Ồng Đinh K’re, Ƀí thư Đảng ủy xã Kon Pne, kơnhoàl Kbang, càr Gia Lai pà gĭt: là xã tiah kal ke bơh kơnhoàl Kbang, càr Gia Lai dê, den tàng bè hơ̆, mờ gơnoar broă là cau lam bồ xã dê, să tờm ồng Đinh K’re sùm bơsram jat Wa Hồ tàm nùs nhơm lơh is lơh krơh niam. Là dồ nă đảng viên, ồng Đinh K’re ờ mìng dong kờl làng bol bơtàu tơnguh lơh sa lơm, mờ ồng gam jơh nùs mblàng yal hòi jà làng bol lơh jat niam gùng dà broă lơh bơh Đảng, adat boh lam bơh Dà lơgar dê mờ ală srơh tàm pơrlòng kờñ gơboh dà lơgar tus mờ làng bol tàm hìu bơnhă mờ jơi nòi. Jat ồng Đinh Kre, bơsram mờ lơh jat bồ tơngoh, nùs nhơm, broă lơh mờ rài kis Hồ Chí Minh dê sồr tơl kấp ủy, mpồl Đảng mờ đảng viên pal yờ tơnguh uă bơta gĭt wă, geh kơnòl lơh is tàm jơh 3 tơngume: bơsram jat Wa Hồ, lơh jat Wa Hồ mờ lơh krơh niam. Ồng Đinh K’re, đơs: “Añ gŏ broă bơsram mờ lơh jat Wa Hồ kung neh geh tơmut tàm rài kis làng bol dê, kung bè hòi jà làng bol sùm tam klăc bal. Să tờm ală kwang bàng, đảng viên neh lơh jat jơnau sồr Wa Hồ dê gĭt tam klăc bal, tềm pềr, sùm bơto pơlam làng bol in gĭt dong kờl bal mờ gơ̆p bơtàu tơnguh rài kis pa niam rlau tai”.

Jơh rài kis lơh broă kăc màng, Củ tịc Hồ Chí Minh sùm đơs tus broă lơh krơh niam tềng đăp làng bol bơh kwang bàng, đảng viên, lài ngan là lơh krơh niam bè bồ tơngoh, nùs nhơm, rài kis. Đảng viên K’Nam, lơh broă Mpồl hòi jà làng bol Huyện uỷ kơnhoàl Di Linh, càr Lâm Đồng pà gĭt, gĭt jrô uă ngan bơh bồ tơngoh hơ̆, tơngai pa do, bi mờ ală đảng viên ndai tàm mpồl lơh broă sùm lơh ngan bơsram mờ lơh jat jơnau sồr Wa Hồ dê tàm tơl broă lơh, ngan là tàm lơh jat lam lài lơh ală srơh tàm pơrlòng kờñ gơboh dà lơgar, srơh sơm bat tê bal bơt bơtàu ƀòn lơgar pa, tơnơ̆ hơ̆ hòi jà làng bol tàm ù tiah do dê lơh jat bal. Đảng viên K’Nam, đơs: “Pơgap mờ do 55 nam, hơ̆ là tàm nam 1969, lài mờ tŭ Wa sang rài, Củ tịc Hồ Chí Minh neh lời wơl ai jơh gùt Đảng, gùt làng bol, gùt ling klàng he dê in Jơnau lời wơl dờng màng. Do là sră nggal kah yau kwơ màng uă ngan, lơh geh bơh ală bơta niam nùs nhơm mờ nùs nhơm niam bơnĕ uă ngan, lơh geh gùng dà bơtàu tơnguh ai kăc màng Việt Nam tŭ do mờ rài tơnơ̆ do in. Gĭt loh uă ngan bơta hơ̆, să tờm añ kung bè ală kwang bàng, đảng viên tàm ù tiah do dê sùm pơnđơl pràn lơh ngan tàm broă lơh, sùm pơnđơl pràn lơh ngan bơsram mờ lơh jat krơh niam nùs nhơm bơh Wa Hồ dê”.

