Tàm Gia Lai, 2 rbô 487 nă ơruh pơnu càr Gia Lai lòt gùng lơh kơnòl ling klàng tàm drim ngai 25/02. Tàm khà do, geh 59% là cau jơi bơtiàn dồ êt nă cau, 479 nă cau geh sră dan is lòt lơh kơnòl ling klàng, 72 nă cau geh ƀằng đại họk, kao đẳng. Dơ̆ jàu dờp ling geh  càr Gia Lai bơyai lơh yŭ rơyùm ngan tàm 17 anih bơh 17 kơnhoàl, thị xã, ƀòn dờng bơh càr dê.

 Ai tàm càr Dăk Lăk, geh 3 rbô 26 nă làng bol lòt gùng lơh kơnòl ling klàng dơ̆ do. Tus bal dơ̆ jàu dờp ling tàm thị xã Buôn Hồ geh Trung tướng Thái Đại Ngọc, Kwang đơng lam bồ quân khu V, Ƀí thư Tỉñ ủy càr Dăk Lăk ồng Nguyễn Đình Trung bal mờ kwang đơng lam bồ thị xã mờ gal ngan làng bol. Tàm anih jàu dờp ling tàm thị xã Buôn Hồ geh 173 nă làng bol, tàm hơ̆ geh 80 nă cau neh cih is sră dan lòt lơh kơnòl ling klàng.

Ai tàm càr Dăk Nông, dơ̆ jàu mờ dờp ling tàm ală kơnhoàl tàm ù tiah càr Dăk Nông geh bơyai lơh tàm nùs nhơm yŭ rơyùm, ngan ngồn là ngai chờ bơh rơnàng kơnòm să dê lòt gùng tàm pơdờn bèp bi lòt lài dê. Bơh hơ̆, lơh jat niam nùs nhơm kăc màng, bơta pin dờn bơh jơi bơtiàn mờ bơhiàn yau pơn rơ ngan, jơh nùs lơh ngan bơt bơtàu mờ sền gàr kơ̆ kơl jăp Dà lơgar.

 Nam 2024, càr Dăk Nông geh jàu sac rơwah rlau 1 rơbô 150 nă ơruh pơnu, tàm hơ̆ geh 900 nă ơruh pơnu lơh kơnòl broă ling klàng mờ rlau 250 nă ơruh pơnu lơh kơnòl broă kwang àng. Ală ơruh pơnu jak chài ngan bơh càr Dăk Nông dê lòt ling dơ̆ do lơh kơnòl broă ling klàng tàm ală mpồl ling bơh Ƀộ Kwang àng, Quân đoàn 3 (Ƀộ Quôk phòng); trung đoàn Ƀộ ƀiñ 994 (Gah đơng lam ling klàng càr Dăk Nông), Gah đơng lam Mpồl ling sền gàr tiah nhàr lơgar càr mờ Kwang àng càr Dăk Nông.

Dơ̆ jàu dờp ling nam 2024 geh 10 kơnhoàl, ƀòn dờng bơh càr Kon Tum dê dùl ròt bơyai lơh tàm drim ngai 25/02 jat jơnau sồr, gàr bơta yŭ rơyùm, ki ngàm, lơngăp lơngai, tềm pềr mờ ngan ngồn là Ngai chờ lòt ling. Nam do, Tỉñ đoàn càr Kon Tum geh 804 nă làng bol lòt gùng lơh kơnòl ling klàng. Jơnau yal bơh Gah đơng lam ling klàng càr Kon Tum dê ai gŏ, Mpồl duh broă kơnòl ling klàng ală kâp neh lơh jat broă rơndap lơh sac rơ wah, hòi làng bol lòt ling dồ bă nền nòn, ring bal, ndrờm bal, di Adat Kơnòl ling klàng, gàr bơta loh làng, làng bol lơh tờm tàm broă rơ wah ling.

Tàm khà 804 nă làng bol bơh càr Kon Tum dê lòt gùng lơh kơnòl ling klàng, geh 26 nă cau cih is sră dan lòt ling; ling pa bơh 18 tus 27 sơnam gàr tơl bè pràn kơldang să jan; 28 nă ling pa geh ƀằng Trung kấp, kao đẳng mờ Đại họk; 2 nă ling pa là Đảng viên. Lài mờ tŭ lòt gùng lơh kơnòl ling klàng, ală ling pa mờ hìu bơnhă ndrờm dờp geh bơta sền gròi, pơn jờng bơh kâp ủy, gơnoar atbồ kung bè ală mpồl, gah broă lơh, mpồl bal tàm ƀòn lơgar.