Xã Dăk Nia, ƀòn dờng Gia Nghĩa, càr Dăk Nông là tiah ơm kis jŏ rài bơh làng bol kòn cau M’Nông dê. Tàm ală dơ̆ tam lơh, làng bol sùm dùl nùs bal dòn song, tam klăc bal mờ kăc màng, pin dờn mờ dòn jat Đảng. Xã Dăk Nia kung là tiah lơh tềl tŭ tơngai kah yau sơnđờm mut lơh gùng Hồ Chí Minh kah yau dê. Tàm 4 jiơ mho ngai 30/10/1960, tàm xã Dăk Nia, Mpồl B90 tàm tiah đah Tô Dà lơgar mờ Mpồl C200 tàm tiah đah Jum Dà lơgar neh geh tàm yal tơngĭt bal, tàm tơrbŏ bal 2 kơnhoàl ù tiah kwơ màng Tây Nguyên mờ tiah đah Jum mat tơngai lik Dà lơgar, ai lòt rê gùng Hồ Chí Minh, gàr niam bơta dong kờl bơh tiah đah Tô Dà lơgar ai tiah tam lơh đah Jum Dà lơgar in tàm dơ̆ tam lơh tơngklàs jơh tiah đah Jum, tơrgùm dùl Dà lơgar. Tiah mờ 2 Mpồl B90 mờ C200 tìp mat bal tŭ do neh geh Cíñ phủ ơn tàm mpồl Tiah tềl lời wơl Dà lơgar kwơ màng.Ồng Ksrai, Củ tịc Ủy ƀan Mặt trận Dà lơgar Việt Nam xã Dăk Nia, ƀòn dờng Gia Nghĩa, càr Dăk Nông, đơs: “Tàm ală dơ̆ tam lơh, gơwèt mờ làng bol jơi bơtiàn dồ ết nă cau tàm tiah do sùm pin dờn mờ Đảng. Tus tŭ do, làng bol kung gam sùm pin dờn mờ gùng dà broă lơh bơh Đảng, adat boh lam bơh Dà lơgar dê, sùm tam klăc bal nàng sền gàr ring lơngai tŭ do mờ sùm tam klăc dờng nàng bơt bơtàu lơh sa ngai sơlơ brồ guh, rài kis ngai sơlơ bơtàu tơnguh, bơtàu tơnguh nàng làng bol pas, dà lơgar pràn. Ală rơnàng lòt lài kung sùm bơto bơtê ai rơnàng kơnòm să in bè bơhiàn kăc màng dờng màng”.

Tàm nùs nhơm gùt lơgar chờ tơngkah 49 nam tơngklàs tiah đah jum Dà lơgar tơrgùm bal, cau ling yau Y Joan Niê, kòn cau Rơđê kis tàm ƀòn Ea Lê A, sơnah ƀòn Ea Tam, ƀòn dờng Buôn Ma Thuột, càr Dăk Lăk kah wơl bè rài lài do jak chài bơh jơi bơtiàn dê. Ồng yal, tŭ hơ̆ ồng mìng rơ̆p pa tào pơnu, geh bèp sồr lòt àñ phan sa, sơnơm… dong kờl cau ling in. Ồng yal bè jơnau kah wơl rài lài do geh tìp Ling tơngklàs mờ sền gŏ ngai chờ gùt lơgar tơrgùm bal. Ồng Y Joan Niê kah wơl:“Tŭ tơnklàs Buôn Ma Thuột geh pha lin tam lơh Tây Nguyên là tàm bồ nhai 3 nam 1975, añ tŭ hơ̆ mìng rơ̆p bơh 14, 15 sơnam mơ. Bèp añ mờng jà añ lòt àñ phe, tơngời, bùm blàng, poăc ro, biăp brê… tus tàm ală pôs ling tơnklàs tàm thị xã Buôn Ma Thuột lài do nàng dong kờl cau ling in. Cau ling tŭ hơ̆ kal ke tài ờ tơl phan sa, sơnơm, geh uă cau gơtìp kòp sốt rét, den tàng tŭ geh làng bol dong kờl ală cau ling chờ hờp ngan. Ală cau ling đơs mờ làng bol là, sơgràm geh Tây Nguyên là geh tơnklàs jơh đah jum dà lơgar. Hơ̆ sồng tàm 2 poh tơnơ̆, hơ̆ là ngai 30 nhai 4, ală cau tàm ƀòn Alê A do dờp jơnau yal bơh ling tơnklàs yal neh sơgràm geh Gơlang Độc Lập tàm tŭ 10 jơ 45 phút, tơnklàs geh Sài Gòn”.