Lồi poh lài, Ủy ƀan Ñân zân xã Ea Tul, kơnhoàl Cư Mgar, càr Dăk Lăk bơyai lơh “Ngai chờ jơh gùt làng bol sền gàr lơngăp lơngai dà lơgar nam 2023”. Tus bal ngai chờ geh Phó Thủ tướng Cíñ phủ ồng Trần Lưu Quang, ala mat kwang đơng lam bồ Ƀộ Kwang àng, Tỉñ ủy, Ủy ƀan Ñân zân càr Dăk Lăk bal mờ ală sở, gah broă lơh tàm càr.

Ală nam do, srơh jơh gùt làng bol sền gàr lơngăp lơngai dà lơgar tàm Ea Tul geh lam lơh làm uă tàm jơh ală thôn, ƀòn mờ lơh geh ală cồng nha pal pơn jờng ngan. Ală gah broă jơi bơtiàn, jat yàng, lơngăp lơngai ƀòn lơgar geh gàr kơ̆; cau tìs, brpoă lơh tìs hìñ sự geh tơrmù, pơn jat tai gàr kơ̆ ù tiah ờ geh ma túy, ờ gơlik geh bơta rềs àr gùng lòt, dơlam is gơnoar atbồ tam klac bal, tài làng bol drơng lơh, làng bol tam klac bal, pin dờn tàm Đảng, gơnoar atbồ. Ồng Y Uốt Ayun, Ƀí thư Đảng ủy xã Ea Tul, kơnhoàl Cư Mgar yal, tŭ do 10 ƀòn mờ 1 thôn ndrờm geh crăp camera jat sền lơngăp lơngai, mờ lơh mpồl atbồ is. Ồng Y Uốt yal bè mờng chài bơh srơh jơh gùt làng bol sền gàr lơngăp lơngai dà lơgar tàm xã dê tàm tơngai lài: “Tàm tơngai lài, kwang àng cíñ quy rê tàm xã den neh dong kờl lơh ală mpồl atbồ is, pah mang lòt gròi sền, gàr niam lơngăp lơngai, rơndap tap sèng ring lơngai tàm ù tiah ƀòn lơgar. Kơnờm bơh hơ̆ tàm xã ờ hềt gơlik geh broă tung kơñau lơi. Bơdìh hơ̆ tai, mpồl lơh broă geh gơnoar gam jơh nùs hòi jà cau kơnòm să, ală sau kơnòm bơsram sùm geh mờng kwèng kis niam, atbồ niam ală cau tìs tàm ù tiah ƀòn lơgar”.

Tus bal ngai chờ, Phó Thủ tướng Cíñ phủ ồng Trần Lưu Quang cih dờp, jờng rơ mờ đơs niama lă cồng nha mờ Đảng ƀộ, gơnoar atbồ mờ làng bol xã Ea Tul neh lơh geh tàm tơngai lài. Phó Thủ tướng kơp kờñ Đảng ƀộ, gơnoar atbồ mờ làng bol xã Ea Tul pơn jat tai đòm jat nùs nhơm tam klac bal, rơcang lài tàm srơh jơh gùt làng bol tam klac bal sền gàr lơngăp lơngai, rơndap tap sèng ring lơngai tàm ƀòn lơgar, ngac ngar tàm broă dră wơl ală jơnau đơs blac pơr lồm, ờ ngan, dră wơl Đảng, dà lơgar mờ lơh roh bơta tam klac bal jơi bơtiàn tàm ù tiah xã dê đơs bal, càr Dăk Lăk đơs is, nàng pơgồp bơnah bơt bơtàu mpồl bơtiàn geh rơndap tap sèng ring lơngai, lơh jat kơrnuat boh lam, lơngăp lơngai, gàr niam rài kis ring lơngai bơh làng bol dê. Phó Thủ tướng ồng Trần Lưu Quang sồr Đảng ƀộ, gơnoar atbồ mờ làng bol xã Ea Tul gròi sền 2, 3 bơta tơnơ̆ do: “Pơn jat tai lam lơh jat jơh nùs, geh cồng nha ală jơnau đơng lam bơh Dà lơgar dê bè lam lơh srơh jơh gùt làng bol sền gàr lơngăp lơngai dà lơgar. Ngui niam gơnoar broă lam lài bơh mpồl kwang àng cíñ quy, mặt trận dà lơgar, ală mpồl bal, mpồl cau sùm lòt sền, sồr lơh nàng bơsong ală bơta ờ niam dilah geh, nàng lam lơh geh cồng nha srơh do. Ai srơh ngai sơlơ bơtàu tơnguh tàm jơh ală bơta, ngan ngồn, ngai sơlơ geh cồng nha nàng jơh gùt làng bol in jơh nùs tus bal”.