Ồng Điểu Mbrâng, kòn cau M’nông, là cau geh bơngă pin dờn tàm ƀòn Đắk R’Mon, xã Đắk R’Moan, ƀòn dờng Gia Nghĩa, càr Dăk Nông dê. Ồng Điểu Mbrâng pa chờ hờp ngan là dùl tàm 27 nă cau ala mat bơh ƀòn dờng Gia Nghĩa dê tus bal Pơrjum dờng Cau ala mat Mặt trận Dà lơgar Việt Nam càr Dăk Nông dơ̆ V, tơngai lơh broă bơh nam 2024-2029. 55 nam lơh jat jơnau lời wơl bơh Wa Hồ dê, ồng Điểu Mbrâng pà gĭt, làng bol ƀòn lơgar sùm cih kah jơnau bơto bơh Wa Hồ dê. Làng bol ƀòn lơgar sùm tam klăc bal, pin dờn tàm bơta đơng lam bơh Đảng, atbồ bơh gơnoar abồ dê. Làng bol kung jơh nùs lơh jat ală srơh tàm pơrlòng, ală dơ̆ hòi jà, ngan là dơ̆ hòi jà bơt bơtàu ƀòn lơgar pa. Uă hìu bơnhă neh pà is ù, pơgồp bal dà kơl hề ngai lơh broă nàng lơh ală broă lơh bơt bơtàu gùng lòt. Bơsram, lơh jat jơnau sồr Wa Hồ dê, làng bol ƀòn lơgar càr Dăk Nông sùm tam klăc bal, dồ nùs bal bơt bơtàu ƀòn lơgar, dà lơgar pas pràn. Ồng Điểu Mbrâng, pà gĭt:“Wa Hồ kung gam lời ai nùs nhơm jrô ơnàng uă ngan ai làng bol tàm tiah Tây Nguyên in mờ làng bol he dê kung sùm cih kah jơnau bơto sồr bơh Wa Hồ dê. Bơsram, lơh jat srơh Wa Hồ dê, làng bol pal sùm tam klăc bal, dồ nùs bal, pin dờn mờ jat Đảng, Dà lơgar. Làng bol ƀòn lơgar rơ̆p pơn đơl pràn lơh ngan lơh sa, bơt bơtàu ƀòn lơgar, dà lơgar ngai sơlơ pas niam”.

 Bi Ham, 35 sơnam, là dồ nă kwang bàng Mặt trận xã Chư Á, ƀòn dờng Pleiku, càr Gia Lai. Uă nam do, bi sùm bơsram mờ lơh jat bồ tơngoh, nùs nhơm Hồ Chí Minh dê, sùm ai bơta kwơ bơh làng bol dê lơh lài ngan rlau jơh. Mờ nùs nhơm geh kơnòl uă, bi jơh nùs hòi jà, mblàng yal làng bol pin dờn tàm gùng dà broă lơh bơh Đảng mờ Dà lơgar dê. Bi sùm tìp mat, tam pà bal, hơ jơnau lùp bơh làng bol dê mờ pơn jờng làng bol tus bal pà is ù lơh gùng, lơh jat ală broă jàu ƀòn lơgar pa. Kơnờm bè hơ̆, bi neh pơgồp bơnah yờ tơnguh uă bơta gĭt wă, tam klăc bal mpồl bơtiàn tàm tiah do. Mờ bi kung geh làng bol kờñ gơboh, sền dờng màng mờ là krơh niam tàm srơh bơsram mờ lơh jat bồ tơngoh Hồ Chí Minh dê tàm tiah do. Bi pà gĭt: “Añ sùm pơndờm pơnđiang tơl nă cau lơh ală bơta niam bơnĕ, gĭt dong kờl bal mờ gơ̆p, mờ ờ gŏ di iăt ală jơnau bơchồc bơh cau ờ niam dê. Tàm ală ngai lơh chờ dà lơgar, añ sùm tơngkah làng bol pal yồng bồng bi nàng tơngŏ nùs nhơm kờñ gơboh dà lơgar mờ gĭt ưn ngài ală cau ling khin cha jak chài neh chơ̆t phi să nàng sền gàr lơngăp lơngai is, khat gơboh, nàng bol he in geh rài kis hờm ram, hờn chờ bè tŭ do”.

