VOV4.K’ho- Tiah Tây Nguyên gam ơm tềng đăp bơta gơn kơnờm bơtàu tơnguh mhar, bal mờ 4 tàm 5 càr digơlan geh ală gơl gùng rơndeh ntoăt răt tàm tơngai tus. Tŭ do, Gơnoar ătbồ ală càr gam jơh nùs pơgồp bal mờ ală ƀộ, ngàñ geh gơrềng nàng lơh mhar tŭ tơngai lơh ală rơndăp broă lơh. Mpồl lơh sa kă bro mờ làng bol tàm tiah do kung gam geh uă bơta gơn kơnờm bè bơta bơtàu tơnguh pràn bơh ală gơl gùng rơndeh ntoăt răt do dê.

Tềng đăp jơnau sồr jal mhar ngan bơh Rơndăp broă lơh gùng rơndeh ntoăt răt Khánh Hoà- Buôn Ma Thuột dê gơwèt mờ ală broă lơh bơtàu tơnguh lơh sa- mpồl bơtiàn, nhai 07 pa do, Duh broă sùm Hội đồng Ñân zân càr Khánh Hoà neh bơyai lơh pơrjum tơngume, mờ ring bal Kơrnoăt bè hơ tam pà priă jền bơcri priă dà lơgar dê tơngai bơh nam 2021- 2025, bơh kes priă càr dê kờp dŭ mờr 350 tơmàn đong nàng lơh bal rơndăp broă lơh do. Ồng Trần Mạnh Dũng, Phó Củ tịc Hội đồng Ñân zân càr Khánh Hoà, pà gĭt: Do là broă lơh tờm kwơmàng ngan, dong kờl ai bơta bơtàu tơnguh lơh sa- mpồl bơtiàn bơh 2 càr Dăk Lăk mờ Khánh Hoà dê in. Kwơmàng là coă bồ bơta bơtàu tơnguh bơh Tiah lơh sa Vân Phong, anih ơhò ơm Vân Phong dê drơng ai broă tăc mờ lơgar ndai uă ngan phan bơna kă bro lơh geh bơh sươn sre bơh càr Dăk Lăk dê. Cíñ phủ mờ Quôk hội kung neh geh bơta sền gròi, kơnòl broă bơh càr dê là ai tơl priă bal mờ Dà lơgar. Kơnòl bơh Hội đồng Ñân zân bal mờ Ủy ƀan Ñân zân dê pal rơcăng lơh.

Thủ tướng ồng Phạm Minh Chính lòt sền gơl gùng rơndeh ntoăt răt Khánh Hoà- Buôn Ma Thuột

Rơndăp broă lơh gùng rơndeh ntoăt răt Khánh Hoà- Buôn Ma Thuột là dùl tàm ală rơndăp broă lơh kwơmàng bơh dà lơgar dê geh Cíñ phủ dan mờ Quôk hội lơh nền jơnau dan bơcri priă jăt broă lơh bơcri priă dà lơgar dê. Kờp jơh gùng jòng pơgăp 117 kơi sồ mờ ơnàng gùng 4 bơnàng rơndeh lòt mờ digơlan geh sơnđờm mŭt lơh bơh nam 2023, bơh sơnrờp geh lơh gơs tàm nam 2025. Rơndăp broă lơh lòt gan càr Khánh Hoà geh pơgồp bơnah dong càr gờñ bơtàu tơnguh wơl, bơtàu tơnguh lơh sa- mpồl bơtiàn; lơh gơlik bơta gơn kơnờm lơh bal, dong kờl lơh broă bal đah Khánh Hoà mờ ală càr tàm tiah Tây Nguyên.

Đah tiah đah jum Tây Nguyên, càr Lâm Đồng neh rơcăng wil tơl ală bơta pal geh, rơcăng sơnđờm lơh gơl gùng rơndeh ntoăt răt Tân Phú- Bảo Lộc mờ Bảo Lộc- Liang Khàng tŭ Thủ tướng Cíñ phủ kĭ jơnau dan bơcri priă tơn. Gơl gùng rơndeh ntoăt răt Dầu Giây- Liang Khàng geh bơta jòng kờp jơh pơgăp 200 kơi sồ, geh tam pà lơh 3 rơndăp broă lơh bơnah, tàm hơ̆ geh: Dầu Giây- Tân Phú, Tân Phú- Bảo Lộc mờ Bảo Lộc- Liang Khàng. Ồng Trần Văn Hiệp, Củ tịc Ủy ƀan Ñân zân càr Lâm Đồng pà gĭt, càr geh ai 15 rbô 300 tơmàn đong ai 2 rơndăp broă lơh gùng rơndeh ntoăt răt in tàm càr, là gơl gùng Tân Phú- Bảo Lộc mờ Bảo Lộc- Liang Khàng. Ồng Trần Văn Hiệp, Củ tịc Ủy ƀan Ñân dân càr Lâm Đồng yal: Gùng rơndeh ntoăt răt geh ai rơndeh in lòt dilah gờñ den là tàm lồi nam 2025, dilah jơla den tus tàm nhai 6 nam 2026. Añ đơs ngan là gơ geh rơndăp mòn geh rài tơnơ̆ do bơtàu tơnguh bơh càr Lâm Đồng dê, tam gơl tơl jơh muh mat càr Lâm Đồng dê. Bơh ndo, lòt ƀòn dờng Hồ Chí Minh roh bơh 8 tus 9 jiơ, ngai lơh chờ den roh bơh 10 tus 12 jiơ geh tơn rŭc lơyah gam bơh 3 tus 3 jiơ nggùl lơm, mờ jŏ ngan rlau jơh kung là jơh 4 jiơ gời lơm. Broă jun pơndiang biăp, bơkàu, phan lơh geh bơh sươn sre tus ƀòn dờng Hồ Chí Minh ƀươn ngan, hơ̆ sồng jun pơndiang phan ngui bơ̆t bơtàu, măy mok, phan bơna...kung mhar mờ ƀươn rlau tai.

