VOV4.K’ho - Tơnơ̆ mờ 4 nam lơh jăt kơrnoăt sồ 522 nam 2018 bơh Thủ tướng Cíñ phủ dê, kĭ rơndăp broă lơh Bơto bơtê broă lơh mờ tơwèt gùng dà săc rơwah kơnòm bơsram, broă săc rơwah kơnòm bơsram tơnơ̆ mờ kấp 2 neh geh broă lơh gơguh mùl màl, geh tơnguh uă cồng nha broă lơh bơh ală hìu bơto broă lơh bal mờ hìu bơsram giáo dục thường xuyên, mờ geh tơnguh uă bơta niam tŭ mŭt tàm hìu bơsram kấp 3. Mơya, broă ờ tơl hìu bơsram, ơdŭ bơto broă lơh gam lơh broă săc rơwah kơnòm bơsram uă tiah tàm do ờ geh jăt mờ tơngai geh ai.

Mờr 300 nă kơnòm bơsram tàm mpồl săc rơwah dan bơsram tàm hìu bơsram Cao đẳng kộng đồng Dăk Nông nam bơsram 2022-2023

 Nam do, khà kơnòm bơsram jơh bơsram kấp 2 tàm càr Dăk Nông dan cih măt bơsram tàm hìu bơsram Cao đẳng kộng đồng Dăk Nông gal rơlao mờ ală nam. Mìng is tàm dơ̆ sơnrờp neh geh mờr 300 nă mờ dơ̆ bàr kờp dŭ geh rơwah rơlao 100 nă tai. Ồng Nguyễn Hữu Lành, Kwang atbồ hìu bơsram pà git, lơh jăt broă săc rơwah jăt mờ kơrnoăt sồ 522 nam 2018 bơh Thủ tướng Cíñ phủ neh dong kờl hìu bơsram kờp lài khà kơnòm bơsram di gơlan geh rơwah mờ geh broă rơndăp rơwah, rơcang phan bơna bal mờ mpồl cau pơgru di pal, gàr niam broă bơto broă lơh geh cồng nha bal mờ ală broă bơto sră, dong kờl kơnòm bơsram geh uă jơnau kờñ rơwah jăt mờ jơnau kờñ. Ồng Nguyễn Hữu Lành pà git: “Tus tàm do ală kơnòm bơsram mìng là bơsram broă lơh là tờm ngan. Mơya, ală kơnòm gam gơtùi rơwah bơsram broă bơto thường xuyên ha là bơta chài rơgơi broă lơh. Di lah bơsram Giáo dục thường xuyên, ală kơnòm bơsram kung gam pơrlòng jơh bơsram kấp 3 bè ờs sơl. Gam bơsram tai bơta chài rơgơi broă lơh den ală kơnòm geh tơl bơta nàng guh cao đẳng. Hơ̆ là bơsram 2 nam, pơgồp bal mờ bơsram bơta chài rơgơi broă lơh là 2 nam nggùl tai den ală kơnòm geh guh cao đẳng tơn”.

Kung geh khà kơnòm bơsram jơh bơsram kấp 2 gơguh uă, nam do, càr Dăk Lăk neh lơh jăt broă săc rơwah kơnòm bơsram mờ rơlao 5 rơbô nă. Tàm hơ̆, 16 hìu bơsram broă lơh mờ giáo dục thường xuyên tàm càr dờp geh 4 rơbô 934 nă kơnòm bơsram. Jăt ồng Hà Ngọc Hướng, Kwang atbồ hìu bơsram giáo dục thường xuyên mờ bơto broă lơh kơnhoàl Buôn Đôn đơs, broă săc rơwah kơnòm bơsram tŭ do neh lài ngan sơrlèt mờ bơta kal ke bè nùs nhơm bơh kơnòm bơsram bal mờ cau pơgru. Tàm ală hìu bơsram giáo dục thường xuyên mờ bơto broă lơh, ală kơnòm bơsram geh tơrgùm bơsram ală môn tờm, geh bơto broă lơh, mhar git broă lơh nàng gơtùi lòt lơh broă tai, tơmù kal ke ai hìu nhă in. “Bè ală nam, kung gam cau hơ̆ sơl, lòt bơsram kấp 3, bơsram tus git nđờ jơ̆t môn den geh uă kơnòm ờ jai bơsram. Tŭ do mŭt tàm hìu bơsram do là bơsram 7 môn mơ, dơ̆ bàr là bơto nền nòn rơlao den tàng ală kơnòm geh tơrgùm bơsram jăk rơlao. Bơdìh hơ̆ tai, lòt bơsram ndang mờ geh lòt lơh broă ndang ală kơnòm bơsram gơtùi jòi geh is ờ uă priă ngui tàm rài kis”.