Bơh nùs nhơm ki ngàm mờ kờñ gơboh Wa Hồ, geh bơtơl tai bơh nùs nhơm sơr lèt gan kal ke bơh tiah ƀòn lơgar geh uă bơhiàn kăc màng dê, bi A Lấu 38 sơnam, kòn cau Sơdàng, ơm tàm xã Măng Bút, kơnhoàl Kon Plông, càr Kon Tum ờ rơngòt gùng lòt ngài ngan mờ rài kis kal ke bơh hìu bơnhă he dê tơryang tơryồng ngan bơsram sră. Tŭ do, bi là kwang bàng lơh broă gah ù tiah xã Măng Cành, kơnhoàl Kon Plông dê. Bi A Lấu đơs nền, mìng geh Đảng, geh Wa Hồ hơ̆ sồng cèng wơl hờm ram, gùng lòt ƀuơn ngan, cèng broă lơh sơnơm, bơto bơtê... tus mờ kòn cau Sơdàng tàm xã Măng Bút in. Den tàng bè hơ̆ geh lơh broă, tă pơgồp dà kơl hề pơgồp bơnah bơt bơtàu ƀòn lơgar, bi A Lấu sùm pơnđơl pràn lơh ngan, lơh ngan tàm broă lơh ờs mờng, mơkung jơh nùs, bơsram is mờ lơh jat krơh niam Wa Hồ dê. Bi A Lấu đơs: “Lơh jat dơ̆ hòi jà “Bơsram mờ lơh jat bồ tơngoh, nùs nhơm, rài kis mờ broă lơh Hồ Chí Minh dê” kwang bàng xã, thôn mờ jơh ală làng bol ndrờm lơh jat niam ngan. Pah nam, tàm tiah do geh lam lơh broă bơsram đơs dà kòn cau he dê nàng dong làng bol in ƀuơn iăt, ƀuôn wă bè tơngume bơh dơ̆ hòi jà dê. Rài kis làng bol tàm tiah do uă ngan kơnờm tàm broă lơh sa lơm, kơnòl bơh kwang bàng bol añ dê là bơto pơlam, hòi jà làng bol tam klăc bal, pin dờn tàm gùng dà broă lơh bơh Đảng, lơh jat jơnau bơto sồr bơh Wa Hồ dê, làng bol geh lùp bơsram tai uă bơta pa, gĭt wă bè bơta chài lơh broă nàng bơtàu tơnguh lơh sa hìu bơnhă”.

 Là tiah pôs đồng kăc màng tàm rài tam lơh tam dră mờ cau sò tơm Mỹ thàm phà dà lơgar, ƀòn Pa, xã Cư Prao, kơnhoàl M’Drăk, càr Dăk Lăk neh tam gơl pa uă ngan, rài kis làng bol jơi bơtiàn neh tam gơl mờ bơtàu tơnguh. Tàm ƀòn tŭ do geh mờr 200 hìu bơnhă, rlau 800 nă cau, ală hìu bơnhă ndrờm neh geh tivi, rơndeh măi, điện thoại ngăc ngar; geh ngui gùng che ồs đèng dà lơgar, jơh ală oh kòn tàm ƀòn ndrờm lòt bơsram lơm. Ƀòn Pa pa geh bơcri priă lơh niam wơl 6 gơl gùng lòt mờ kờp jơh bơta jòng rlau 6 kơi sồ, geh 1,2 kơi sồ broă lơh “Sòl àng gùng ƀòn lơgar” bơh Tỉñ đoàn càr Dăk Lăk pơgồp bal mờ Đoàn kấp hơđơm kông ty Ồs đèng Dăk Lăk dê lơh. Ồng Y Tuân Ksơr, Ƀí thư Ci ƀộ ƀòn Pa pà gĭt:“Lài do làng bol kal ke ngan, bơh gùng che ồs đèng, gùng lòt. Tŭ do kơnờm ală gùng dà broă lơh bơh Dà lơgar dê, ƀòn lơgar neh geh gùng che ồs đèng, gùng lòt, hìu sơnơm, hìu bơsram, ƀòn lơgar hời rơ hời bơtàu tơnguh. Làng bol pin dờn, iăt mờ lơh jat jơnau Wa Hồ dê bơto, lơh jat niam ală jơnau sồr adat boh lam bơh Đảng mờ Dà lơgar dê”.