Jat Sở Kông thương càr Gia Lai, kờp dŭ lài jơnau kờñ blơi phan ngui sa tàm tơngai sa tềp Dà lơgar Qúy Mão 2023 geh gơguh pơgap 30%. Nàng gàr tơl phan tăc bro, Sở neh sồr ală mpồl lơh broă, mpồl lơh sa kă bro lam lơh broă rơndap lơh ơn prap ală phan bơna kờñ pal geh, ngan là phan ngui sa, lơh jat geh cồng nha broă lơh bè ờs giă, tăc phan di giă neh lĭp. Mờ ală mpồl lơh broă kĭ hơ gàr niam bơta niam bơkah phan bơna dê, geh sră tăc blơi cơng tàng tơl làm, tiah tờm lơh gơlik loh làng.

Mò Đào Thị Thu Nguyệt, Phó Kwang atbồ Sở Kông thương càr Gia Lai, yal: Ală phan bơna nam do kờp dŭ geh là 20 rơbô 800 tơmàn đong, jơnau kờñ ơn prap phan nam do bè ờs đau sơl. Sở Kông thương kung lam lơh ală broă rơndap lơh ai ală mpồl lơh sa kă bro in ơn prap phan bơna gàr niam broă tăc phan mờ làng bol Việt Nam lài ngan ngui phan bơna Việt Nam dê nàng lam lơh ală broă lơh tàm dơ̆ sa tềp. Ơn prap phan bơna gàr niam jơnau kờñ tăc phan mờ jơnau kờñ blơi phan bơh làng bol dê, bañ lời tơnguh giă nisơna tàm dơ̆ sa tềp Dà lơgar nam 2023 do.

Tàm càr Dăk Lăk, drà kă bro phan bơna drơng sa tềp Dà lơgar Quý Mão 2023 gam geh duh hồl ngan. Mờ 2 anih tăc giò chả tàm ù tiah ƀòn dờng Buôn Ma Thuột, bi Nguyễn Thị Nguyệt, pà gĭt, tàm dơ̆ sa tềp dà lơgar khà giò chả tăc tàm drà kă bro gơguh uă rlau mờr 3 dơ̆, uă ngan rlau jơh geh tăc pơgap 7 tạ dùl ngai. Bi Nguyễn Thị Nguyệt đơs: Anih do kă bro pơgap 5 nam do rao, den pah nam añ lơh tàm tơngai sa tềp uă ngan, phan lơh gơlik tàm do den añ mìng ngui poăc pa lơm, ờ gŏ ngui poăc ơn mrềt ờ, ai tàm tiah lơh poăc geh poăc bơkah kàr lơi añ ai jơh kàr hơ̆. Tŭ do broă lơh sàng goh poăc là kwơ màng ngan, ai ală phan tĕ den pal jat gah Ƀộ Y tế dê, khi ai kàr lơi den lơh kàr hơ̆ lơm.

 Anih lơh gơlik phan ngui sa Thành Phát, ƀòn dờng Buôn Ma Thuột tus tŭ do kung neh ơn prap tơl làm ală gah phan kờñ pal geh nàng drơng broă ngui sa. Jat mò Vũ Thị Gấm, cau atbồ anih lơh gơlik phan do yal, kờp dŭ lài, sa tềp nam do jơnau kờñ ngui phan sa gơguh pơgap 20% pơndrờm mờ ngai bè ờs. Nàng gàr niam tơl phan bơna, anih lơh broă neh rcang lài blơi phan tàm ală mpồl lơh broă bơh ƀòn dờng Hồ Chí Minh mờ bàr pe Hợp ták xã lơh gơlik phan lơh geh bơh suơn sre sàng goh tàm càr Dăk Lăk dê.  Mò Vũ Thị Gấm, đơs: Phan bơna bè ƀañ, mư̆t, kèo ală bơta den neh blơi geh 90% rao. Dơ̆ 2 là tŭ do gam mŭt tàm tơngai lơh phan sràt bè kơnuh kiệu, ală phan sa ờs mờng sa tàm dơ̆ sa tềp dê. Nam lơi kung bè hơ̆ lơm, jat jơnau hơ mờ gah atbồ drà kă bro, mpồl lơh sa kă bro blơi phan jat di tiah lơh gơlik phan loh làng, den hơ̆ sồng tem pơnđềt ală phan blơi pal loh làng tai nàng gàr niam gơnoar kwơ ai năc in.

