VOV4.K'ho- Ồng Pyoh (deh nam 1959, ơm tàm ƀòn Pơ Chak, xã H’Ra, kơnhoàl Mang Yang, càr Gia Lai) pà gĭt, bơh bồ nam 2021 tus tŭ do, kòp Kovid-19 lơh rài kis bơh làng bol tàm ƀòn gơtìp gơ rềng uă ngan. Tơngai bơh chờm, làng bol ngòt rơngơ̆t mờ kơlôi sơnơng ngan. Mơya, kơnờm geh bơta mblàng yal bơh gơnoar at bồ tiah do dê, ngan là ală kwang bàng lơh sơnơm, làng bol neh geh uă bơta tam gơl tàm rài kis pah ngai mờ lơh sa nàng gơ dờp bal, gàr niam bơta ờdo ơdă tàm tơngai kòp. Tŭ do, broă pơn chèu glòm muh mat, lơh kloh khuẩn mờ ơm yah ngài neh hời rơ hời gơ gơs bơta mờng kwèng bơh să tờm ồng Pyoh mờ hìu bơnhă ồng dê. Ồng Pyoh pà gĭt: Kòp Kovid-19 sùm bơtờp, den kơ̆p kờñ tơl nă cau lơh jat niam broă lơh rcang sơndră kòp bè pơn chèu glòm muh mat nàng sền gàr să jan kung bè tơl nă cau. Geh pràn kơl dang să jan den lơh broă lơh hơ̆ sồng geh cồng nha. Ưn ngài Đảng, Dà lơgar sền gròi, lam cĭt sơnơm vaccine rcang sơndră kòp, pà chèu glòm muh mat ai làng bol in. Añ geh lơh ngan lơh jat mờ hòi jà  hìu bơnhă, làng bol tàm ƀòn lơh jat niam, nàng kòp ờ bơtờp uă, nàng tơl nă cau in sùm pràn kơl dang.

Bi Rơ Chăm Thuân ơm tàm ƀòn Mơ Nông Yố 1, xã Ia Ka, kơnhoàl Chư Păh geh 5 sàu kòi sre mờ 1 lồ kơphe. Tŭ kòp Kovid-19 bơtờp uă, bi mờ làng bol tàm ƀòn kung gam pal lơh mìr nàng kơlôi rơcang tàm rài kis. Ờ geh priă den tàng suơn kơphe hìu bơnhă bi dê ờ geh bơcri priă tơl niam den tàng cồng nha tơnhàu ờ uă. Tàm nam 2022, tŭ kòp bơtờp neh gơtùi sền gròi, làng bol geh tơrgùm lơh broă, lơh sa nàng tơnguh priă jền lơh geh: Tàm 2 nam kòp bơtờp den làng bol kung gam lơh mìr sùm, ờ gơtùi lơh broă ndai, rài kis kal ke ngan, tềng lơi kung bè hơ̆ lơm gơ dê. Tàm nam 2022 den kòp bơtờp kung neh hời rơhời ờ huan kal ke tai den tàng làng bol bol hi geh bơta ƀuơn nàng lơh sa, lòt tiah ndai nàng lơh broă jòi priă, bol hi kung geh nhơl ñŏ lơh prài bồ tơngoh bè geh dròng cing, jañ mồng, bè hơ̆ den tàng bol hi kung gŏ gơ lơh chờ gờp chờ hờn rlau”.

Tơngai pa do kòp Kovid-19 gơlik geh kal ke, gơrềng tus tơl gah tàm rài kis lơh broă sa bơh làng bol dê, jơh bal tàm tiah sar lơgar ngài, tiah làng bol kòn cau dùl ết nă cau bơh càr Kon Tum dê. Tềng đap bơta do, gơnoar atbồ mờ gah lơh sơnơm càr dê neh geh uă broă lơh di tŭ nàng rcang sơndră kòp, bè ờs wơl rài kis mờ bơtàu tơnguh wơl lơh sa. Ồng A Bông, ƀòn Kon Leng, thị trấn Măng Đen, kơnhoàl Kon Plông pin dờn tàm ală broă lơh rcang sơndră kòp Kovid-19 mờ bơtàu tơnguh wơl lơh sa bơh gơnoar atbồ mờ gah lơh sơnơm tiah do dê. Ồng A Bông đơs: Tơngai pa do, tài bơh kòp gơlik geh kal ke, lơh bơtờp kòp uă tàm mpồl bơtiàn den nùs nhơm làng bol dê cau lơi kung rơngòt lơm. Mơya, kơnờm geh Đảng, Dà lơgar sền gròi, gah lơh sơnơm dong kờl tơngai pa do kòp neh geh kơryan, làng bol iang nùs bơtàu tơnguh lơh sa. Añ pin dờn ngan tàm bơta đơng lam bơh Đảng, Dà lơgar, bơta dong kờl bơh gah lơh sơnơm  bal mờ bơta dùl nùs bal bơh gùt làng bol dê tàm rài tơnơ̆ do kòp geh kơryan jơh tơn. Tŭ do, jơh ală kơnhoàl tàm ù tiah càr Kon Tum kòp gơlơh bè ờ gam tai, làng bol chờ hờp ngan, iang nùs lơh broă sa.

