Tàm càr Kon Tum dơ̆ duh kah Bơtau Hùng geh Mpồl duh broă Hìu duh kah cau geh dà kơl hề mờ Dà lơgar Lương Khế mờ gơnoar atbồ sơnah ƀòn Thống Nhất, ƀòn dờng Kon Tum bơyai lơh yŭ rơyùm, niam ngan. Làng bol, năc lòt nhơl mờ ala mat gơnoar atbồ tus mờ Hìu duh kah cau geh dà kơl hề mờ Dà lơgar uă ngan, duh khoai Bơtau sơnrờp Dà lơgar hòi dan ai dà lơgar ring lơngai, làng bol lơngăp lơngai, mìu càl niam, phan tam geh tơnhào uă.

Tàm càr Gia Lai, mpồl cau ơm bal tàm Vĩnh Phú (tŭ do là 2 càr Vĩnh Phúc mờ Phú Thọ) ơm kis tàm ală kơnhoàl, thị xã, ƀòn dờng bơh càr Gia Lai dê tơrgùm rê wơl tàm Hìu duh khoai Bơtau Hùng, tàm xã An Phú, ƀòn dờng Pleiku, lơh dơ̆ chu ñàng kah kơlôi nggu ryah tờm.

Tàm Tiah tềl lời wơl kah yau niam chài Dà lơgar Hìu duh kah cau geh dà kơl hề mờ Dà lơgar Lạc Giao, ƀòn dờng Buôn Ma Thuột, gơnoar atbồ mờ làng bol càr Dăk Lăk neh yŭ rơ yùm bơyai lơh dơ̆ duh kah Bơtau Hùng nàng kờñ kah ưn ngài ală Bơtau Hùng neh geh dà kơl hề bơt bơtàu Dà lơgar.

Tàm càr Lâm Đồng, dơ̆ duh kah Bơtau Hùng geh bơyai lơh yŭ rơyùm, mờ ală bơhiàn tờm, geh: Dơ̆ rò phan ơn pơdơng Bơtau Dà lơgar dê, dơ̆ duh khoai bơh yau mờ chu ñàng duh khoai Bơtau sơnrờp Dà lơgar tàm ală hìu duh khoai Thượng, Trung, Hạ gơwèt Tiah hìu duh khoai Âu Lạc tàm tiah lòt nhơl ñjrùh dà Preen, ƀòn dờng Dà Làc. Do là dơ̆ nàng làng bol ală jơi bơtiàn wèt rê mờ nggu ryah tờm, tơngŏ nùs nhơm duh kah, ưn ngài tus dà kơl hề bơh ală Bơtau Hùng dê neh geh dà kơl hề bơt bơtàu Dà lơgar mờ sền gàr Dà lơgar, bơh hơ̆ pơgồp bơnah bơt bơtàu mờ bơtàu tơnguh mpồl tam klăc dờng ală jơi bơtiàn.