VOV4.K’ho- Ală ngai do, bal mờ gùt lơgar, tàm làm gùt ală ƀòn tàm tiah Tây Nguyên geh uă broă lơh tơngkah 77 nam Kac màng Nhai 8 pha lin mờ Sơn tờm Dà lơgar ngai 02/9. Chờ hờp mờ ală cồng nha pơn rơ ngan bơh dà lơgar dê, làng bol Tây Nguyên sơlơ kah dà kơl hề dờng màng bơh Bác Hồ dê. Ồng Y’Krưč Ayun (kòn cau Rơđê) ơm tàm ƀòn Kna, xã Čư Mgar, kơnhoàl Čư Mgar, càr Dăk Lăk pà git: pah dơ̆ ngai 02/9 gơ lơh kah wơl bè tŭ tơngai Bác Hồ sền sră cih jơnau yal bơr lơngăp lơngai is. Kah bè Sa tềp lơngăp lơngai is, làng bol tàm ƀòn ờ huĭ dà kơl hề Bác Hồ dê, nàng tơl nă làng bol geh rài kis hờm ram, gơboh gơbài bè tŭ do: “Làng bol ưn ngài ngan Bác Hồ, tài Bác Hồ neh đơng lam kac màng. Ală cau ling chơt màng neh tam lơh, phi să ai wơl lơngăp lơngai is jơi bơtiàn in, cèng wơl ring lơngai ai làng bol in. Làng bol kah Bác Hồ ờ hềt thàn chờ hờp bal mờ làng bol neh sang rài. Sơlơ kah dà kơl hề Bác Hồ dê, bol he pal jơh nùs bơtàu tơnguh lơh sa. Tiah lơi kung bềng lìu bơta chờ hờp tàm ring lơngai, khat gơboh is, ờ gam tam lơh, jê sồt, moat jrùm tai”.

Mò Y Nhít, 68 sơnam, ơm tàm ƀòn Tu Mơ Rông, xã Tu Mơ Rông, kơnhoàl Tu Mơ Rông, càr Kon Tum pà gĭt, bơh tàm tŭ dềt mò neh geh kơno cau kra ƀòn mờ ală cau dờng sơnam yal bè Bác Hồ. Bơh sơn rờp làng bol tồn làh Bác Hồ là yàng bè tàm ală jơnau yal yau bơh kòn cau Sơdàng dê. Tŭ ntào dờng geh ơm rềp mờ ală cau ling, mò wă bè Bác Hồ mờ ki ngàm Bác Hồ uă ngan. Ngai Sơntờm Dà lơgar 2/09 iăt Bác Hồ sền sră yal bơr Lơngap lơngai is bơh tàm rơziô dê mò Y Nhít gơlơh ngoh rngăc ngan. Mò Y Nhít, đơs: Tàm tŭ gam dềt, añ sùm kơno ală cau kra tàm ƀòn yal uă ngan jơnau yal bè Bác Hồ, cau lơi kung geh nùs nhơm krơi is ngan gơwèt mờ Bác Hồ. Tŭ añ lòt ling, añ sền gŏ ală bi tàm mpồl ling cau lơi kung ñìm, sền gŏ bè hơ̆ añ lùp “ñchi ală bi ñìm bè hơ̆ taih”- Ală bi hơ là “Ñìm tài bơh pơlai soh ngan Bác Hồ neh sang rài”. Jơh gùt làng bol ngoh rơngăc mờ ñim pơlai soh ai Bác Hồ in, tài bơh Bác Hồ là kwang đơng lam bồ kờñ gơboh ngan bơh jơh gùt jơi bơtiàn dê. Añ sùm cih kah tàm nùs nhơm ngai deh mờ ngai Bác Hồ sang rài. Tàm ală ngai do, añ kah mờ kờñ Bác Hồ uă ngan, kơnờm geh Bác Hồ dà lơgar he hơ̆ sồng ai geh bơta lơngap lơngai is, khat gơboh is bè tŭ do, mờ kơnờm geh bơta sền gròi bơh Đảng, Dà lơgar mờ rài kis làng bol dê neh tam gơl pa, hờm ram, kis chờ hờp. Pah nam tus ngai 2/09 là ală tiah ndrờm bơyai lơh tàm hìu rông nàng kah rơngal tus ngai roh bơh kwang đơng lam bồ kờñ gơboh dê, tơl nă cau cau lơi kung kờñ mờ kah Bác Hồ uă ngan.

Bal mờ bơta ngoh rơngac kah tus Bác Hồ di Sơn tờm Dà lơgar ngai 02/9, bi Đinh Hman, kòn cau Bahnar ơm tàm ƀòn HVat, xã Ayun, kơnhoàl Chư Sê, càr Gia Lai đơs: “Bác Hồ là dùl nă cau dờng màng ngan. Bác Hồ neh sền sră cih jơnau yal bơr crơng gơs dà lơgar Việt Nam, cèng wơl bơta khat gơboh is, hờm ram ai tơl nă cau in. Tơl nă cau sùm ki ngàm, kah dà kơl hề dờng màng Bác Hồ dê. Sùm cih kah jơnau bơto tơngkah Bác Hồ dê, làng bol kòn cau Jrai, Bahnar mờ cau Yoan tam klac bal dùl nùs, bal mờ gơp bơt bơtàu ƀòn tờm tam gơl pa, bơt bơtàu rài kis hờm ram, ờ tam cah is ală jơi bơtiàn kòn cau”.

Di dơ̆ ơm rlô Ngai Sơntờm Dà lơgar 2/09 nam do, Thị Lan (kòn cau M’Nông), ơm tàm ƀòn Dăk Kliêng, xã Quảng Tín, kơnhoàl Dăk R’lấp, càr Dăk Nông, sơlơ chờ hờp rlau tai tŭ oh neh jơh tơngai bơsram lơh broă, ngan ngồn geh mŭt lơh broă tàm Cơldŭ lơh broă Ủy ƀan Ñân zân xã Quảng Tâm. Thị Lan đơs, kơnờm geh Đảng, geh Bác Hồ, Dà lơgar he dê neh geh rài kis ring lơngai, lơngap lơngai, chờ hờp, kơnòm dềt tàm ală ƀòn lơgar geh bơsram tơl làm. Mìng is oh gơ lơh chờ hờp ngan tŭ pa jơh bơsram đại họk luật rê tàm Dăk Nông neh geh ai lơh broă di pal, nàng gơtùi pơgồp bơnah drơng broă làng bol in, bơt bơtàu rài kis ƀòn lơgar ngai sơlơ bơtàu tơnguh. Thị Lan đơs: Rài kis bơh làng bol dê tŭ do tơl làm rlau, gĭt ngui bơta chài măy mok tàm broă lơh sa, tàm broă bau kòn kung tơn jơh bơhiàn ờ niam, ờ di pal mờ rài kis pa, ală bơhiàn yau bơrngơl gơla kung rơ hời tơn jơh. Làng bol kung mblàng yal ai oh kòn kòn sau in prap gàr bơta niam chài rơgơi bè đơs jơnau đơs pơnđick, dròng cing jañ mồng, tàñ sơ̆ sah, tàñ ồi yau... ală bơta niam bơnĕ bơh bơta niam chài rơngơi kòn cau M’Nông dê làng bol gam pơn jat tai ngui niam nàng prap gàr ai rơnàng tơnơ̆ do in.

Cau mblàng K'Hạnh mờ K' Duẩn