Tàm ƀòn dờng Buôn Ma Thuột, broă lơh “Ngai gùt làng bol tus bal ai mhàm dong kờl is” nam 2023 hòi jà geh rơlao 600 nă cau là kwang bàng, kông cứk, viên cứk, mpồl ling tus bal ai mhàm dong kờl is. Bơh tŭ hơ̆ ai geh 459 kơl dung mhàm. Git nđờ jơ̆t dơ̆ tus bal ai mhàm dong kờl is, bi Nguyễn Văn Kiên, kis tàm sơnah ƀòn Tân Thành, ƀòn dờng Buôn Ma Thuột yal: “Añ tus bal neh 25 dơ̆ ai mhàm dong kờl is bloh, ngai do pơn jăt tai tus bal sơl. Bơh tơl dơ̆ ai mhàm dong kờl is nùs nhơm añ gơlơh bè ờs, tơl dơ̆ tus bal gơlơh chờ tŭ geh tam pà mờ ală cau kờñ dong kờl mhàm tàm ală dơ̆ kòp jroă”.

Mò Ayun H’ Hương, Củ tịc Mpồl Cữ thập đỏ càr Dăk Lăk pà git, ală nam pa do, khà anih lơh broă, mpồl lơh broă, hìu măi, kông ty, hìu bơsram bơyai lơh ală broă ai mhàm ngai sơlơ geh uă bơh broă lơh bè Lơh chờ Nam pa phồng, ngai Rơlô pơrhê, broă lơh pơrhê... Ală ngai chờ ai mhàm dong kờl neh ai geh bơta niam ai uă cau tus pơgồp bal cèng geh wơl bơta kis ai ală cau kòp gam kờñ mhàm in. Broă lơh tơnkah 23 nam ngai gùt làng bol ai mhàm dong kờl is là dơ̆ nàng yal mblàng tơnguh uă rơlao tai jơnau kờñ, bơta kwơ niam bơnĕ bơh broă ai mhàm dong kờl cau in, lơh geh uă broă lơh ai mhàm dong kờl tàm mpồl bơtiàn. “Kung kơ̆p kờñ ngai do mờ ală ngai tơnơ̆ do tai làng bol kis tàm gùt càr lơh jăt broă ai mhàm dong kờl is niam rơlao. Tàm tơngai tus bol añ pơn jăt tai yal mblàng bè broă ai mhàm dong kờl tàm càr nàng broă ai mhàm tàm càr ngai sơlơ tơnguh bơtàu rơlao tai”.

Kung tàm bồ nhai Poan lài do, Mpồl đơng lam ai mhàm dong kờl is càr Kon Tum neh bơyai lơh Lam sồr Ngai gùt làng bol ai mhàm dong kờl is (07/04) mờ tơngu me: “Ai ntờc mhàm pơrhê – Jào rài kis in bơta kis”. Jăt jơnau yal tàm dơ̆ lam sồr: tàm ală nam do, broă ai mhàm dong kờl is càr Kon Tum neh pơgồp bal niam tàm broă drơng gàr, sền gàr mờ tơnguh uă bơta pràn kơl dang să jan làng bol. Mìng is tàm nam 2022 lài do gùt càr neh bơyai lơh geh 34 dơ̆ ai mhàm dong kờl is, dờp geh rơlao 6 rơbô 800 kơl dung mhàm, geh rơlao 136% khà broă mờ Mpồl đơng lam dà lơgar lam sồr ai mhàm dong kờl is jào.

Broă ai mhàm dong kờl is tŭ do neh tơnguh bơtàu tàm jơh ală kơnhoàl, ƀòn dờng mờ anih lơh broă, mpồl lơh broă tàm càr Kon Tum gơs dùl bơta niam chài. Mò Nguyễn Thị Hoài Ven, Củ tịc Mpồl Cữ thập đỏ, Phó kwang atbồ Mpồl duh broă sùm Mpồl đơng lam ai mhàm dong kờl is càr Kon Tum pà git: “Nam 2023 Mpồl Cữ thập đỏ càr Kon Tum là anih lơh broă sùm bơh Mpồl đơng lam dê geh bơyai lơh uă ală broă lơh dờng bè: Broă lơh chờ nam pa phồng, Ngai gùt làng bol ai mhàm dong kờl is, Broă lơh pơrhê... Jơnau kờñ bơh nam 2023 lơh geh 7 rơbô 200 kơl dung mhàm. Làng bol tŭ do neh git uă ngan bè broă ai mhàm dong kờl is”.

Mpồl đơng lam lam sồr ai mhàm dong kờl is càr Kon Tum ai jơnau kờñ tàm nam 2023 lam sồr geh 1 rơbô 500 nă cau dan cih măt ai mhàm dong kờl is mờ bơyai lơh dờp 7 rơbô 200 kơl dung mhàm di pal mờ broă kờñ ngui mhàm bơh Hìu sơnơm càr dê nàng sơm cau kòp in. Tơnơ̆ mờ dơ̆ lam sồr Ngai gùt làng bol ai mhàm dong kờl is (07/04), Mpồl Cữ thập đỏ càr Kon Tum neh bơyai lơh dờp mhàm bơh cau ai mhàm dong kờl is mờ tàm nhai 4 do lơh ngan lam sồr, bơyai lơh dờp geh 720 kơl dung mhàm.

Bơh tàm bồ nam, tàm ƀòn dờng Buôn Ma Thuột, càr Dăk Lăk kung neh lam lơh broă “Ngai rơlô pơrhê” dơ̆ 15 tàm Tây Nguyên. Tàm dơ̆ lam lơh dơ̆ do neh geh rơlao 600 nă cau bơsram dờng, cau pơgru, kwang bàng, y ƀák sĩ gam bơsram, lơh broă tàm Hìu bơsram Đại họk Y dượk Buôn Ma Thuột, càr Dăk Lăk tus bal ai mhàm dong kờl. Tơn jơh broă lơh neh dờp geh rơlao 500 kơl dung mhàm, pơgồp bal tàm khà mhàm dà lơgar dê. Neh geh 20 dơ̆ tus bal ai mhàm dong kờl is, bi Quốc Đình Khánh, atbồ Kỹ thuật viên, Khoa xét nghiệm, Hìu sơnơm Đại họk Y dượk Buôn Ma Thuột đơs: “Do là dùl broă lơh geh kwơ màng ngan, geh nùs nhơm niam kòn bơnus dê, dong kờl geh uă cau kòp. Añ kung là dùl nă cau lơh sơnơm, den tàng añ wă loh làng broă ai mhàm dong kờl là geh kwơ bè lơi mờ ờ lơh aniai lơi tus mờ cau ai mhàm dong kờl, den tàng añ kung lam sồr jơh ală bơyô gam kơnòm să di lah geh tơl bơta niam den pal tus bal ai mhàm dong kờl”.

Broă lơh “Ngai rơlô pơrhê” dơ̆ 15 geh bơyai lơh tàm 3 tiah ndai tàm Tây Nguyên, tàm hơ̆ geh Hìu bơsram Đại họk Tây Nguyên, kơnhoàl Cư̆ Mgar mờ kơnhoàl Ea Kar càr Dăk Lăk dê. Mờ jơnau “Ai mhàm dong kờl cau, rài kis bơh bơyô mờ añ”, broă lơh do kờñ lơh geh uă bơta kwơ niam kòn bơnus dê, pơgồp bal tàm khà mhàm dà lơgar nàng sơm di tŭ ală cau kòp in.