VOV4.K’ho- Mìng gam 3 poh tai là geh lơh Dơ̆ pơrlòng jơh bơsram kâp pe. Tŭ do, gah bơto bơtê mờ bơsram ală càr tàm tiah Tây Nguyên gam sơlơ lam bơto wơl jơnau neh bơsram ai kơnòm bơsram in, rơcăng phan bơna nàng dơ̆ pơrlòng lơh geh cồng nha niam ngan rlau jơh. Bal mờ hơ̆, bàr pe tiah geh broă dong kờl priă măt dong ală cau pơrlòng geh rài kis kal ke, cau pơrlòng kòn cau iang nùs lòt pơrlòng.

Tàm càr Kon Tum, dơ̆ pơrlòng jơh bơsram kâp pe nam do geh rlau 4 rbô 700 nă cau pơrlòng lơh sră cih mat tus bal pơrlòng. Tŭ do, ală hìu bơsram tàm càr gam sơlơ tơnguh tai broă lơh bơto wơl jơnau neh bơsram ai kơnòm bơsram in. Nàng sền swì di bơta tơl pràn bơh tơl nă kơnòm bơsram dê, Sở Giáo zụk mờ Đào tạo càr Kon Tum sồr ală hìu bơsram bơyai lơh ai jơh ală kơnòm bơsram ơdŭ 12 in lòng pơrlòng lài. Bơh cồng nha lơh jơnau pơrlòng bơh kơnòm bơsram dê geh bơta mblàng sền, sền swì, kờp sền nàng di tŭ bơtơl, tam gơl tơngume bơto wơl jơnau neh bơsram rơcăng ai dơ̆ pơrlòng tơl môn dong kơnòm bơsram ƀươn wă jơnau bơto mờ gĭt nền jơnau bơsram. Klau pơgru Nguyễn Tiến Định, Kwang ătbồ Hìu bơsram kâp pe Trần Quốc Tuấn, thị trấn Đăk Hà, kơnhoàl Đăk Hà, pà gĭt:  Hìu bơsram gam sơrbac mhar ngan, ală mpồl lơh broă ờs mờng jăt sền broă bơsram wơl jơnau bơsram rơcăng dơ̆ pơrlòng in. Kwơmàng sơlơ tơnguh tai broă lơh sền swì sră nggal sră rơcăng bơto jơnau bơsram. Mpồl lơh broă ờs mờng pal là sồr lơh jơh nùs gơwèt mờ cau pơgru. Mơkung sùm ai jơnau đơs wơl bơh ală kơnòm bơsram dê nàng lòng sền là neh lơh di sơl halà ờ. Tus ngai 30/06 hìu bơsram sền bal là neh lơh sir ai ală oh in geh dùl nùs nhơm rơcăng lài, rơcăng mŭt tàm dơ̆ pơrlòng lơh geh cồng nha niam ngan rlau jơh.

Sở Giáo zụk mờ Đào tạo càr Kon Tum digơlan lơh 12 anih pơrlòng, mờ 203 cơldŭ pơrlòng, 41 cơldŭ ơm kơ̆p mờ rơcăng lài. Càr kung neh geh gùng dà gàr niam ờdo ờdă ai cau pơrlòng tiah sar lơgar ngài in tàm ală tŭ lòt pơrlòng mờ anih sa anih ơm rlô.

Tàm càr Dăk Lăk, dơ̆ pơrlòng nam do geh 20 rbô 455 nă cau pơrlòng lơh sră cih mat tus bal pơrlòng. Càr neh rơndăp 32 anih pơrlòng mờ 951 cơldŭ pơrlòng tàm 15 kơnhoàl, ƀòn dờng mờ thị xã. Tŭ do, gah bơto bơtê mờ bơsram càr gam tơrgùm bơto wơl jơnau neh bơsram ai kơnòm bơsram in. Tàm Hìu bơsram Kâp pe Thựk hàñ Kao Nguyên tàm ƀòn dờng Buôn Ma Thuột, mờr 300 nă kơnòm bơsram ơdŭ 12 gam lòt bơsram sùm pah ngai nàng bơsram wơl jơnau neh bơsram rơcăng ai dơ̆ pơrlòng in. Oh Lê Thị Minh Nguyệt là kơnòm bơsram tàm hìu bơsram do, pà gĭt: Bơdìh mờ tơngai bơsram tai tàm hìu bơsram, oh gam lòt bơsram bàr pe ơdŭ bơsram bơdìh hìu bơsram, rê hờ hìu den bơsram is tai, sền tai jơnau bơsram tàm pang web pin dờn.

