Pa do, tàm Hìu rông ƀòn Vi Rơ Ngheo, xã Đăk Tăng, UɃÑZ kơnhoàl Kon Plông bơyai lơh yal kơrnoăt bơh UɃÑZ càr Kon Tum dờp ƀòn lòt nhơl mpồl bơtiàn Vi Rơ Ngheo mờ tơlik măt Hợp ták xã lòt nhơl Vi Rơ Ngheo. Ƀòn Vi Rơ Ngheo, xã Đăk Tăng ngài mờ thị trấn Măng Đen, kơnhoàl Kon Plông pơgăp 40 kơi sồ hờ đah măt tơngai mŭt. Tàm ƀòn geh 63 hìu mờ pơgăp 300 nă làng bol, jơh ală làng bol do ndrờm kòn cau Sơdàng dê lơm. Tài ơm tam cah is tàm gùl brê bơnơm, làng bol git tàm broă prăp gàr ală bơta kwơ niam chài ờs mờng den tàng ƀòn Vi Rơ Ngheo tŭ do kung gam prăp gàr geh uă bơta niam bè hìu đam, rài kis lơh broă sa kòn cau Sơdàng dê.

Nàng bơ̆t bơtàu ƀòn Vi Rơ Ngheo gơs ƀòn lòt nhơl mpồl bơtiàn geh UɃÑZ càr Kon Tum dờp, bơh pơgăp mờ do 4 nam, tềng đăp mờ jơnau bơto sồr bơh ală kấp, gơnoar atbồ bal mờ gah lơh broă geh gơnoar tàm càr do, làng bol kis tàm ƀòn neh ngui ală phan geh lài, bè dơm chi, lŭ tàm croh dà nàng lơh geh bơta niam ù tiah ƀòn lơgar. Ồng Phạm Văn Thắng, Phó Củ tịc UɃÑZ kơnhoàl Kon Plông pà git, ală broă rơndăp lơh mùl màl nàng ƀòn Vi Rơ Ngheo gơs ƀòn lòt nhơl niam tàm jơh broă tơnguh bơtàu lòt nhơl bal bơh kơnhoàl dê: “Bol añ lam sồr tơl hìu lơh wơl jơh ală bơta kwơ niam chài. Bol añ lơh tơl mpồl hìu nàng tơnguh bơtàu bè biăp sa. Ală hìu ròng iar, ơda, sur hơ̆ sồng bơyai lơh trŭ sa. Ai gŏ phan sa tàm do là biăp, kơnuh, plai chi tàm do hơ̆ sồng ka tàm croh dà gam tai là ală bơta ndai là ròng sur, ròng ơda hơ̆ sồng ròng iar tàm ƀòn do nàng tŭ geh cau năc tus pal trŭ geh ală phan sa geh lơh ƀòn lơgar dê. Bol añ kung neh yal mblàng, lam sồr làng bol mờ kung neh ai mŭt tàm kơrnoăt pal là jơh ală cau tàm ƀòn do mùl màl lơh broă lòt nhơl, geh dờp bơta kwơ bơh broă lòt nhơl mờ lam sồr làng bol ờ tăc ù”.

Tus tŭ do, làng bol kis tàm ƀòn Vi Rơ Ngheo neh jòi geh, lơh geh uă sơntìl mờ tam geh 1 rơbô gri bơkào địa lan bal mờ phong lan; bơyai lơh ròng, prăp gàr 5 dòr bơkào phong lan mờ tờm bơñàng gùt dar ƀòn. Tềng đăp măt geh 5 hìu tàm ƀòn geh tơl bơta niam git wă tàm broă wă năc lòt nhơl ơm mang tơn. Làng bol tàm ƀòn kung rơcang geh uă bơta phan geh tàm do, bè cing mồng-tamya mờ ală phan sa bơh kòn cau Sơdàng dê nàng drơng cau năc lòt nhơl in sa.

