Ea Súp là kơnhoàl tiah nhàr dà lơgar bơh càr Dăk Lăk dê ơm ngài ƀòn dờng Buôn Ma Thuột mờr 85 kơi sồ. Tàm 5 nam do, kơnhoàl Ea Súp geh bơcri priă lơh 80 broă lơh bơt bơtàu phan bơna tàm 9 xã mờ kờp jơh priă tă lơh rlau 91 tơmàn đông. Bơdìh hơ̆ tai, kơnhoàl neh tơrgùm dong kờl lơh pa mờ lơh niam wơl 637 nơm hìu mờ kờp jơh khà priă rlau 20 tơmàn đông. Tàm kơnhoàl geh mờr 20 rbô hìu bơnhă rƀah, hìu bơnhă ndrờm bè cau rƀah geh càn priă dong kờl priă cồng nàng bơcri lơh sa, kă bro geh cồng nha. Ồng Y Mlai Byă, ơm tàm ƀòn Ea Súp, thị trấn Ea Súp pà git, bal mờ bơcri priă bơtàu tơnguh lơh sa, làng bol sền gròi ngan tus broă sền gàr bơta niam chài kòn cau he dê: “Ưn ngài Đảng, Dà lơgar, ưn ngài ală cau atbồ ƀòn sùm tề lam cau kơnòm să git sền gàr niam chài kòn cau, bơtàu tơnguh lơh sa, tìp mat lơh kwèng, bơsram đòm jat, rài kis bơtàu tơnguh mờ nùs nhơm tam klac bal niam bơnĕ. Tàm nam pa, añ kơp kờñ làng bol kòn cau he geh hờm ram, chờ hờp, kòn sau bơsram gơs cau jak chài, ală nghệ ñân dờng sơnam mblàng wơl, bơto wơl kòn sau he in git bơta niam chài kòn cau Rơđê dê”.

Ồng Y Mlúi, kòn cau Jrai là cau geh bơngă pin dờn ơm tàm ƀòn Weh, xã Hà Bầu, kơnhoàl Đăk Đoa, càr Gia Lai sền gŏ: Nam 2022 làng bol chờ hờp ngan tài bơh ală broă lơh sa- mpồl bơtiàn, lơh broă lơh sa neh geh gơ rê wơl bè ờs. Làng bol iang nùs lơh sa, tăc bro. Uă hìu bơnhă neh lơh geh hìu pa niam bơnĕ ngan. Ồng Y Mlúi, đơs: Tus tŭ do, làng bol chờ hờp ngan tài bơh lơh broă lơh sa iang nùs ngan. Tŭ do, làng bol chờ hờp, tơrgùm lơh sa, bơtàu tơnguh lơh sa mờ iang nùs lơh sa. Tam mờ sền gàr kơphê, lơh hìu niam bơnĕ, geh anih ơm, anih pic ram mhŭ. Ală gùng dà, broă lơh dờng bơh Đảng, Dà lơgar dê sồr lơh geh làng bol lơh jăt di; làng bol chờ hờp ngan geh rài kis bè ngai do. Să tờm ồng, hìu bơnhă bol añ kung neh iang nùs lơh sa, tài bơh nam do kơphê geh uă, tăc kung geh giă sơl, cồng nha lơh broă tàm nam pa do ndrờm gơguh den tàng làng bol sơlơ dờp geh bơta chờ hờp uă rlau tai.

Ƀòn U2, ơm tàm tiah tàm gùl thị trấn Ea Tling, kơnhoàl Cư Jut, càr Dăk Nông. Ƀòn tŭ do geh rlau 320 hìu bơnhă mờ mờr 1 rbô 600 nă cau, tàm hơ̆ kòn cau M’nông geh rlau 25%. Rài kis ƀòn dê uă ngan là kơnờm tàm ală bơta chi tam geh bơta kuơ uă bè: kơphe, tiêu, điều; ală bơta chi tam lơyah ngai ndai mờ ròng phan 4 jơng, iar ơda. Ồng Y Ghông, kra ƀòn ƀòn U2, dùl nă cau dờng sơnam pà git: “Lài do lài mờ tŭ tơngklàs, rài kis làng bol kòn cau M’nông dê gam uă kal ke, ờ tơl piang sàu àu soh. Ai tŭ do geh Đảng, dà lơgar sền gròi, tàm ƀòn U do rài kis làng bol dê neh bơtàu tơnguh rlau, ờ huan geh hìu bơnhă rƀah tai. Mìng geh ờ lah lơh broă hơ̆ sồng gam rƀah. Tŭ do bơcah bơcài ngan broă lơh, tam tiêu, kơphe, điều, bùm lô, khoah rbài… tơnhàu jơh phan do tus phan ndai, ờ gơtìp jơgloh ờ, tơl sa tơl ngui. Bè hìu bơnhă añ lơh sre nam do tơnhàu geh pơgap 70 tus 80 ƀàu kòi, tơl sa đau, ờ gơbàn jơgloh ờ”.