Tơnơ̆ mờr nggùl nam geh ring bal, Rơndap broă lơh dềt sồ 3 jòng mờr 50 kơi sồ, gơ wèt Rơndap broă lơh gùng rơndeh ntoat rat Buôn Ma Thuột- Khánh Hòa neh geh bơta tam gơl ngan ngồn. Cau tờm bơcri priă neh ring bal mờ ală kơnhoàl, ƀòn dờng tàm càr Dăk Lăk bè ală bơta tam tìp mờ gùng tuh tơlik dà, lam lơh tồt jrong mờ jàu ù tiah ngan ngồn; lơh sir jơnau yal sền sơ wì bơta gơ rềng tus tiah ơm kis nàng yal sền sơ wì. Jat ồng Phạm Đông Thanh, Kwang atbồ dùl tàm ală kông ti pơndiang phan dờng ngan rlau jơh càr Dăk Lăk đơs, làng bol mờ ală mpồl lơh sa kă bro tàm càr ndrờm kơp kơnờm gùng rơndeh ntoat rat geh lơh di mờ tŭ tơngai hơ pơrgon. Ồng Thanh pin dờn, tŭ neh ai ngui den broă lơh geh dong phan bơna geh pơndiang mhar rlau, cồng nha lơh sa lơh geh geh sền gŏ loh làng ngan: “Dilah geh gùng rơndeh ntoat rat lòt Khánh Hòa, bol he geh tơrmù lơyah tŭ tơngai pơndiang phan bơh 4, 5 jơ gam mờr 2 jơ lơm gời. Tŭ tơngai pơndiang geh gơmù lơyah rlau. Ngan là tŭ neh tơrmù lơyah tŭ tơngai den geh tơrmù rlau priă lơh niam rơndeh rơndồ. Dơ̆ 2 là bal mờ dùl khà phan bơna mơya bol hi mìng kờñ blơi dùl êt rơndeh rơndồ gời. Geh bè hơ̆ den gơtùi tơrmù priă jền, tơrmù priă ngui, geh priă lơh niam wơl, priă nhai”.

Bơdìh mờ bơta kuơ pơndiang phan bơna, jat ồng Lê Văn Long, Củ tịc Ủy ƀan Ñân zân kơnhoàl Krông Bông, càr Dăk Lăk đơs, gùng rơndeh ntoat rat Buôn Ma Thuột- Khánh Hòa mờ gùng Trường Sơn Đông tơrbŏ Dăk Lăk mờ Lâm Đồng gam bơsong jơh bơta kòl yan bơh lài tus tŭ do, dong kờl tam gơl pràn jơh bal bè lơh sa suơn sre mờ nhơl chờ. Ồng Long pin dờn là, mờ bơnàng jă mùl geh là ù tiah pôs đồng kac màng, geh ală ƀòn cèng bơta niam chài kòn cau, geh bơnơm Cư Yang Sin dờng ngan, ù tiah brê bơnơm hàng niam, tŭ gùng dờng geh lơh den Krông Bông geh pràn rlau kơnờm nhơl chờ: “Mờ 3 anih tàm tìp tàm bơh chờm kơnhoàl, tàm gùl kơnhoàl mờ dut ndơl kơnhoàl, Krông Bông gơtùi ngui niam ală ròt bơta kuơ nhơl chờ mpồl bơtiàn, ròt broă lơh nhơl chờ khin sơrlèt gan ngòt rơngơt, nhơl chờ suơn sre, nhơl chờ brê bơnơm… Mờ gùng rơndeh ntoat rat Buôn Ma Thuột- Khánh Hòa, Trường Sơn Đông geh là bơta ƀuơn dờng ngan nàng Krông Bông lam lơh gơtùi broă rơndap lơh bơtàu tơnguh nhơl chờ bè Nghị quyết bơh Đảng ƀộ kơnhoàl dê neh ai tơlik”.

