VOV4.K’ho - Poh lài, bal mờ gùt lơgar, ală càr tàm Tây Nguyên neh ai kơnòm bơsram lòt bơsram wơl tàm bơta bè ờs pa, gàr niam ờ do ờ dă tàm broă rơcang sơndră mờ kòp Kovid-19. Bŭ lah bè hơ̆, cau mè bèp kung ờ hềt jơh jơnau ờ suk tŭ jun kòn lòt bơsram.

Nàng cau mè bèp mờ kơnòm bơsram iang nùs, ală hìu bơsram neh ai tiah is nàng wă ală kơnòm bơsram jăt tơl ơdŭ, dong kờl, bơto sồr kơnòm bơsram ală broă rơcang sơndră mờ kòp gơtờp.

                          Dơ̆ bơsram ơdŭ nha 1, hìu bơsram Hoa Hồng ƀòn dờng Pleiku, càr Gia Lai

Pơgru Phạm Thị Thanh Thủy, Kwang atbồ hìu bơsram kấp 1 Ngô Quyền, ƀòn dờng Buôn Ma Thuột, càr Dăk Lăk pà git: “Mìng is gơwèt mờ kơnòm bơsram ơdŭ 1, hìu bơsram neh geh broă rơndăp lơh ai cau pơgru atbồ ơdŭ bơsram in ală cau pơgru geh ntào tềng mpồng hìu bơsram nàng wă ală oh. Tơnơ̆ mờ tŭ neh was bơta duh să jan, ală oh geh nggui tơn ngài bal 1 thơ̆k ală oh mŭt tàm ơdŭ. Đơs bal drim do geh rơlao 90% ală oh ndrờm tus lòt bơsram”.

Bŭ lah geh broă rơcang lài bè nùs nhơm tŭ ai kòn in lòt bơsram wơl, mơya cau mè bèp ờ sŭk tài kơnòm bơsram mầm non, kấp 1 ờ hềt cit sơnơm vaccine, ờ hềt git bè broă tam tam cah ngài den tàng kal ke ngan nàng ală kơnòm bơsram lơh jăt niam tàm kơrnoăt rơcang sơndră mờ kòp gơtờp. Lŏ Hoàng Thị Kim Loan, cau mè jun kòn lòt bơsram mầm non Tân Thành, ƀòn dờng Buôn Ma Thuột, càr Dăk Lăk pà git: “Añ kung ờ sŭk ngan sơl tàm bơta kòp gơtờp do gam cau F0 uă ngan, ai kòn lòt bơsram den mè mờ cau tàm hìu kung kal ke, mơya tus tàm tŭ lời kòn lòt bơsram den pal lòt nàng tus nam mŭt ơdŭ 1. Den tàng, rơcang lài khàr dà is kòn in, chèo gòm muh măt, chèo jùt măt is nàng kòn tuh măt, ha là tê gơtìp sùh dà den jùt”.

               Kơnòm bơsram tàm càr Dăk Lăk geh was bơta duh să jan lài mờ tŭ mŭt tàm ơdŭ bơsram

Tơnơ̆ mờ tŭ hìu bơsram mầm non Hoa Hồng, ƀòn dờng Pleiku, càr Gia Lai pờ mpồng wơl, lŏ Huỳnh Thị Thu Hà jun 2 nă kòn tus lòt bơsram. Pah drim, lŏ ai ală kòn in sơnkroh bơr mờ dà boh, was bơta duh să jan, pơn chèo gờm muh măt mờ khàr dà is tus ơdŭ bơsram. Jăt lŏ Hà yal, bơh ngai tus lòt bơsram wơl, ală kòn neh chờ hờp rơlao; mè bèp kung gơmù bơta kal ke tàm broă sền gàr kòn dềt: “Añ gŏ tàm hìu bơsram mầm non, broă kloh niam, den ală cau pơgru lơh niam bloh. Lài mờ tŭ ală kòn tus tàm ơdŭ, ală pơgru neh pơs wàs kloh niam. Pah ngai, ală pơgru ai kòn in hùc dà sùm, rào tê lơh kloh vi khuẩn. Añ gŏ ală cau ndrờm geh cit sơnơm vaccine jơh bloh, mè bèp geh dong kờl tai vitamin, canxi nàng ală kòn gơguh bơta pràn sơndră mờ kòp gơtờp. 2 nă kòn añ dê tŭ geh lòt bơsram, rê chờ hờp ngan”.