Dùl ƀùi bơto wơl jơnau neh bơsram nàng rơcăng ai dơ̆ pơrlòng jơh bơsram kâp pe bơh kơnòm bơsram Hìu bơsram Kâp bàr- Kâp pe Đông Du, ƀòn dờng Buôn Ma Thuột, càr Dăk Lăk dê

Sở Giáo zụk mờ Đào tạo càr Dăk Lăk neh sồr ală hìu bơsram kâp pe rơcăng lài geh broă rơndăp lơh, sac rwah broă bơto wơl jơnau neh bơsram dipal mờ tơngume tơl môn bơsram mờ bơta gĭt wă bơh kơnòm bơsram dê. Gơwèt mờ kơnòm bơsram geh bơta gĭt wă dimơ, ờ jak, cau pơgru pal sơlơ bơto wơl ală jơnau neh bơsram tờm ngan, kwơmàng ngan. Mờ mpồl kơnòm bơsram geh broă bơsram jak, jak ngan, hìu bơsram bơto wơl jơnau neh bơsram kal ke rlau tai nàng dong ală oh lơh kwèng mờ jơnau ai pơrlòng geh bơta sac rwah uă. Ồng Phạm Đăng Khoa, Kwang ătbồ Sở Giáo zụk mờ Đào tạo càr Dăk Lăk, đơs: Bol añ neh bơto pơlam ală hìu bơsram kâp pe lơh ală jơnau ai pơrlòng sền nàng git lài gời ală jơnau ai pơrlòng bơh Sở Giáo zụk mờ Đào tạo dê nàng lam lơh lòng pơrlòng lài mờ sền swì cồng nha bơh hìu bơsram dê. Mờ bơh cồng nha hơ̆ geh broă rơndăp lơh bơyai lơh bơto wơl jơnau neh bơsram ai ală oh in. Lơh bè lơi nàng ală oh in git nền jơnau neh bơsram tus bal dơ̆ pơrlòng jơh bơsram mờr tus.

Tàm càr Dăk Nông, dơ̆ pơrlòng do geh rlau 6 rbô 870 nă cau pơrlòng lơh sră cih mat tus bal pơrlòng, tàm hơ̆ geh pơgăp 1 rbô 580 nă cau pơrlòng là cau kòn cau. Bal mờ broă gàr niam phan bơna mờ bơto jơnau neh bơsram ai kơnòm bơsram in, càr pơn jăt tai lơh jăt broă dong kờl priă măt dong ală cau pơrlòng geh rài kis kal ke mờ cau pơrlòng kòn cau in iang nùs lòt pơrlòng. Ồng Phan Thanh Hải, Phó Kwang ătbồ Sở Giáo zụk mờ Đào tạo càr Dăk Nông pà gĭt, nam do, càr pơn jăt tai lơh jăt broă dong kờl priă măt rlau 300 rbô đong ai tơl nă kơnòm pơrlòng geh rài kis kal ke, kơnòm pơrlòng kòn cau in, dong ală oh iang nùs lòt pơrlòng. Ồng Phan Thanh Hải, đơs: Bal mờ broă bơto wơl jơnau neh bơsram ai cau pơrlòng in den bol añ pơn jăt tă pơgồp jơnau đơs ai Ủy ƀan Ñân dân càr in bè ală gùng dà pơrlòng jăt tàm bơta geh ngan bơh càr dê, gàr niam ală broă lơngăp lơngai, ờdo ờdă gùng lòt ƀươn ƀoài ai cau pơrlòng in lòt rê...Kwơmàng gơwèt mờ cau pơrlòng là oh kòn làng bol kòn cau, cau pơrlòng geh rài kis lơh sa kal ke, den Sở Giáo zụk geh kơnòl tơrgùm kờp, tàm pơnring priă jền dipal ngan rlau jơh nàng dan mờ Ủy ƀan Ñân zân càr geh bơta dong kờl dipal, lơh bè lơi ờ lời gơlik geh broă cau pơrlòng pal sơrbì pơrlòng tài bơh kal ke bè priă jền halà ờ geh priă lòt rê.

Bal mờ bơta rơcăng lài niam ngan bè phan bơna, bơyai lơh bơto wơl jơnau neh bơsram nền nòn ngan, bơta pơgồp bal niam đah ală mpồl lơh broă geh gơnoar dê, Dơ̆ pơrlòng jơh bơsram kâp pe nam do tàm ală càr Tây Nguyên geh lơh geh cồng nha niam.

            Cau cih VOV Tây Nguyên- Cau mblàng Lơ Mu K’Yến