Sră sềr rùp ù tiah đah gơl gùng rơndeh ntoăt răt Dầu Giây- Tân Phú- Bảo Lộc- Liang Khàng

Ndrờm bè hơ̆ sơl, ngai 17/08 pa do, Ủy ƀan Ñân zân càr Dăk Nông mờ Ủy ƀan Ñân zân càr Bình Phước neh geh dơ̆ lơh broă mờ Tập đoàn Vingroup mờ Ngân hàng Kă bro Kổ phần Kỹ thương Việt Nam bè rơndăp broă lơh bơcri priă lơh gùng rơndeh ntoăt răt đah Tô- đah Jum tiah đah mat tơngai Mŭt gơl gùng bơh Gia Nghĩa tus Chơn Thành, mờ kờp jơh gùng jòng digơlan pơgăp 130 kơi sồ. Tàm dơ̆ lơh broă, kwang đơng lam bồ ală sở, ngàñ mờ ală càr tiah rơndăp broă lơh gơl gùng rơndeh ntoăt răt lòt gan ndrờm đơs nền bơta kwơmàng bơh gơl gùng rơndeh ntoăt răt Dăk Nông- Chơn Thành dê. Bơta do geh lơh geh ù tiah bơtàu tơnguh ai 2 càr in, lơh geh bơta kơ̆p kờñ ngan bơh làng bol 2 càr dê. Đơs tàm dơ̆ lơh broă, Củ tịc Ủy ƀan Ñân zân càr Dăk Nông ồng Hồ Văn Mười đơs nền lòt bal mờ càr Bình Phước tàm ală tŭ lơh rơndăp broă lơh gơl gùng do. Broă lơh gơl gùng rơndeh ntoăt răt do nàng kờñ lơh gơlik bơta gơn kơnờm bơtàu tơnguh lơh sa- mpồl bơtiàn bơh càr Dăk Nông dê đơs is mờ Tây Nguyên dê đơs bal.

Ai đah tiah đah tô Tây Nguyên, pa do, Ủy ƀan Ñân zân càr Gia Lai kung neh geh sră nggal jàu Sở Giao thông- Vận tải càr in pơgồp bal mờ bàr pe anih lam lơh kơlôi sơnơng gùng dà bơcri priă, lơh sră nggal dan lơh Rơndăp broă lơh gùng rơndeh ntoăt răt Pleiku- Quy Nhơn (càr Bình Định). Jăt sră pơyua nam 2020 bơh 3 càr: Gia Lai, Kon Tum mờ Ƀình Định dê pơyua tus Cíñ phủ in, kờp dŭ gùng rơndeh ntoăt răt Pleiku- Quy Nhơn, jòng 160 kơi sồ, mờ priă tă lơh kờp dŭ 56 rbô tơmàn đong. Ngai 22/05/2022, đơs tàm dơ̆ lơh broă mờ Thủ tướng Cíñ phủ ồng Phạm Minh Chính, Ƀí thư Tỉñ ủy Gia Lai ồng Hồ Văn Niên neh dan mờ Cíñ phủ ai priă bơcri tơngai bơh nam 2026- 2030 halà jàu ală ƀan, ƀộ, ngàñ Dà lơgar in dong kờl càr Gia Lai jòi cau lơh broă bal nàng gờñ lam lơh rơndăp broă lơh gơl gùng do lài mờ nam 2030. Ồng Hồ Văn Niên, Ƀí thư Tỉñ ủy Gia Lai, đơs: Bol añ kung cribơyai mờ ală oh mi tàm Bình Định sơl, 2 càr jơh nùs ngan lam lơh gùng rơndeh ntoăt răt do. Dilah đơs gùng rơndeh ntoăt răt tàm ù tiah dà lơgar, Tây Nguyên ờ hềt geh dùl thơk gùng rơndeh ntoăt răt lơi ờ. Do là bơta nđàc sơngĭt ngan ai ală càr Tây Nguyên in. Bol añ kơlôi là, dilah bè phan bơna, ngan là phan bơna gùng lòt ờ geh sền gròi bơcri priă lơh, ngan là gùng rơndeh ntoăt răt den đah Gia Lai đơs is mờ Tây Nguyên đơs bal mờ ală càr tiah kềng gah dà lềng tiah tàm gùl lơgar, tiah đah jum mat tơngai lik dà lơgar, tiah đah jum măt tơngai mŭt dà lơgar mờ ală càr tiah đah tô dà lơgar digơlan geh bơta ờ pràn jak ngan ngồn.

Kuèl kơh An Khê, gơl gùng kal ke tàm gùng rơndeh 19 đah càr Gia Lai mờ Bình Định

Bal mờ ală rơndăp broă lơh gùng rơndeh ntoăt răt neh mờ gam geh lam lơh, tiah Tây Nguyên gam ơm tềng đăp bơta gơn kơnờm bơtàu tơnguh mhar pa. Mpồl lơh sa kă bro mờ làng bol tàm tiah do gam geh uă bơta gơn kơnờm bè bơta bơtàu tơnguh pràn bơh ală gơl gùng rơndeh ntoăt răt do.

            Cau cih VOV Tây Nguyên- Cau mblàng Lơ Mu K’Yến