Uă ngan ală kơnòm pà gĭt, gơlơh pin dờn ngan rcang mut tàm dơ̆ pơrlòng. Mpồl đơng lam pơrlòng ală kấp sồr ală tiah pơrlòng lơh geh tơl ală bơta niam ngan rlau jơh nàng ală kơnòm pơrlòng in geh nùs nhơm niam ngan tàm jơh tŭ tơngai bơyai lơh dơ̆ pơrlòng jơh bơsram kấp pe. Nam do, càr Dăk Lăk geh rlau 21 rơbô nă cau pơrlòng cih mat dan tus bal pơrlòng tàm 33 tiah pơrlòng mờ rlau 870 cơldŭ pơrlòng tàm jơh ală kơnhoàl, thị xã, ƀòn dờng.

Rlau 3 rơbô nă kwang bàng, cau pơgru sền pơrlòng, jat sền mờ drơng broă tàm ală tiah pơrlòng. Nàng kơnòm pơrlòng in geh nùs nhơm niam ngan, pin dờn tàm jơh tŭ tơngai tus bal pơrlòng, ồng Phạm Đăng Khoa, Kwang atbồ Sở Giáo zục mờ Đào tạo càr Dăk Lăk, Phó Mpồl đơng lam dơ̆ pơrlòng jơh bơsram kấp pe càr sồr Mpồl đơng lam dơ̆ pơrlòng ală kấp lơh geh ală bơta nàng dong kờl kơnòm pơrlòng in.

 Càr Lâm Đồng geh mờr 15 rbô 500 nă kơnòm pơrlòng cih mat tus bal pơrlòng, tàm hơ̆ geh rlau 2 rbô 500 nă kơnòm pơrlòng là cau jơi bơtiàn dồ êt nă cau. Nàng gàr dơ̆ pơrlòng geh lơh lơngăp lơngai, di jơnau pal jăt bơh dơ̆ pơrlòng dê mờ ƀuơn ƀuài tàm broă lòt rê, ơm rlô, sàu sa, càr Lâm Đồng neh rơcang 675 cơldŭ pơrlòng tàm 39 anih pơrlòng tàm làm gùt ală kơnhoàl, ƀòn dờng tàm càr.

Jat ồng Phạm S, Phó Củ tịc Ủy ƀan Ñân zân càr Lâm Đồng pà git, bal mờ broă gàr niam ală bơta pal geh bè phan bơna, cau lơh kơnòl broă sền pơrlòng, càr gam sền gròi tus broă lơh gàr lơngăp lơngai lòt rê tàm gùng, kloh niam phan sa, anih ơm rlô, sàu sa ai ală kơnòm pơrlòng ngài hìu in. Tŭ do, tơl broă lơh rơcang lài neh lơh gơs, rơcang nàng bơyai lơh dơ̆ pơrlòng lơngăp lơngai, song dơpă, di kơrnuat pơrlòng.