Pa do, mò Trương Thị Ngọc Ánh, Phó Củ tịc Ủy ƀan Mặt trận dà lơgar Việt Nam kung neh tus bal Ngai chờ jơh gùt làng bol sền gàr lơngăp lơngai dà lơgar tàm xã Ngọk Wang, kơnhoàl Đăk Hà, càr Kon Tum. Tơngai lài, Mpồl đơng lam rơcang sơndră cau tìs, broă lơh tìs tàm mpồl bơtiàn mờ bơt bơtàu srơh jơh gùt làng bol sền gàr lơngăp lơngai dà lơgar kơnhoàl Đăk Hà neh tă pơgồp jơnau đơs ai Huyện ủy kơnhoàl, Ủy ƀan Ñân zân kơnhoàl in lam lơh jat geh cồng nha ală jơnau đơng lam bơh dà lơgar mờ bơh càr Kon Tum dê tàm gah do. Kơnhoàl Đăk Hà neh lơh 188 dơ̆ mblàng yal bè srơh jơh gùt làng bol sền gàr lơngăp lơngai dà lơgar ai rlau 37 rbô 400 dơ̆ cau in. Làng bol neh yal mpồl kwang àng in 70 jơnau tơnggit geh kuơ, jàu is uă phan tam lơh mòn is mờ phan bơrtoh.

Đơs tàm ngai chờ, mò Trương Thị Ngọc Ánh, Phó Củ tịc Ủy ƀan Mặt trận dà lơgar Việt Nam đơs niam cồng nha lơh geh bơh kơnhoàl Đăk Hà, càr Kon Tum dê tàm broă mblàng yal, hòi jà mờ lam lơh srơh jơh gùt làng bol sền gàr lơngăp lơngai dà lơgar; ai tơnggŏ bơta gơtha kuơmàng bơh srơh dê gơ wèt mờ bơta lơngăp lơngai, rơndap tap sèng ring lơngai bơh kơnhoàl dê. Tềng đap broă ală mpồl sò tơm lơh bal mờ ală mpồl pơ lơ̆ dră tàm lơgar bơdìh bơ chồt, lơh tam cah is mpồl tam klac dờng jơh gùt jơi bơtiàn mờ lam lơh ală broă lơh dră wơl, lơh aniai gơnoar atbồ làng bol, mò Trương Thị Ngọc Ánh sồr: “Mpồl đơng lam pơn jat tai sơlơ tă pơgồp jơnau đơs nàng kâp ủy geh broă lơh, geh ală jơnau đơng lam kràñ cê rlau gơ wèt mờ srơh. Ală broă lơh bơh ală anih lơh broă geh jơng tàm mpồl đơng lam jat jat jơnau đơs wèt hờ kâp hơ đơm, ơm rềp ù tiah ƀòn lơgar, git di tŭ broă tàm làng bol, git di tŭ bơta kơp kờñ mờ bơsong di tŭ, dipal ală jơnau đơs dipal bơh ală rơnàng làng bol dê. Sồr ală oh mi pal sơlơ tơnguh rlau tai broă lơh yal tơnggit jơnau mblàng yal, broă lơh bơto bơtê adat boh lam gơ wèt mờ làng bol”.