Kàl rlô bơkang do, pah tŭ trồ mho, tơnau re dà tàm anih tờm lơh broă ơruh pơnu, kơnòm pa tàu, kơnòm dềt càr Gia Lai pờ mpồng nàng bơto re dà ờ sa priă ai ơruh pơnu, kơnòm pa tàu, kơnòm dềt geh rài kis kal ke tàm ƀòn dờng Pleiku, càr Gia Lai. Tàm pah dơ̆ bơsram, bơdìh mờ bơto bơta chài re dà, ală oh gam geh pơlam, tàp lơh ngan ngồn re dong cau gơtìp bŭ dà, bơta chài dong kờl bơh sơn rờp tŭ gơlik geh bŭ dà. Oh Võ Mạnh Cường, kơnòm bơsram tàm ƀòn dờng Pleiku đơs: “Hìu bơnhă kal ke den tàng ờ geh priă lòt bơsram, ngai do tàm hìu lơh broă ơruh pơnu, kơnòm pa tàu, kơnòm dềt càr Gia Lai pờ mpồl re dà ai ală oh geh rài kis kal ke in, oh kờñ ngan mờ neh cih mat tus bal mơ. Pơgru bơto oh in ală bơta chài re dà bè re kit, re jòng”.

Bi Nguyễn Tiến Thịnh, cau pơlam tàp bơh Mpồl re dà ơruh pơnu, kơnòm pa tàu, kơnòm dềt càr Gia Lai pà git, tus bal ơdŭ bơsram, ală oh dềt geh pơlam tàp bơta chài pal geh bè git ală chài bè jơng, tê, tă nhơm. Bơdìh mờ ală bơta re sơplàng, re kit, re jòng, re khat gơboh, bi Nguyễn Tiến Thịnh gam tàp tai bơta chài rơcang lài kơryan bŭ dà mờ bơsong ală broă gơlik geh: “Tŭ mpồl pờ ală ơdŭ bơto re dà ờ sa priă, să tờm añ kung lòt bơto ală oh in bơta chài re dà, rơcang lài kơryan bŭ dà, bơto ală oh in git nàng tŭ ală oh tìp ală broă gơlik geh tàm tơnau dà, dà dờng den ală oh gơtùi dong is să tờm halà dong cau ndai, dong bơto ală oh in bơta chài rơcang lài kơryan bŭ dà”.

Ai kòn lòt bơsram ơdŭ bơto re dà ờ sa priă, ồng Trần Văn Thanh ơm tàm sơnah ƀòn Hoa Lư, ƀòn dờng Pleiku kơp kờñ kòn ồng dê geh pơlam tàp pràn kơldang să jan tàm tiah niam, kung bè geh bơta chài re dà niam: “Añ gŏ tŭ do kơnòm dềt chơt bŭ dà uă ngan, den tàng añ kờñ ai kòn añ dê lòt bơsram nàng sau in git re dà, pah ngai rlô jun kòn tus ndo re dà nàng sau in chài rlau, tơnơ̆ do gơlik geh bơta lơi den kung gơtùi dong is să tờm khai dê”.

Tàm càr Kon Tum, poh lài kung neh mut lơh kàl rlô bơkang, ngai Olympic kơnòm dềt mờ lam lơh jơh gùt làng bol tàp re dà rơcang lài kơryan bŭ dà, mờ bơta tus bal bơh rlau 1 rbô 300 nă oh dềt dê. Tàm dơ̆ bơyai lơh, Mpồl bơyai lơh neh lam lơh mờ hòi jà ală kâp, ală gah broă lơh bơh càr Kon Tum dê gàr sùm, lam lơh uă srơh tàp pràn să jan đơs bal mờ re dà đơs is.

Bơta bŭ dà sùm gơlik geh, ngan là gơ wèt mờ kơnòm dềt tàm kàl rlô bơkang. Nàng gàr lơngăp lơngai ai mờr 168 rbô nă kơnòm bơsram bơh càr dê tàm kàl rlô bơkang nam do, càr Kon Tum hòi jà ală kâp, ală gah broă lơh, hìu bơsram, hìu bơnhă mờ jơh gùt mpồl bơtiàn sơlơ sền gròi nàng kờñ tơrmù ƀà rềs àr sồt să, ngan là rềs àr bŭ dà gơ wèt mờ ală oh dềt. Ồng Nguyễn Xuân Truyền, Phó Kwang atbồ Sở Văn hóa, Thể thao mờ Zu lịc càr Kon Tum pà git, kàl rlô bơkang do rơp hòi jà jơh ală bơta tơnau re dà nàng lam lơh bơto re dà, bơto bơtê mờ mblàng yal bè bơta chài rơcang lài kơryan rềs àr bŭ dà kơnòm dềt in: “Kơp kờñ là ală bơyô đoàn viên, ơruh pơnu, cau bơsram dờng, ală kơnòm bơsram ală kâp, mè bèp mờ jơh gùt làng bol ờ mìng jơh nùs tàp re dà  mờ gam là dùl nă cau mblàng yal jơnau, hòi jà gơp bơyô, cau pròc mhàm tờm he dê bơsram jơnau git wă, bơta chài rơcang lài kơryan bŭ dà, pơgồp bơnah rơhời tơrmù ƀà rềs àr bŭ dà tàm gùt càr nàng wèt tus jơnau kờñ “Hìu lơngăp lơngai”, “Hìu bơsram lơngăp lơngai” mờ “Mpồl bơtiàn lơngăp lơngai”.

Tàm càr Lâm Đồng, Dơ̆ mut lơh kàl rlô bơkang, Olympic kơnòm dềt mờ lam lơh jơh gùt làng bol tàp re dà, rơcang lài kơryan bŭ dà tàm kơnòm dềt nam 2024 kung neh geh bơyai lơh tàm ƀòn dờng Dà Làc. Dơ̆ bơyai lơh geh lơh nàng kờñ hòi jà kơnòm dềt tàm gùt càr jơh nùs tus bal ală broă lơh tàp pràn să jan, nhơl ñŏ lơh prài bồ tơngoh tàm kàl rlô bơkang, tơnguh pràn kơldang să jan, bơta chài kis, kuơmàng là broă tàp re dà, rơcang lài kơryan bŭ dà kơnòm dềt in.

Việt Nam là dùl tàm ală lơgar geh uă kơnòm dềt gơtìp bŭ dà pah nam tàm dunia. Tàm Lâm Đồng, tàm nam lài, neh geh 20 nă cau chơt bŭ dà, ală nhai bồ nam 2024 do, tàm gùt càr tus tŭ do neh geh 10 nă cau gơtìp bŭ dà. Ủy ƀan Ñân zân càr Lâm Đồng sồr ală gah broă lơh, ală kâp tàm càr pal pơgồp bal niam tàm broă lam lơh ală broă lơh kàl rlô bơkang ai kơnòm bơsram in kung bè lam lơh niam broă hòi jà bơyai lơh kơnòm dềt, kơnòm bơsram ală kâp in bơsram re dà, bơyai lơh ală dơ̆ pơrlòng re dà kơnòm bơsram, ơruh pơnu, kơnòm pa tàu tàm nam kung bè tàm kàl rlô bơkang nàng kờñ tơnguh khà kơnòm dềt, kơnòm bơsram git re dà tàm càr; tơrmù tus khà lơyah ngan rlau jơh ală bơta bŭ dà nđàc sơnggit ngan.