Ồng Y Luyện Niê Kdăm, cau ala mat Quôk hội khoă X, lài do là Ƀí thư Tỉñ ủy càr Dăk Lăk yal, là cau geh uă tam gơl pa pràn ngan, ală broă lơh bơh Tổng Ƀí thư ồng Nguyễn Phú Trọng dê ndrờm geh làng bol đòm, làng bol kờñ, làng bol ki ngàm: “Tổng Ƀí thư ồng Nguyễn Phú Trọng sang rài là roh dùl nă cau jak chài bơh Đảng, dà lơgar mờ làng bol dê. Tổng Ƀí thư neh lòt còp càr Dăk Lăk, ồng sền gròi ngan tus làng bol jơi bơtiàn dồ êt nă cau, rài kis mpồl bơtiàn, rài kis làng bol dê, hơ̆ là bơta sền gròi dờng ngan rlau jơh”.

Kah sùm jơnau nting tơngkah bơh Tổng Ƀí thư ồng Nguyễn Phú Trọng dê tàm Pơrjum dờng cau ala mat gùt lơgar Đoàn Ơruh pơnu Kộng sản Hồ Chí Minh dơ̆ XII, bi H’Hương Bkrông, Ƀí thư Thàñ đoàn ƀòn dờng Buôn Ma Thuột, càr Dăk Lăk ai hơ̆ lơh bơta gơn kơnờm nàng pơlam tàp is să tờm he dê. Kuơmàng là lam lài tàm broă bơto bơtê, tơnguh niam nùs nhơm kac màng; lam lài tàm bơsram sră, tàm pơlam tàp, tàm lơh broă lơh sa, bơceh lơh; lam lài tàm broă lam lơh kơnòl cíñ trị: “Hơ̆ là bơta gơn kơnờm nàng añ in pơn jat tai bơsram mờ lơh jat krơh niam nùs nhơm, niam chài rài kis Hồ Chí Minh mờ să tờm wa Tổng Ƀí thư. Bơsram tàm wa bơta pơn dềt să, nùs nhơm niam, tàp bơta tryăng tryồng, tềm pềr, sàng goh, dòn song, drơng broă dà lơgar ờ kơlôi is să tờm in. Pơn jat tai bơsram tàp bơta kơp kờñ kis niam, ờ ngòt bòl glar, ờ ngòt kal ke mờ pơn đơl pràn lơh ngan nàng lơh geh nùs nhơm cíñ trị kơ̆ dơn, geh nùs nhơm sàng goh, bồ tơngoh ngac ngar, geh bơta kơp kờñ dờng”.

Tàm dơ̆ lòt còp, lơh broă tàm càr Kon Tum tàm nhai 4 nam 2011, Tổng Ƀí thư, Củ tịc Quôk hội, ồng Nguyễn Phú Trọng neh lời tŭ tơngai lòt còp làng bol kòn cau Bahnar tàm ƀòn Đăk Mút, xã Đăk Mar, kơnhoàl Đăk Hà. Tàm do, Tổng Ƀí thư lùp bè rài kis, iat bơta kơp kờñ mờ tơngkah làng bol đòm jat nùs nhơm tam klac bal, bơceh lơh tàm lơh broă lơh sa.

Tơnơ̆ 13 nam Tổng Ƀí thư, Củ tịc Quôk hội ồng Nguyễn Phú Trọng lòt còp, tŭ do neh geh bơta tam gơl pràn ngan tàm lơh broă lơh sa mờ rài kis làng bol thôn Đăk Mút, xã Đăk Mar, kơnhoàl Đăk Hà, càr Kon Tum dê. Tŭ Tổng Ƀí thư lòt còp, ồng A Khiếu gam là cau atbồ thôn, den tàng ồng gam kah bè ờs dơ̆ tơm boh bơr bơh Tổng Ƀí thư dê mờ làng bol tàm ƀòn: “Tổng Ƀí thư tơngkah làng bol sùm tam klac bal, dong kờl bal mờ gơp, bal mờ gơp bơtàu tơnguh lơh sa hìu bơnhă. Tŭ do hìu bơnhă lơi tàm ƀòn kung bơtàu tơnguh lơh sa niam, geh tờm kơphe geh sơngka sền gàr di bơta chài, lơh geh cồng nha uă. Klo yal Tổng Ƀí thư sang rài, làng bol cau lơi kung moat jrùm mờ bal mờ gơp lời tŭ jơ kah kơlôi tus Wa, ai tơnggŏ nùs nhơm kah ưn ngài Wa Tổng Ƀí thư neh bơto bơtê làng bol in bơta chài lơh sa. Làng bol kơp kờñ Wa sang rài ờ gam bơta lơi pal kơlôi rơcang”.

