VOV4.K’ho- Bal mờ jơh gùt lơgar, ngai 05/09, ală càr tàm tiah Tây Nguyên hô hơng ngai sơnđờm mut nam bơsram pa, ală tiah lơh ngan bơsong ală bơta kal ke, gàr niam phan bơna mờ cồng nha bơto bơtê bơh bồ nam bơsram tơn.

Kơnòm bơsram tiah sar lơgar ngàib Dăk Rmăng, càr Dăk Nông hô hơng ngai lòt bơsram

Tàm Dăk Nông, rlau 184 rơbô nă kơnòm bơsram ală kấp neh mŭt tàm ngai chờ lòt bơsram, sơnđờm mŭt nam bơsram pa 2022-2023. Nam bơsram do, jơh gùt càr Dăk Nông geh 368 hìu bơsram, mờ 184 rơbô 135 nă kơnòm bơsram, gơguh 8 rơbô 508 nă kơnòm bơsram pơndrờm mờ nam bơsram lài. Rcang ai nam bơsram pa, bơh ală khà priă bơcri, càr Dăk Nông neh bơcri priă mờr 330 tơlak đong bơt bơtàu, lơh niam wơl hìu bơsram, ơdŭ bơsram mờ blơi ală phan bơna măy mok bơto bơsram. Gah bơto bơtê kung lơh jat ală bơnah broă blơi sră giáo khoa, sră cih pà ai kơnòm bơsram làng bol kòn cau dùl ết nă cau in; bơtơl phan bơna măy mok bơto bơsram drơng broă lơh bơto bơtê phổ thông pa, phan bơna măy mok dong kờl bơsram pờ tơlik tơn tàm internet mờ priă tă rlau 67 tơmàn đong. Nam bơsram do, bulah neh bơtơl 115 biên cế cau pơgru mơya jơh gùt càr Dăk Nông kung gam ờ tơl 966 nă cau pơgru tàm jơh ală kấp bơsram. Ală tiah neh pal lam lơh jat broă rơndap lơh tàm ntrờn cau pơgru mờ bơto bơtê cau pơgru kấp dùl (bơto môn bal) gơtùi bơto jơh bal ală môn giáo dục thể chất, kông nghệ. Ală hìu bơsram ai tơl ală bơta ai cau pơgru, cau bơsram geh văn bằng 2 sư phạm in bè gah bơto jơnau đơs dà Mỹ, Tin họk ai bơto tàm kấp dùl in...

Dơ̆ mut nam bơsram pa tàm Hìu bơsram kâp 3 kòn cau ơm wơl Nơ Trang Lơng

Tàm càr Dăk Lăk, ală hìu bơsram dùl ròt bơyai lơh Dơ̆ sơn đờm mut nam bơsram pa 2022- 2023. Nam bơsram do, jơh gùt càr geh rlau 450 rbô nă kơnòm bơsram ală kâp bơsram, tàm hơ̆ kơnòm bơsram jơi bơtiàn kòn cau dùl êt nă cau geh rlau 56%. Jat ồng Phạm Đăng Khoa, Kwang atbồ Sở Giáo zụk mờ Đào tạo càr Dăk Lăk yal, nam bơsram do, gùt càr geh rlau 1 rbô hìu bơsram mờ rlau 450 rbô nă kơnòm bơsram tàm ală kâp bơsram. Dơ̆ mut nam bơsram pa 2022- 2023, tàm ală hìu bơsram bơh tiah tờm tus ală tiah sar lơgar ngài, tiah jơi bơtiàn kòn cau dùl êt nă cau neh geh lơh lơyah, sơrbac mhar, geh kuơ mờ lơh gơlik nùs nhơm chờ hờp ai cau pơgru mờ kơnòm bơsram càr Dăk Lăk in tàm nam bơsram pa. Tàm dơ̆ bơyai lơh mut nam bơsram pa 2022- 2023 bơh hìu bơsram kâp 3 kòn cau ơm wơl Nơ Trang Lơng, ƀòn dờng Buôn Ma Thuột, càr Dăk Lăk dê, ồng Bùi Xuân Lễ, Kwang atbồ hìu bơsram pà git, mờ kơnòl broă tờm là tơnguh cồng nha bơto bơsram bal mờ bơto bơsram tờm, cau pơgru mờ hìu bơsram kâp 3 kòn cau ơm wơl Nơ Trang Lơng pơn jat tai tơnguh broă lơh tam gơl pa broă bơto bơtê mờ bơsram.

