VOV4.K’ho- Dăk Lăk gam là tiah geh kòp Kovid-19 lơh bơtờp kal ke ngan rlau jơh tiah Tây Nguyên, mờ khà cau bơtờp kòp do neh gơguh tus rlau 36 rbô 200 nă, tàm hơ̆ geh 2 rbô 153 nă cau pa gŏ tàm ngai 28/02. Tàm ƀòn dờng Buôn Ma Thuột là tiah geh kòp lơh bơtờp mhar ngan rlau jơh càr do dê, Củ tịc Ủy ƀan Ñân zân ƀòn dờng pa geh sră pơyua sơrbac mhar ngan, sồr bơh ngai do 01/03, ală hìu bơsram ơm jơh bơyai lơh bơsram tơn gơwèt mờ ală kâp bơsram bơh kâp dùl tus kâp pe, tam gơl ală kâp bơsram do tus bơsram bơh tàm internet. Jăt sră nggal do yal, khà cau bơtờp kòp Kovid-19 tàm ƀòn dờng Buôn Ma Thuột gam pơn jăt tai gơguh mhar, khà cau F0 sơm kòp tàm hìu gơguh tus 99% khà cau bơtờp, den tàng broă ơm bơsram tơn tàm hìu bơsram là pal lơh, nàng kờñ tơrmù kòp lơh bơtờp.

Gròi sền kòp tàm sơnah ƀòn Tự An, ƀòn dờng Buôn Ma Thuột, càr Dăk Lăk dê

Tàm càr Lâm Đồng kung gam gàr khà lơh bơtờp gơbàn bơh 700 tus 800 nă cau kòp pah ngai. Tus ngai 28/02, jơh ală xã, sơnah ƀòn bơh ƀòn dờng Dà Làc mờ kơnhoàl Đơn Dương dê neh ơm tàm tiah geh kòp dà cam hơ̆ là tiah pơhìn lơh bơtờp kòp uă. Tềng đăp bơta kòp gơbàn kal ke, bơh ngai 28/02, kơnòm mầm non tàm ƀòn dờng Dà Làc dê neh ơm lòt bơsram tàm hìu bơsram; kơnòm bơsram bơh ơdŭ 1 tus ơdŭ 6 tam gơl bơsram bơh bơsram tơn tàm hìu bơsram tus bơsram bơh tàm internet mờ bơsram bơh ală broă bơsram ndai.

Cau mblàng Lơ Mu K’Yến