Nàng gàr niam bơta bơkah niam mờ giă tăc phan bơna dê, rlau 1 nhai do mpồl lơh broă Atbồ drà kă bro gơwèt Kụk Atbồ drà kă bro càr Dăk Lăk neh sơlơ tơnguh ală broă lơh lòt sền, gròi sền. Mơkung lơh pràn mblàng yal, yal tơngĭt adat boh lam mờ kĭ hơ gơwèt mờ ală mpồl cau, cau dùl nă să is bañ jun pơndiang, prap pồn, lơh sa kă bro ờ ngan, phan ờ loh tiah tờm lơh gơlik. Ồng Mai Mạnh Toàn, Kwang atbồ Kụk Atbồ drà kă bro càr Dăk Lăk pà gĭt: Sền gĭt ù tiah, cau, gah phan tờm, lơh rơndap broă lơh gùng dà broă lơh geh ngan nàng lam lơh jat geh cồng nha, sơlơ tơnguh lòt sền gròi sền drà kă bro mờ lơh glài kràñ ală broă lơh lơh tìs gơwèt mờ phan bơna kờñ pal geh nàng drơng broă jơnau kờñ  làng bol dê tàm tơngai sa tềp.

Càr Dăk Lăk kung lam 3 Mpồl lòt sền ală gah bè bơta niam phan ngui sa, lơh dơ̆ lòt sền tàm ală anih lơh gơlik phan, kă bro, blơi phan ngui sa bơh lơgar ndai, kă bro drơng broă ñô sa, kă bro phan sa gùng drà tàm 7 kơnhoàl, thị xã mờ ƀòn dờng Buôn Ma Thuột. Ồng Phạm Thế Hoan, Phó Chánh Thanh tra Sở Nông nghiệp mờ Phát triển Nông thôn, pà gĭt: Bơh lòt sền den gŏ jơh ală hìu bơnhă kă bro, mpồl cau, cau dùl nă să is lơh sa kă bro bè niam phan ngui sa lơh jat niam ală jơnau sồr bơh adat boh lam dê. Mơya geh bàr pe anih lơh gơlik phan  lơh tìs den bol añ lơh glài jat jơnau cih. Pơgồp bal mờ lòt sền den bol añ geh mblàng yal jơnau sồr bè adat boh lam bè niam phan ngui sa mờ bơto pơlam ai ală anih lơh gơlik phan in kă bro pal niam phan ngui sa jat jơnau sồr dê.

Nàng kờñ gàr niam bè ờs giă tàm drà kă bro di dơ̆ sa tềp dà lơgar Qúy Mão 2023, Ủy ƀan Ñân zân càr Dăk Lăk neh lời rlau 1 rơbô 500 tơmàn đong nàng ơn prap phan bơna kờñ pal geh. Mpồl phan pal tơrgùm gàr bè ờs giă di tơngai lồi nam 2022 mờ sa tềp Dà lơgar Qúy Mão 2023, tàm hơ̆ geh: Kòi phe (phe, phe lơbơn tam tàm lơgar), phan ngui sa (poăc sur, poăc iar, tap iar, ada, tơngi, sơdàng, bòk ngòk mờ ală phan ngui lơh gơlik, biăp bùm, plai, đo), ñiên liệu. Tơngai lơh gàr bè ờs giă bơh ngai 30/11/2022 tus ngai 30/2/2023.