̆t bơtàu ƀòn lơgar pa, gơlik geh ală cau geh pơnrơ jăk, pơgồp bal tàm broă lơh geh uă broă Bơsram mờ lơh jăt ơnà jăk, nùs nhơm niam, broă lơh Ƀác Hồ dê. Nam 2022, xã Cư̆ Huê, kơnhoàl Ea Kar neh lơh gơs broă bơ̆t bơtàu ƀòn lơgar pa. “Gơwèt mờ broă lơh jăt broă bơsram mờ lơh jăk ơnà jăk Ƀác Hồ den xã neh geh ală cồng nha geh pơnrơ ngan bè tàm broă lơh gùng lòt tàm ƀòn, tàm xã neh dă mờ bê tông, dă mờ cài jơh, geh uă gơl gùng tàm ală ƀòn, ai geh bơta ƀuơn nàng làng bol in lòt rê, pơn diang phan kă bro. Bơh tŭ do neh geh uă cau geh pơnrơ jăk là làng bol bal mờ hìu nhă tàm broă ai ù lơh gùng lòt, tă pơgồp priă, phan, tơngai lơh broă nàng bơ̆t bơtàu ƀòn lơgar pa”.