Săc rơwah kơnòm bơsram tơnơ̆ mờ kấp 2 neh pà gŏ ală bơta kwơ mùl màl mờ jơh kơnòm bơsram bal mờ ală hìu bơsram broă lơh bal mờ giáo dục thường xuyên, mơya nam bơsram 2022-2023, nam dơ̆ poan lơh jăt mờ kơrnoăt sồ 522 nam 2018 bơh Thủ tướng Cíñ phủ, tàm Tây Nguyên mìng rơ̆p geh càr Lâm Đồng tam cah geh rơlao 25% khà kơnòm bơsram jơh bơsram kấp 2, gam tai mìng geh bơh 10% tus rơlao 20%. Geh bơta do mìng là ờ tơl ală hìu bơsram, ơdŭ bơsram bơto broă lơh, ờ ndrờm bal bơh đah bơto broă lơh mờ bơto sră. Bè tàm càr Dăk Nông, geh hìu bơsram giáo dục thường xuyên kấp kơnhoàl mìng bơto sơ kấp broă lơh mờ ờ geh bơto sră. Jăt ồng Nguyễn Văn Toàn, Kwang atbồ Sở Giáo dục mờ Đào tạo càr Dăk Nông yal, geh bơta do, broă rơndăp lơh tam cah is 2 rơbô nă kơnòm bơsram tàm nam bơsram do, mìng geh lơh jăt nggùl: “Tàm tiah kal ke mờ săc rơwah den kơnòm bơsram ờ geh bơta niam bơsram broă lơh, tài bơh tàm ală hìu bơsram broă lơh neh ờ geh uă. Den tàng sở neh dan mờ UɃÑZ càr bơtơl khà rơwah nàng rơwah jơh kơnòm bơsram tàm ală tiah kal ke in. Gam gơwèt mờ tiah ƀuơn den sở kung gam đơng lam là rơwah di jăt khà geh ai, mìng gam 900 nă kơnòm bơsram tai”.

Lơyài tàm broă tsăc rơwah kung là bơta mùl màl tàm càr Dăk Lăk. Jăt ồng Phạm Đăng Khoa, Kwang atbồ Sở Giáo dục mờ Đào tạo càr Dăk Lăk yal, sở gam lơh ngan chồl mhar broă do, tàm hơ̆ uă ngan là bơh nam bơsram 2023-2024: “Săc rơwah là dùl tàm ală broă lơh gam ờ pràn bơh gah bơto bơtê mờ bơsram càr Dăk Lăk dê. Bè ală nam den bol añ rơwah rơlao 80% khà kơnòm bơsram jơh bơsram kấp 2 mŭt bơsram ơdŭ 10, den nam bơsram 2022-2023 bol añ neh tơmù gam hờ đơm 80%. Nam pơn jăt tai geh tơmù mìng gam 75%. 25% gam tai geh tam gơl bơsram broă lơh. Mờ bè hơ̆, nàng gàr niam broă rơndăp tam cah bơh Cíñ phủ dê”.

Săc rơwah kơnòm bơsram tơnơ̆ mờ kâp 2 là tơngu me dờng ngan bơh broă rơndăp lơh “Bơto broă lơh mờ ai gùng dà tam cah kơnòm bơsram tàm broă bơto phổ thông tơngai bơh nam 2018 tus 2025”, geh kĭ tàm kơrnoăt sồ 522 ngai 14 nhai 05 nam 2018 bơh Thủ tướng Cíñ phủ dê. Jăt broă rơndăp lơh do, tus nam 2025, ală càr, ƀòn dờng pal geh tam cah is ờ uă ngan 40% khà kơnòm bơsram jơh bơsram kấp 2, mờ tiah gơtìp kal ke, khà săc rơwah is ờ uă ngan là 30%. Mơya, broă ờ tơl hìu bơsram, ơdŭ bơsram kấp kơnhoàl tiah Tây Nguyên gam là bơta kal ke dờng ngan gơwèt mờ jơnau kờñ bơh broă rơndăp lơh do dê.

Cau mblàng Ndong Brawl