Ồng Lê Xuân Hưng, Ƀí thư Đảng ủy xã Đăk Mar pà git, 13 nam jơh lơh ngan tam gơl pa, thôn Đăk Mút neh bơt bơtàu gơtùi ƀòn lơgar pa. Sùm uă nam, thôn geh ală kâp pà khà jờng bè cồng nha tàm uă broă. Dơ̆ lòt còp bơh Tổng Ƀí thư, Củ tịc Quôk hội ồng Nguyễn Phú Trọng dê tŭ hơ̆ là bơta gơn kơnờm nùs nhơm kuơmàng ngan dong kwang bàng, đảng viên bal mờ làng bol tàm xã tam klac lơh ngan lơh gơs ală jơnau kờñ ai tơlik: “Tus nam 2014, xã Đăk Mar bol hi tơl khà ƀòn lơgar pa. Bơh hơ̆ tus tŭ do lơh jat jơnau nting tơngkah, jơnau sồr lơh bơh Tổng Ƀí thư dê, làng bol, jơh gùt kwang bàng, đảng viên lam lơh broă bơtàu tơnguh lơh sa, niam chài, mpồl bơtiàn, kuơmàng là tam gơl chi tam, phan ròng. Tus tŭ do, bol hi neh lơh geh priă jền kờp bal dùl nă cau là 56 tơlak đông. Nam 2022, xã Đăk Mar bol hi tơl khà xã ƀòn lơgar pa gơguh jơnhua mờ bol hi kung gam bơt bơtàu xã tơl khà ƀòn lơgar pa lơh lài tàm nam 2025”.

Gơ wèt mờ làng bol ală jơi bơtiàn tàm xã Ayun, kơnhoàl Chư Sê, càr Gia Lai, Tổng Ƀí thư ồng Nguyễn Phú Trọng ờ mìng là kwang đơng lam bồ jơh rài kis tài dà lơgar, tài làng bol, mờ gam là cau neh jàu pà làng bol in rài kis hờm ram. Tàm dơ̆ lòt lơh broă tàm càr Gia Lai tàm nhai 4 nam 2017, Tổng Ƀí thư ồng Nguyễn Phú Trọng neh lòt còp xã Ayun – dùl xã uă kal ke tàm kơnhoàl Chư Sê. Iat bơta kơp kờñ bơh làng bol dê kờñ geh bơtơt rbòng dà nàng lơh sa suơn sre, Tổng Ƀí thư ồng Nguyễn Phú Trọng neh sồr xã tơrgùm priă jền, mhar lơh rbòng dà Plei Keo. Bàr nam tơnơ̆, bơtơt rbòng dà Plei Keo lơh gơs neh jun hiòng dà bơh Ayun rê tàm ƀlàng sre, cèng wơl bơta hờm ram làng bol in. Ồng Đinh A Nhur, 73 sơnam ơm tàm ƀòn Achông, xã Ayun yal: “Tŭ Tổng Ƀí thư ồng Nguyễn Phú Trọng lòt còp, he chờ hờp ngan, tài git là neh geh dà. Tŭ do dà bơh dà dờng Ayun geh rê hờ àr, guh hờ bơnơm, lài hơ̆ mbè gơtùi geh. Chờ hờp ngan, dùl nam lơh bơh 2 tus 3 kàl den tàng làng bol ờ gơtìp jơgloh tai”.

Geh rbòng dà Plei Keo, làng bol xã Ayun neh sih tam rlau 300 lồ kòi 2 kàl, gàr niam rài kis. Ồng Đinh Miơch, kra ƀòn ƀòn Achông đơs, kah ưn ngài ngan phan pà geh kuơ bơh Tổng Ƀí thư ồng Nguyễn Phú Trọng ai làng bol Ayun in: “Làng bol chờ hờp ngan tơnơ̆ tŭ Tổng Ƀí thư ồng Nguyễn Phú Trọng sồr lơh làng bol in rbòng dà rài kis làng bol dê neh bơtàu tơnguh niam. Bol hi rơp kah sùm bơta ai pà bơh Wa dê lời ai làng bol Ayun in tŭ do mờ jơh bal tơnơ̆ do tai”.

Bơh ală dơ̆ lòt ngan ngồn, git bơta geh ngan, iat bơta kơp kờñ dipal bơh làng bol ală jơi bơtiàn Tây Nguyên dê, Tổng Ƀí thư ồng Nguyễn Phú Trọng neh sồr gơnoar atbồ tàm ƀòn lơgar lam lơh ală broă dong kờl ai lài tiah jơi bơtiàn dồ êt nă cau in tàm Tây Nguyên. Bơh hơ̆ neh dong làng bol kòn cau tiah do ngai sơlơ geh rài kis hờm ram, gơboh gơbàI. Làng bol kah ưn ngài uă ngan Tổng Ƀí thư ồng Nguyễn Phú Trọng.