Liên đoàn Lao động càr Gia Lai pơgồp bal mờ Ủy ƀan Ñân zân càr Gia Lai bơyai lơh dơ̆ Lam lơh Nhai lơh broă bè lơngap lơngai kloh niam lơh broă mờ Nhai kông ñân nam 2023. Mpồl lơh broă bơyai lơh ală broă lơh bè: Dơ̆ sơnđờm mut lơh khà tàm pơrlòng bơlai kƀàng tàm kông ñân viên cứk, cau lơh broă gùt càr dơ̆ 5, jàu pà phan ai ală đoàn viên, ơruh pơnu gơbàn kòp kơn jơ̆, geh rài kis kal ke; jàu 11 nơm “hìu ơm ram mhŭ kông đoàn” ai cau lơh broă kal ke bè hìu ơm in... Mò Rơ Ma Nga, Phó Củ tịch Liên đoàn Lao động càr Gia Lai pà gĭt: Nàng lơh ngan ngồn tơngume nam “Sền gròi broă lơh, rài kis ai cau lơh broă in; pơnđơl pràn lơh ngan lơh sir uă ngan rlau jơh ală jơnau kờñ, kơnòl broă bơh Nghị quyết Pơrjum dờng dơ̆ XII Kông đoàn lơgar Việt Nam dê” mờ broă lơh, bơh tàm bồ nam tơn Liên đoàn Lao động càr Gia Lai neh ai lơh jat sră nggal pơlam gùng dà sồr lơh, bơto pơlam bè sền gròi rài kis phan bơna, nùs nhơm ai đoàn viên, cau lơh broă in.

Mò Rơ Ma Nga, đơs:“ Liên đoàn Lao động càr Gia Lai sùm sền gròi broă dong kờl bơta kwơ geh ngan bơh đoàn viên mờ cau lơh broă in, tơngŏ bơh broă dong kờl bè phan bơna, dong kờl bè nùs nhơm, dong kờl bè gơnoar kwơ cíñ trị ai đoàn viên mờ cau lơh broă in. Bơh hơ̆, mpồl lơh broă neh sồr ală kấp kông đoàn sùm tam gơl pa, bơceh lơh, bè broă lơh lam lơh jat, lơh jat mờ uă bơnah broă geh ngan. Mpồl neh mờ gam, sùm jòi broă bơceh lơh, ai tơlik mờ lam lơh ală broă lơh niam ngan rlau jơh nàng sền gròi geh cồng nha ngan ngồn bơh đoàn viên, cau lơh broă in, mpồl cau lơh broă kwơ màng bơh mpồl bơtiàn dê.

 Lŏ Nhàn kis tàm ƀòn Breng, xã Ia Pết, kơnhoàl Đăk Đoa, càr Gia Lai tŭ do là cau atbồ mpồl 4, suơn tam prìt Hưng Sơn, xã Ia Pết dê. Nam do là nam dơ̆ 3 lŏ Nhàn geh lơh broă tàm do. Lŏ pà git, tàm ală ngai chờ, jơh 800 nă kông ñân ndrờm geh ai ơm ờ lơh broă, geh pà phan, ha là geh pà priă ngan nàng ală cau chờ hờp ơm rơlô chờ bal mờ cau tàm hìu nhă. Nam do, lŏ geh ơm 2 ngai, lŏ bal mờ cau tàm hìu rơcang geh bơyai lơh dơ̆ ơm rơlô geh kwơ ngan: “Kông ty geh sền gròi ngan tus mờ cau lơh broă, làng bol kis tàm ală ƀòn mŭt lơh broă ndrờm geh sền gròi, tam pà bal, tŭ gơtìp kòp tê jê să ndrờm geh sền gròi, dong kờl, bol añ iang nùs tŭ lơh broă tàm kông ty. Di tàm dơ̆ ngai 30 nhai 4 mờ ngai 1 nhai 5, kông ty kung ai cau lơh broă in geh ơm rơlô, kung geh pà phan ha là dong kờl priă den tàng làng bol iang nùs lơh broă, pơgồp bal bơta pràn nàng kông ty tơnguh bơtàu, cèng geh broă lơh kơl jăp ai làng bol in, dong kờl làng bol geh tai priă nàng tơn jơh jơgloh tơmù rơƀah, den tàng bol añ geh lơh broă, đềt mềr mờ kông ty, nàng kông ty tơnguh bơtàu ngai sơlơ dờng pràn rơlao”.

