Git nđờ jơt nam tac bro phan lơh gơs bơh suơn sre, mò Nguyễn Thị Long ơm tàm thị trấn Quảng Phú, kơnhoàl Cư Mgar, càr Dăk Lăk pà git, ờ hềt tŭ lơi mờ jơh bal tiêu, kơphe ndrờm geh giă bè tơngai rềp ndo. Giă gơguh jơnhua mơya pah ngai mò mìng blơi geh mờr 20 tấn tiêu, ndrờm nggùl pơn drờm mờ ală nam lài. Jat mò Long đơs, khà tiêu blơi gơmù là tài 2, 3 bă ù tam tiêu neh tam gơl tam chi tam ndai, mờ làng bol gam prap phan nàng kơp giă gơguh jơnhua rlau tai: “Giă kơphe mờ giă tiêu nam do den gơguh jơnhua ngan. Làng bol lơh broă sa chờ hờp ngan. Mờ làng bol mìng tac dùl êt lơm, khi kung gam prap wơl nàng kơp giă gơguh tai. Tac bro phan lơh gơs bơh suơn sre bè anih blơi añ dê kung lời wơl dùl êt nàng kơp giă gơguh jơnhua hơ̆ sồng tac”.

Bơta pràn bơh ală bơta phan lơh gơs bơh suơn sre neh dong broă lơh tac phan hờ lơgar ndai bơh ală càr dê geh uă đau tàm ală nhai bồ nam 2024. Priă lơh geh bơh tac phan hờ lơgar ndai tàm quý 1 bơh càr Gia Lai dê geh rlau 306 tơlak dolar Mỹ. Tàm càr Dăk Lăk, priă lơh geh bơh tac phan hờ lơgar ndai kờp dŭ geh 495 tơlak dolar Mỹ. Ồng Huỳnh Ngọc Dương, Phó Kwang atbồ Sở Kông thương càr Dăk Lăk pà git, bal mờ giă tac dong tơnguh priă lơh geh bơh tac phan hờ lơgar ndai, phan lơh gơs bơh suơn sre tac hờ lơgar ndai bồ nam 2024 gam geh ală tềl tơnggŏ chờ hờp ndai: “Geh tai ală phan bơna pa, mpồl lơh sa kă bro pa mờ drà kă bro pa bè yến sào. Dơ̆ 2 là mờr 14 bơta plai chi, biap, kơnuh tac hờ lơgar ndai uă jat sră pơrgon tus lơgar Lo den Dăk Lăk ndrờm geh tơl ală bơta phan do. Mờ bơta kuơmàng tai là phan lơh gơs bơh suơn sre lơh gơlik uă nàng tac hờ lơgar ndai cèng mat sơnđan bơh càr Dăk Lăk dê neh sơn đờm geh mat tàm ală anih tac phan kas màng bơh lơgar ndai dê”.

Bơdìh mờ ală bơta ƀuơn, tàm quý 1, ală càr Tây Nguyên kung gam 2, 3 bơta kal ke; hơ̆ là kòl yan tàm broă ai ù lơh rơndap broă drơng ală broă lơh kuơmàng, lơyài lam lơh ai priă bơcri dà lơgar… Bơdìh mờ càr Kon Tum, jơh ală càr ndai tàm tiah Tây Nguyên ndrờm geh khà ai priă bơcri tàm quý 1 lơyah hơ đơm khà kờp bal gùt lơgar dê (13,67%). Ồng Nguyễn Tuấn Anh, Phó Củ tịc Ủy ƀan Ñân zân càr Gia Lai sồr lơh ală mpồl lơh broă nàng bơsong ală kal ke do: “Kwang atbồ ală Sở, kwang atbồ ală gah broă lơh, mpồl lơh broă jat tàm gơnăp gơnoar, kơnòl broă geh jàu nàng tơrgùm lam lơh geh cồng nha ală kơnòl broă mờ jơnau sồr lơh bơh Ủy ƀan Ñân zân càr dê. Rơcang lài bơsong ală bơta ờ niam nàng pơn jat tai lơh ngan sồr lơh, tam pà lam lơh ală sră nggal bơcri priă, tơnguh mhar tơngai lam lơh mờ ai priă bơcri dà lơgar, ngan là lam lơh 3 broă lơh jơnau kờñ dà lơgar”.

