Nam 2023 là nam bơtàu tơnguh gơwèt mờ gah lòt nhơl càr Dăk Lăk, 1 rơbô 160 dơ̆ năc, lơh geh 110,48% pơndrờm mờ broă rơndăp lơh, gơguh 16,06% pơndrờm dùl tŭ bal mờ nam 2022. Lơh jat broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm tơngai bơh nam 2021-2030, Sở Văn hoá, Thể thao mờ Zu lịc gam lơh ngan lơh sir sră nggal dong kờl bơcri priă lơh tiah lòt nhơl pơn rơ ngan tàm tiah làng bol jơi bơtiàn dồ ết nă cau nam 2023-2024 tàm ƀòn Tơng Jŭ, xã Ea Kao, ƀòn dờng Buôn Ma Thuột, mờ ƀòn Jun, thị trấn Liên Sơn, kơnhoàl Lăk. Mò H’Yam Ƀuôn Krông (deh nam 1965), là cau lam lài lam lơh lòt nhơl mpồl bơtiàn tàm ƀòn Tơng Jŭ, xã Ea Kao, ƀòn dờng Buôn Ma Thuột, càr Dăk Lăk, đơs: “Añ chờ hờp ngan tŭ tơlik mat ƀòn lòt nhơl mpồl bơtiàn ƀòn Tơng Jŭ. Càr Dăk Lăk neh geh kơrnoat lơh nền lơh jat rơndăp broă lơh do tàm ƀòn Tơng Jŭ mờ ƀòn Jun tàm kơnhoàl Lăk. Bol añ kơ̆p kơñ ală kấp gơnoar atbồ lơh geh ală bơta ai lòt nhơl mpồl bơtiàn tàm ƀòn Tơng Jŭ in geh bơtàu tơnguh. Nam pa gờm chờ kwang đơng lam bồ càr, ƀòn dờng mờ ală kấp gơnoar atbồ sùm pràn kơl dang, kis chờ hờp”.

Kơnhoàl Krông Nô, càr Dăk Nông là dùl tàm ală ù tiah geh uă bơta niam pơnrơ. Tàm hơ̆ gơtùi đơs tus bè Ñrùh Dray Sáp, ha là trồm rơgồng bơnơm ồs tàm Kông viên địa cất gùt plai ù. Ồng Y Suơ Hlong, kis tàm ƀòn Dru, thị trấn Dăk Mâm, kơnhoàl Krông Nô pà git, làng bol kòn cau Mnông pơnyờ să ngan bè ù tiah geh uă bơta niam pơgồp bal mờ uă bơta kwơ niam chài ờs mờng. geh uă bơta kwơ do gam rơhời geh lơh, ngui nàng bơtàu tơnguh lơh sa mpồl bơtiàn, dong kờl làng bol ngai sơlơ gơguh tàm rài kis. Ồng Y Suơ Hlong đơs: “Añ chờ ngan tŭ gŏ ală tiah niam bè ñrùh Dray Sáp, trồm rơgồng bơnơm ồs geh lơh broă, ai ngui bal mờ bơta niam chài ờs mờng kòn cau Mnông dê nàng bơtàu tơnguh lơh sa mpồl bơtiàn. Geh uă làng bol kòn cau Mnông kung neh tus bal mờ ală broă lơh drơng ala lòt nhơl, rài kis neh gơguh. Añ kung kơ̆p kờñ là lơh geh cồng nha rơlao tai ală ù tiah niam bal mờ bơta niam chài ờs mờng nàng drơng bơtàu tơnguh lơh sa mpồl bơtiàn”.