 Ală nam pa do tàm càr Kon Tum uă cau lơh broă kòn cau Sơdàng đơs is mờ cau lơh broă làng bol kòn cau dùl ết nă cau tàm tiah do dê đơs bal mut lơh kông ñân lơh broă tàm ală hìu măy, tiah lơh sa dờng. Bal mờ priă lơh geh bè ờs đau, rài kis hìu bơnhă geh tam gơl den broă tus bal lơh kông ñân neh dong cau lơh broă làng bol kòn cau dùl ết nă cau tam gơl jơnau kơlôi sơnơng tàm broă lơh sa. Bi A Rổi, Kwang atbồ Mpồl lơh sa sồ 01, Kông ty TNHH Một thành viên kơphê 704 tàm kơnhoàl Đăk Hà, pà gĭt: Mpồl lơh sa bơh bi dê geh 93 nă cau lơh broă là kòn cau Sơdàng, tŭ do gam sơng ka sền gàr 78 lồ kơphê tam nam dơ̆ 05. Broă tus bal lơh kông ñân neh dong ală cau lơh broă tam gơl nùs nhơm, broă lơh lơh mờ kwơ màng là gĭt tai bơta chài măy mok pa nàng ngui tàm broă lơh sa ròng phan nàng tơnguh uă priă lơh geh ai hìu bơnhă in.

Bi A Rổi, đơs: “Bơh tŭ mut lơh tàm Kông ty TNHH Một thành viên kơphê 704 den kwang bàng lòt tàm ƀòn bơto pơlam làng bol in broă tam mờ sơngka sền gàr kơphê, bơh hơ̆ priă lơh geh bơh làng bol dê ngai sơlơ gơguh. Nam do, kông ñâñ lơh geh priă jền ết ngan rlau jơh kung geh bơh 40 tus 50 tơlak đong dùl nă cau. Làng bol sền gŏ là: Đảng, Dà lơgar sền gròi ngan tus làng bol, bơto pơlam ai làng bol in broă lơh sa broă lơh, bơtàu tơnguh lơh sa, jơh nùs dong kờl làng bol tàm rài kis, mblàng yal ai làng bol in pal tam klăc kờñ gơboh bal, dong kờl bal tàm rài kis mờ tàm broă lơh. Tŭ mut lơh broă tàm kông ty den kông ñân geh gĭt mờ bơta chài ngui măy mok pa den tàng kông ñân chờ hờp ngan. Ưn ngài ngan Đảng, Dà lơgar, kông ty neh sền gròi tus làng bol tàm ƀòn geh broă lơh bè ờs đau, rài kis tam gơl pah ngai".

 Mờr 8 nam lơh broă tàm Kông ty Kổ phần Zu lịc siñ thái Ko Tam, tàm ƀòn dờng Buôn Ma Thuột, càr Dăk Lăk, lŏ H’ Sinh Êban, kis tàm ƀòn Kmrơng Prong B neh geh rài kis kơl jăp. Lŏ pà git, bơh tŭ mŭt lơh broă, lŏ geh kông ty ai geh ală gơnoar kwơ bè sền gàr bơta pràn kơl dang să jan jăt tơngai, bơsram tàp tơnguh uă bơta niam lơh broă. Kông đoàn kông ty kung dong kờl ai càn priă ờ sa priă cồng nàng lŏ lơh hìu, ròng kòn lòt bơsram. Lŏ H’ Sinh Êban, đơs: “Tàm tơngai lơh broă tàm di, añ geh bơsram lơh, bơto bơtê uă bơta chài bè jơnau yal bơta niam chài kòn cau ai cau năc lòt nhơl in geh uă rơlao. Bal mờ hơ̆ den rài kis mờ lơh sa hìu nhă kung geh gơguh niam rơlao. Kơnờm geh broă dong kờl bơh kông ty den lơh sa hìu nhă geh tơl ngui tơl sa, bơh tŭ hơ̆ iang nùs lơh broă mờ kis đềt mềr mờ kông ty”.