Kơnòm bơsram tàm kơnhoàl tiah nhàr lơgar Ea Súp chờ hờp mŭt nam bơsram pa 2022-2023

17 rơbô 500 nă kơnòm bơsram tàm kơnhoàl tiah sar lơgar ngai Ea Súp càr Dăk Lăk neh mŭt tàm nam bơsram pa 2022-2023 tàm nùs nhơm chờ hờp chờ hờñ, trồ tiah lơngờm mrềt ngai sơđờm mŭt nam bơsram pa. Ờ ndrờm bè nam bơsram lài tŭ kòp Kovid-19 bơtờp uă, kơnòm bơsram pal tus bal ngai sơnđờm mut nam bơsram pa online, nam do, cau pơgru mờ kơnòm bơsram tus bal ngai sơnđờm mut nam bơsram pa tơn tàm ală hìu bơsram mờ  nùs nhơm chờ hờp, chờ hờñ. Nàng rcang ai nam bơsram pa in, kơnhoàl tiah nhàr lơgar Ea Súp neh bơcri priă rlau 5 tơmàn 200 tơlak đong lơh ală phan bơna, blơi phan bơna măy mok bơto bơsram. Rlau 1 rơbô 200 nă cau pơgru neh tus bal ală ơdŭ bơto bơtê tơnguh uă bơta gĭt wă broă lơh bơto bơtê nàng kờñ gàr niam broă bơto bơsram.

Rlau 330 rbô nă kơnòm bơsram ală kâp bơsram tàm càr Lâm Đồng chờ hờp mut tàm nam bơsram pa

Nam bơsram pa 2022- 2023, càr Lâm Đồng geh rlau 330 rbô nă kơnòm bơsram ală kâp. Nàng gàr niam broă lơh bơto bơtê mờ bơsram in geh cồng nha niam, gah bơto bơsram càr Lâm Đồng neh lơh gơs broă bơto pơlam ai mpồl cau pơgru jat broă lơh bơto bơsram phổ thông pa tàm ală ơdŭ 3, 7 mờ 10. Bơh priă bơcri dà lơgar 600 tơmàn đông neh geh càr ai lài, gah bơto bơsram càr Lâm Đồng neh sơrbac mhar lam lơh 2 rơndap broă lơh pa, lam lơh gơtùi 26 rơndap broă lơh tàm pơn jat tai mờ 24 rơndap broă lơh gơs. Kuơmàng, di tŭ lơh niam wơl 19 hìu bơsram mờ khà priă 35 tơmàn đông, ai rlau 120 tơmàn đông blơi phan bơna, măi mok bơto bơtê mờ bơsram, bơh sơn rờp gàr tơl ală bơta pal geh drơng jơnau kờñ bơto bơtê mờ bơsram ai nam bơsram pa in, kờp bal tàm ală hìu bơsram tàm tiah sar lơgar ngài, tiah jơi bơtiàn kòn cau dùl êt nă cau. Bơdìh mờ broă gàr niam ală bơta nàng bơto bơsram, gah bơto bơsram càr Lâm Đồng kung gam jơh nùs pơgồp bal mờ gah lơh sơnơm càr tơnguh mhar broă cit sơnơm vaccine kơryan kờp Kovid-19 ai kơnòm bơsram in jat di jơnau sồr.

Nam bơsram 2022- 2023, càr Gia Lai geh 762 hìu bơsram bal mờ rlau 400 rbô nă kơnòm bơsram tàm ală kâp bơsram. Dơ̆ mut nam bơsram pa geh ală hìu bơsram lam lơh lơyah, sơrbac mhar, yŭ rơyùm bal mờ ală broă lơh niam chài đơs crih tamya neh lơh gơlik nùs nhơm chờ hờp bơh ngai chờ lòt bơsram wơl tơnơ̆ dùl nam kal ke tài gơ rềng bơh kòp Kovid-19.

Cau mblàng K’Hạnh mờ K’Duẩn