Tàm càr Dăk Lăk, 2, 3 rơndap broă lơh lam lơh lơyài neh uă nam mơya ờ hềt tam gơl sơl. Pơn yơu bè Rơndap broă lơh Gùng Hồ Chí Minh gơl gùng pleh hờ tiah đah mat tơngai lik ƀòn dờng Buôn Ma Thuột. Ồng Phạm Ngọc Nghị, Củ tịc Ủy ƀan Ñân zân càr Dăk Lăk đơs là, priă bơcri ờ di là ờ tơl, jơnau sồr ờ gơ kờl, bơta do ai gŏ ală anih lơh broă, mpồl lơh broă ờ hềt lơh jơh kơnòl gơ dê: “Sồr ală oh mi Củ tịc (Ủy ƀan Ñân zân kơnhoàl, ƀòn dờng) là pal kràñ cê, dilah ờ den gam gơ ơm tàm sră sùm. Geh ală broă pal tàm jàu pah poh, ơn tàm kơƀàng kwang đơng lam bồ ủy ƀan dê nàng sền sơ wì rơndap broă lơh do tus kàr lơi den hơ̆ sồng geh ală broă rơndap lơh bơsong mùl màl”.

Broă niam ngan rlau jơh tàm quý 1 nam do gơ wèt mờ càr Dăk Nông là bơyai lơh geh cồng nha uă broă lơh tơngkah 20 nam ngai crơng gơs wơl càr. Broă lơh hòi jà bơcri priă lơh geh cồng nha tŭ gơ hòi gơ jà ală rơndap broă lơh mờ kờp jơh priă bơcri cih tàm sră là 1 rbô 700 tơmàn đông, kĭ cih kah lơh broă bal mờ uă tập đoàn, kờp dŭ lài tàm bơcri priă kờp jơh khà priă 8 tơmàn 400 tơlak đông. Rơndap broă lơh gùng rơndeh ntoat mhar gơl Gia Nghĩa (Dăk Nông) – Chơn Thành (Bình Phước), Cíñ phủ neh geh sră yal sồr Quôk hội lơh nền rơndap broă bơcri priă. Ồng Ngô Thanh Danh, Ƀí thư tỉñ ủy càr Dăk Nông pà git: “Pơn jat tai rơcang lài pơgồp bal mờ ală ƀộ, gah broă lơh dà lơgar mờ càr Bình Phước nàng di tŭ lam lơh mơ ală tơngume gơ rềng tus rơndap broă lơh gùng rơndeh ntoat mhar Gia Nghĩa (Dăk Nông) – Chơn Thành (Bình Phước) tŭ geh jơnau lơh nền bơcri priă bơh ală anih lơh broă geh gơnoar dê. Den tàng Ủy ƀan Ñân zân càr, Sở Giap thông vận tải , kơnhoàl Dăk Rlâp lơh broă mơ, bơt bơtàu broă rơndap lơh mơ, rơndap wơl ƀòn ơm kis tềng lơi, kơlôi rơcang rài kis làng bol bè lơi, gàr lơngăp lơngai rài kis mpồl bơtiàn bè lơi… Añ sồr Ủy ƀan Ñân zân càr mờ ală sở, gah broă lơh geh gơ rềng pal git sùm”.

Ală nhai bồ nam 2024, ală càr Tây Nguyên neh gàr kơ̆ lơngăp lơngai cíñ trị, lơh sa mpồl bơtiàn geh ală tềl tơnggŏ bơtàu tơnguh mơya kung gam geh uă bơta kòl yan. Loh làng nàng lơh gơtùi mờ sơrlèt rlau ală broă jàu nam 2024 dê, ală tiah pal pơn jat tai tơngguh kơnòl, kràñ cê, jơh nùs, di tŭ mờ pơgồp bal jơh nùs, ring bal, geh cồng nha tàm broă sồr lơh, đơng lam mờ nùs nhơm “5 lơh ngan”, “5 hơ pơrgon”, “5 sơlơ tơnguh tai” jat jơnau sồr bơh Cíñ phủ dê.