Tơnơ̆ mờr 3 nam gơtìp uă kal ke tài gơ rềng bơh kòp bơtờp dê, kông ty TNHH Êđê Kơphe bơh bi Y Pôt Niê dê, ơm tàm ƀòn Kla, xã Drai Sap, kơnhoàl Krông Ana, càr Dăk Lăk kung gam lơh ngan gàr sùm mờ gàr kơ̆ kơljap broă lơh sa, kă bro. Mờ uă gah mblàng yal jơnau krơi is, ngui ală bơta kuơ tàm măi mok sồ nàng yal tơnggit mờ tac tus 2, 3 lơgar bè Nhờk, Hàn Quôk, Singapore. Bi Y Pôt Niê yal, bal mờ ală broă lơh gàr sùm broă lơh sa, tơngai do, kông ty kung rơcang lài dan rơndap broă bơh gơnoar atbồ tàm ƀòn lơgar dê nàng dong kờl làng bol tam pa wơl bă kơphe neh kra, cồng nha tơnhàu ờ huan uă nàng kờñ tơnguh khà lơh geh mờ bơta niam bơh kơphe neh gơs phan kă bro bơh kông ty dê, bơh hơ̆ pơgồp bơnah tơnguh priă jền lơh geh ai làng bol in:

Bulah lòt gan uă tŭ tơngai kal ke tài gơ rềng bơh kòp bơtờp dê, mơya tơngai do den kông ty Êđê kơphe gam lơh ngan pơgồp bal dong kờl làng bol tam pa wơl kơphe, dus sang ală bă kơphe neh kra nàng tam sơntìl pa ai cồng nha tơnhàu niam rlau, mờ kung dong kờl phơng sih, tờm sầu riêng nàng tam bơrlŭ tàm ală suơn kơphe ai làng bol in”.

Tàm Lâm Đồng, lơh jat broă gơdờp bal ờdo ờdă, nhap nhar, gròi sền geh cồng nha kòp Kovid-19, tơl broă lơh bơtàu tơnguh lơh sa- mpồl bơtiàn bơh càr dê neh bè ờs wơl. Tàm hơ̆, bơdìh mờ broă lơh nhơl chờ mờ ală broă drơng ala, bơta lơh sa suơn sre bơh cau lơh broă sa dê neh sơr băc mhar gơ dờp bal, cau lơh broă sa pơn jat tai bơcri priă, pờ ơnàng lơh broă sa, tơnguh uă cồng nha lơh broă sa. Jat ồng Da Guot Vinh, Củ tịc Mpồl cau lơh broă sa càr Lâm Đồng yal: neh geh cồng nha do là kơnờm geh bơta lơh ngan jơh nùs uă bơh Cíñ phủ tàm broă dong lơh jat jơnau kờñ dơ̆ lĕ bal hơ̆ là, bơtàu tơnguh lơh sa mờ kung lơh niam broă lơh rcang sơndră kòp, gờñ lơh wơl bơta bè ờs pa. Ồng Da Guot Vinh đơs nền: Bơta kòp Kovid-19 càr dê neh gơmù uă ngan, den tàng hơ̆ broă lơh bơh cau lơh broă sa tàm càr dê gơ lơh bè ndrờm rê wơl bè ờs. Ờ gam rơngòt halà pal kong mờ bơta ờ kơljap bè tăc phan bơna bè lài tai. Tŭ do, broă lơh sa bơh làng bol cau lơh broă sa sê gam geh ală kấp, ngàñ sền gròi mờ dong kờl jat di broă rơndap lơh. Mpồl cau lơh broă sa càr dê kung neh lam lơh ală broă lơh dong kờl, hòi jà cau lơh broă sa tơnguh lơh broă sa, tơnguh uă bơta niam mờ priă lơh geh bơh phan bơna lơh sa suơn sre dê.

Cau mblàng K’Hạnh mờ K’ Duẩn