Kung ndrờm bè Dăk Lăk, Lâm Đồng gam sơlơ chồl pràn broă lơh rơcang ai broă sơn đờm lam lơh gùng rơndeh ntoat rat Tân Phú- Bảo Lộc mờ Bảo Lộc- Liang Khàng, kờp jơh priă tă lơh rlau 28 rbô tơmàn đông. Tŭ lơh gơs gơl gùng rơndeh ntoat rat do, Lâm Đồng geh tàm tơrbŏ niam mờ ală tiah tờm lơh sa dờng bơh tiah đah jum mat tơngai lik dà lơgar dê. Bơh hơ̆, ngui niam ală bơta pràn bè biap, bơkàu, nhơl chờ mờ phan kuơ tàm ù Alumin. Ồng Trần Văn Hiệp, Củ tịc Ủy ƀan Ñân zân càr Lâm Đồng pà git, càr neh geh jơh bal mờ broă rơndap lơh kes priă mờ broă lam lơh, gam lơh ngan tàm bơta uă ngan rlau jơh nàng rơndap broă lơh gờñ lơh gơs, lam lơh ngan ngồn bơta kơp kờñ tam pràn lơh sa- mpồl bơtiàn bơh càr dê: “Gùng rơndeh ntoat rat geh ai ngui dilah gờñ den tàm lồi nam 2025, dilah jơ la den tàm nhai 6 nam 2026. Añ đơs nền gùng do geh đal git lài tơngai tơnơ̆ do bơtàu tơnguh bơh càr Lâm Đồng dê, tam gơl tơl làm muh mat bơh càr Lâm Đồng dê”.

Tàm khà ală rơndap broă lơh gùng rơndeh ntoat rat geh lam lơh tàm Tây Nguyên lài mờ nam 2030, gùng rơndeh ntoat rat Pleiku- Quy Nhơn geh priă tă lơh uă ngan rlau jơh, gơguh tus 56 rbô tơmàn đông. Jat ồng Nguyễn Hữu Quế, Kwang atbồ Sở Kế hoạc mờ Đầu tư càr Gia Lai pà git, rơndap broă lơh do geh kuơ dờng màng ngan gơ wèt mờ càr, mơya geh gơtìp bơta lòng dờng ngan tàm broă hòi jà ală bơnah priă bơcri. Bè hơ̆ den tàng bal mờ lơh ngan hòi jà bơcri priă, Gia Lai kung gam kơlôi sơnơng, bơ tơl ală anih tam tìp mờ ală tiah lơh sa mờ măi mok jat kềng gùng rơndeh ntoat rat, nàng tŭ geh lơh, broă lơh do geh lơh geh cồng nha niam ngan rlau jơh: “Bơt bơtàu rơndap ù tiah bơtàu tơnguh lơh sa mpồl bơtiàn tus nam 2030, broă wèt sền tus nam 2050 den bol hi bơ tơl 3 tiah, mpồl lơh sa mờ măi mok jat kềng gùng dờng 19 tus anih ơhò ơm Quy Nhơn. Mờ ală cau tờm bơcri priă kung rơcang dờp gùng rơndeh ntoat rat lòt gan. Den tàng khi lơh rơndap broă lơh tàm Đăk Đoa kung geh, Mang Yang kung geh mờ jơh bal Đăk Pơ tai. Jat kềng gùng dờng hơ̆, geh uă ngan mpồl lơh sa mờ măi mok neh geh cau bơcri priă sền gròi. Mờ dơ̆ 3 là bol hi geh pơn jat tai lơh sir phan bơna gùng lòt, nàng tàm tơrbŏ tus ală tiah nàng tac phan bơna”.

Jat Nghị quyết sồ 23 ngai 06/10/2022 bơh Ƀộ Cíñ trị dê, Tây Nguyên là tiah lơh sa ờ pràn ngan rlau jơh dà lơgar. Broă hòi jà geh rlau 180 rbô tơmàn đông nàng lam lơh ală rơndap broă lơh dờng bè gùng lòt tàm tiah do nàng kờñ lơh gơlik phan bơna tơl pràn nàng Tây Nguyên ngui niam ală bơta pràn bè năng lượng, phan kuơ tàm ù, lơh sa suơn sre, nhơl chờ… wèt tus dùl rài lơh sa tơlir, bơtàu tơnguh kơ̆ kơljap tàm nam 2030, gơ gơs là tiah lơh sa bơtàu tơnguh bơh gùt lơgar dê tàm nam 2045.