Pa do, Sở Văn hoá – Thể thao mờ Zu lịc càr Dăk Lăk kung neh bơyai lơh yal măt ƀòn Akŏ Dhông, tàm ƀòn dờng Buôn Ma Thuột là Ƀòn lòt nhơl mpồl bơtiàn dê sơl. Do là ƀòn kòn cau Rơđê dê geh lơh pơgăp mờ do 60 nam. Do kung geh sền là ƀòn kòn cau Rơđê pas gơs ngan càr Dăk Lăk dê mờ geh uă hìu jòng ờs mờng, uă tờm chi bal mờ bơkào. Làng bol kis tàm ƀòn do kung gam prăp gàr bơta niam chài cing mồng, phan teh đơs crih kòn cau, ală broă lơh ờs mờng bè tàñ ồi ào, tàñ phan, ƀĕ tơrnờm. uă nam do, tàm ƀòn do geh gơs anih tus nhơl sền bơta niam chài mờ lòt nhơl bơh uă cau năc tàm lơgar bal mờ lơgar bơdìh dê.

Tàm broă tơnguh bơtàu lòt nhơl, ƀòn Akŏ Dhông neh geh UɃÑZ càr Dăk Lăk dong kờl mờr 1 tơmàn đong nàng lơh gơs ală broă lơh bè ƀlàng gàr rơndeh, hìu jă brê mpồl bơtiàn, jơnau lam gùng ù tiah,... lơh gơs Mpồl atbồ lòt nhơl mpồl bơtiàn mờ pờ geh ală ơdŭ bơsram bè lòt nhơl mpồl bơtiàn ai làng bol tàm ƀòn in. Tus tŭ do, ƀòn Akŏ Dhông neh geh tơl ală bơta bè phan bơna bal mờ bơta pràn nàng drơng cau năc tàm lơgar mờ lơgar bơdìh in.

Mò Nguyễn Thuỵ Phương Hiếu, Phó kwang atbồ Sở Văn hoá – Thể thao mờ Zu lịc càr Dăk Lăk pà git, mờ broă geh dờp là ƀòn lòt nhơl mpồl bơtiàn, tàm tơngai tus, càr geh tai kơrnoăt nàng ai geh bơta pràn lơh broă lòt nhơl mpồl bơtiàn tàm ƀòn Akŏ Dhông in, pơgồp bal tàm broă ai geh bơta pa krơi is tàm broă tơnguh bơtàu lòt nhơl tàm ƀòn dê. “Mờ bơta pràn bơh làng bol bal mờ broă dong kờl bơh Dà lơgar dê nàng lơh broă lòt nhơl mpồl bơtiàn. Tŭ do den ală broă bè dong kờl ală ƀòn làng bol kòn cau nàng prăp gàr bơta niam chài den pal geh uă broă lơh ngan, den tàng geh pơn jăt tai geh ală broă sền gròi, ngui ală bơta pràn bơh ală broă lơh ndai nàng pơn jăt tai dong kờl ƀòn in. Lơh bè lơi nàng phan lòt nhơl tàm ƀòn geh lơh gơs ală bơta phan lời kir, phan OCOP, jơh ală bơta gơrềng bal den geh lơh gơs dùl bơta niam pa krơi is tàm broă tơnguh bơtàu lòt nhơl mpồl bơtiàn kơl jăp”.

Tàm nam do, càr Dăk Lăk geh dong kờl 2 ƀòn nàng tơnguh bơtàu lòt nhơl mpồl bơtiàn mờ khà priă uă ngan 1 tơmàn đong tơl ƀòn. Jăt mờ hơ̆, nam do càr dong kờl tơnguh bơtàu lòt nhơl mpồl bơtiàn ƀòn Kuôp, xã Dray Sáp, kơnhoàl Krông Ana mờ ƀuôn Trí, xã Krông Na, kơnhoàl Buôn Đôn tai. Sở Văn hoá – Thể thao mờ Zu lịc càr Dăk Lăk pà git, tŭ do Sở gam pơn jăt tai sền wơl nàng dong kờl 12 broă lơh jăt mờ kơrnoăt geh ai, mờ khà priă dong kờl uă ngan là 1 tơmàn đong tàm 1 ƀòn.