Mò Trần Thị Thuỷ, Kwang atbồ hìu bơsram Mầm non Hoa Hồng ƀòn dờng Pleiku, càr Gia Lai pà git, tŭ bơyai lơh lòt bơsram wơl, hìu bơsram neh lơh jăt tơl ală gùng dà broă lơh nàng gàr niam ờ do ờ dă tàm broă rơcang sơndră mờ kòp kovid-19 gơtờp jăt jơnau bơto sồr bơh gah lơh sơnơm mờ gah bơto bơtê mờ bơsram dê. Broă rò mờ jun kòn lòt bơsram geh tam pà gùng lòt bơh tàm mpồng hìu bơsram. Tàm ơdŭ bơsram, kơnòm bơsram pal pơn chèo mờ ơm tam cah ngài tàm ală broă lơh mờ nhơl chờ: “Rơcang ai bơta bè ờs pa tàm broă lơh pơn jăt tai, den hìu bơsram geh lơh niam broă lam sồr gơwèt mờ cau mè bèp. Tàm hơ̆ uă ngan là gơwèt mờ kơnòm dềt 5 sơnam, nàng rơcang nùs nhơm, jơnau git wă mờ bơta ngăc ngar ai ală kơnòm dềt in mŭt bơsram ơdŭ 1 niam ngan, den pal lơh broă rơcang sơndră mờ kòp gơtờp mờ sền gàr, bơto bơto kơnòm dềt ndang, pal geh broă lơh bal đah cau mè bèp mờ hìu bơsram”.

Gùt càr Gia Lai neh geh 253 tàm 257 hìu bơsram ai kơnòm bơsram mầm non in tus lòt bơsram. Bơh mờr 1 poh, neh geh 87% khà kơnòm dềt geh tus lòt bơsram. Sền bal, tàm ală kơnhoàl, thị xã, khà kơnòm bơsram mầm non tus lòt bơsram wơl gal ngan. Mìng is tàm ƀòn dờng Pleiku, mìng rơ̆p geh 1 bơnah 4 tàm khà rơlao 14 rơbô nă kơnòm dềt tus lòt bơsram wơl tàm 36 hìu bơsram. Mờ broă bơto bơsram gàr niam ờ do ờ dă, khà kơnòm dềt tus lòt bơsram wơl gam geh gơguh pah ngai. Jăt mò Bùi Khoa Nghi, Phó Kwang atbồ Sở Giáo dục mờ Đào tạo càr Gia Lai yal, broă ai kơnòm bơsram gờñ tus lòt bơsram wơl là bơta pal geh: “Gah bơto bơtê mờ bơsram neh bơto sồr ờ uă tơngu me pal kah tŭ kơnòm dềt tus lòt bơsram wơl, gàr niam ờ do ờ dă tàm broă rơcang sơndră mờ kòp gơtờp tŭ ròng siam, sền gàr, bơto bơtê kơnòm bơsram mầm non; đơng lam ală hìu bơsram geh jơnau lơh lài nàng rơcang sơndră mờ ală bơta gơtìp bơh kòp gơtờp. Gah bơto bơtê mờ bơsram lơh ngan bañ geh ờ sền gròi, nàng ai kơnòm bơsram tus lòt bơsram, ai tơl bơta niam, bơta ƀuơn ngan ai kơnòm bơsram tus bal ală broă tàm broiă bơto bơtê mờ bơsram”.

Nàng bơyai bơto bơsram tàm hìu bơsram niam ờ do ờ dă mờ geh cồng nha, lài mờ hơ̆, Sở Giáo dục mờ Đào tạo càr Dăk Lăk kung neh bơyai lơh ai ală mpồl kwang bàng tus sền mùl màl tàm ală hìu bơsram, sồr pal geh lơh niam ală broă, gùng dà broă lơh niam ngan tàm broă rơcang sơndră mờ kòp gơtờp. Nam bơsram 2021-2022, càr Dăk Lăk geh rơlao 1 rơbô hìu bơsram mờ rơlao 450 rơbô nă kơnòm bơsram tàm ală kấp bơsram. Tơngai do jơh ală kwang bàng, cau pơgru, cau lơh broă tàm gah bơto bơtê mờ bơsram càr Dăk Lăk neh geh cit 2 ding sơnơm vaccine rơcang sơndră mờ kòp kovid-19 mờ geh rơlao 20% khà cau neh geh cit ding dơ̆ 3.

Cau mblàng Ndong Brawl