Mờ ù tiah hàng niam, trồ tiah niam ngan mờ krơi is, tàm ală ngai sa tềp Dà lơgar Giáp Thìn 2024 Tiah lòt nhơl ƀòn brê bơnơm Dà lơgar Măng Đen, gơwèt kơnhoàl Kon Plông, càr Kon Tum wă rò mpồl năc uă ngan lòt nhơl tus sền, sền gĭt. Bi A Blép, hìu ơm tàm ƀòn Đăk Y Pai, xã Măng Bút pà gĭt, bi pơn yờ să ngan bè ƀòn lơgar he dê. Tàm ală ngai sa tềp tơn, nàng geh tai phan bơna drơng năc lòt nhơl in, gơnoar atbồ, gah lơh broă Niam chài kơnhoàl Kon Plông, càr Kon Tum neh hòi jà uă tai mpồl cau chài tus bal ràng tơlik dròng cing jañ mồng- tam ya xoang; yal tơngĭt bơta niam chài phan sa, bơhiàn bơh yau niam chài bơh kòn cau Sơdàng dê... Tus bal ală broă lơh do làng bol tàm tiah do dê geh tai priă jền. Bi A Blép chờ hờp, pà gĭt: “Tàm Tiah lòt nhơl ƀòn brê bơnơm Dà lơgar Măng Đen do añ geh kòn tus bal tàm mpồl cau chài dròng cing mồng- tam ya xoang. Tơngai pa do khi neh pơlam tàp nàng ràng tơlik dơ̆ wă rò nam pa. Broă tus bal tàm mpồl cau chài dròng cing mồng- tam ya xoang dùl bơnah là nàng prap gàr bơta niam chài bơh yau, dùl bơnah là lơh geh tai priă jền ai hìu bơnhă in, mơkung lơh geh nùs nhơm chờ hờp chờ hờn ai năc lòt nhơl kung bè là làng bol tàm thôn, ƀòn in. Nam pa, añ gờm chờ ală hìu bơnhă geh uă pràn kơl să jan, kis chờ hờp, làng bol lơh sa bơtàu tơnguh, lơh sa bơtàu tơnguh rlau mờ nam yau tai. Añ kung kơ̆p kờñ oh kòn kòn sau bơh he dê tus bal tàm mpồl cau chài dròng cing jañ mồng- tam ya xoang ngai sơlơ jak ngan, nàng dơ̆ ràng tơlik ngai sơlơ lơh geh cồng nha uă rlau tai”.         

Tơnơ̆ mờ ală ngai ơm rơlô Satềp nam pa, bơh ngai 3 Satềp, kông ty lòt nhơl Siam Tour tàm ƀòn dờng Buôn Ma Thuột, càr Dăk Lăk sơn đờm lơh broă wă rò cau năc lòt nhơl nam pa mờ bơyai lơh ală broă lơh đơs crih tamya, lòt nhơl sền bơta niam chài tàm nam pa. Bi Y Thiên Adrơng, Kwang atbồ kông ty pà git: nàng rơcang ai broă lơh sơn đờm tàm nam pa, mpồl cau lơh broă bal mờ cau lơh broă bal bơh kông ty dê neh bơsram tàp bơh lài satềp. Mờ dùl broă lơh krơi is ngan geh bal đơs crih tamya, teh uh phan đơs crih, lơh pơgăp bè jơnau yal yau,… bơdìh ală tơngu me drơng cau năc mpồl in, kông ty kung wèt tus ală cau năc ờ gal ha là mpồl cau năc hìu nhă nàng lơh geh uă broă drơng cau năc in di tàm Satềp. Bi Y Thiên kơ̆p kờñ, ală broă lơh do geh là sơn đờm chờ hờp ngan nàng geh ală broă lơh pràn niam tàm nam pa Giáp Thìn do. Bi Y Thiên đơs: “Kơ̆p kờñ ală oh mi tam klăc bal, lơh jăt uă broă rơndăp lơh bè bơtàu tơnguh dơ̆ lòt nhơl, bè prăp gàr ală bơta kwơ niam chài ờs mờng nàng ngai sơlơ bơtàu tơnguh dờng pràn, geh uă cau git tus, nàng tơnơ̆ do tŭ cau năc lòt nhơl tus mờ Buôn Ma Thuột ndrờm git tus bơta niam chài, đơs crih tamya, jơnau đơs pơn đik, jơnau yal yau Tây Nguyên dê”.