Là dùl tàm ală kơnhoàl geh dờp lơh sir broă lơh ƀòn lơgar pa gờñ ngan bơh Tây Nguyên dê, bal mờ bơt bơtàu mờ bơtàu tơnguh lơh uă ală broă jàu, kơnhoàl Đơn Dương, càr Lâm Đồng neh sền gròi broă lơh dong kờl bơt hìu ơm ai ală hìu bơnhă rƀah, kal ke tàm ù tiah kơnhoàl dê. Tơn jơh hìu ơm ing, hìu sèt là dùl tàm ală broă jàu kwơ màng wèt tus srơh bơt bơtàu Tiah làng bol ơm kis lam lài. Tơngai pa do, kơnhoàl Đơn Dương, càr Lâm Đồng neh hòi jà bơta dong kờl bơh mpồl kông đoàn, ală mpồl lơh sa kă bro mờ cau geh nùs nhơm niam tă pơgồp bal “Kes priă tài cau rƀah” mờ lam lơh dong kờl hìu ơm ai gĭt nđờ jơ̆t hìu bơnhă rƀah tàm kơnhoàl dê. Mìng kờp tàm nam 2022, Ủy ƀan Mặt trận Dà lơgar kơnhoàl Đơn Dương neh hòi jà geh 1 tơmàn 700 tơlak đong tơmŭt tàm kes priă. Bơh khà priă tă pơgồp do, mpồl lơh broă neh lơh jat broă dong kờl lơh geh 21 nơm hìu ơm tam klăc dờng kờp priă 1 tơmàn dong, lơh niam wơl 3 nơm hìu ơm tam klăc dờng mờ kờp priă 55 tơlak đong ai ală hìu bơnhă rƀah tàm kơnhoàl in.

Jat ồng Ya Tuân, Phó Củ tịc Ủy ƀan Mặt trận Dà lơgar Việt Nam kơnhoàl Đơn Dương, bơh bơta dong kờl do, ală hìu bơnhă kal ke neh bè ờs wơl tiah ơm, iang nùs bơcri priă lơh broă sa mờ uă hìu bơnhă neh brồ guh lik klàs rƀah

Ồng Ya Tuân, đơs: “Tơngai pa do, Ủy ƀan Mặt trận Dà lơgar Việt Nam kơnhoàl mờ Mpồl hòi jà Kes priă tài cau rƀah sùm sền gròi lam lơh broă lơh dong kờl ai cau rƀah in mờ broă lơh gàr niam rài kis mpồl bơtiàn gơwèt mờ ală hìu bơnhă rƀah mờ hìu bơnhă ndrờm bè rƀah. Ngan là, gơwèt mờ ală broă lơh ai hìu bơnhă rƀah in bè tơn jơh hìu ơm ing, dong kờl sơntìl phan tam, phan bơna lơh sa suơn sre drơng broă lơh sa mờ dong kờl kơnòm bơsram rƀah in sơr lèt gan kal ke... là ală tơngume gam geh sền gròi lơh jat tàm tiah làng bol kòn cau dùl ết nă cau dê”.

Ồng Điểu Chônh, 74 sơnam, kis tàm ƀòn Sre 1, xã Dăk Ru, kơnhoàl Dăk Rlấp yal, sền dà lơgar tam gơl pa tơnơ̆ mờ tơnklàs nam 1975, rơnàng kơnòm să tŭ do ñhăp ñhar, git wă, ồng chờ hờp ngan. Tŭ do hìu lơi kung geh tơl piang sào, ào soh, gùng lòt ƀuơn niam, kòp tê jê să geh sơm kòp di tŭ, oh kòn geh lòt bơsram... Ồng Điểu Chônh yal: “Lài mờ tơnklàs dà lơgar lòt ntrờn tus tàm gùt tiah, tơnơ̆ mờ tơnklàs bol añ rê mờ ƀòn lơgar, tŭ hơ̆ rài kis kal ke ngan, gùng lòt, ồs đèng ờ hềt geh. Tus nam 1993 hơ̆ sồng geh cò gùng lòt tus tàm do, hơ̆ sồng làng bol sơn đờm tơnguh bơtàu lơh sa, tơrgùm lơh sa suơn mìr, tus tŭ do rài kis neh kơl jăp rơlao bloh, geh tơl sa, tơl soh, lơh sa hìu nhă geh uă hìu tơnguh bơtàu ngan. Tŭ do neh geh gùng lòt ƀuơn, geh uă cau lòt lơh broă tàm tiah ngài kung ƀuơn, kòp tê jê să tus sơm kung rềp, cau lơi kòp jroă den lòt tus hìu sơnơm kơnhoàl, càr. Đơs ngan tŭ do hìu đam, rài kis kung neh niam rơlao uă ngan bloh. Oh kòn geh lòt bơsram, geh gùng lòt ƀuơn, ờ gam kal ke bè lài do tai. Kơ̆p kờñ ƀòn lơgar ngai sơlơ tơnguh bơtàu rơlao”.