VOV4.K’ho- Ơm tàm tiah Tây Nguyên, gơnoar atbồ mờ gah lơh broă geh gơnoar kung gam tơrgùm lam lơh jat ală broă lơh rcang sơndră mờ mìu càl rbŭt dờng sồ 4. Drim ngai 27/09, càr Kon Tum neh lơh 3 mpồl lơh broă tus ală kơnhoàl tờm digơlan gơrềng kơn jơ̆ tài bơh mìu càl rbŭt dờng sồ 4 nàng pơn jat tai kờp sền, lòt sền.

Dơ̆ lơh broă tàm Trạm biến áp 500 kV Pleiku nàng rcang sơndră mờ mìu càl rbŭt dờng sồ 4

Ală kơnhoàl bơh càr Kon Tum geh sền gĭt digơlan gơtìp aniai kơn jơ̆ tŭ mìu càl rơbŭt dờng sồ 4 mŭt tàm ù gờl, tàm hơ̆ geh: Đăk Glei, Tu Mơ Rông, Kon Rẫy mờ Kon Plông. Gơnoar atbồ mờ gah lơh broă geh gơnoar kràñ cê jơh nùs ntrờn làng bol lik bơh ală tiah geh bơta pơhìn tơrlah ù uă tus ơm tàm tiah niam lơngap lơngai. Tàm Gia Lai, Kông ty pờ tơlik đèng Gia Lai lơh dơ̆ lòt sền ală tiah ờ pràn, bơsong, lơh kơ̆ kơljap wơl, lơh geh hiòng dà hòr nàng gàr niam ờ gơtìp ñcùn ù, dà cò. Tàm Dăk Lăk, là càr geh ală tơnau dơng dà dờng ngan rlau jơh tàm Tây Nguyên, den broă lơh atbồ tơnau dơng dà geh sền gròi ngan ngồn, gàr niam broă mŭt lơh broă, tam pà dà mờ rcang sơndră ngơr bam, dà kŏ dà cò tŭ mìu càl rơbŭt dờng mŭt. Ai càr Lâm Đồng neh đơng lam ală kông ty gam atbồ, ngui tơnau dơng dà hìu măy pờ tơlik ồs đèng gàr niam lơh jat di jơnau sồr.

VOV.vn- Cau mblàng K’Hạnh