Tàm ală ngai do, ồng Phùng Văn Tĩnh, kis tàm thôn Phúc Thọ 2, xã Tân Hà, kơnhoàl Lâm Hà neh tuh dà dơ̆ 3 ai suơn kơphe in. Suơn kơphe hìu nhă ồng geh lơh tàm bă dòr ñhoa, mơya kung gam geh tơl dà tuh tài neh prăp dà bơh lài tàm 2 nơm tơnao dềt geh lơh tàm suơn tơn. Ồng Phùng Văn Tĩnh pà git: “Dà tuh bol añ dê tàm do geh 2 gah. Dùl là bơh dà dờng, drà croh neh geh bơ̆t prăp lài, gam dà dơ̆ bàr là tàm dòr do bol añ tờ tơnao mờ ƀồm nàng prăp dà drơng tàm broă tuh phan tam hìu nhă in”.

Kung ndrờm bè hơ̆ sơl, uă tiah tam kơphe uă càr Lâm Đồng dê kung gam rơcang geh tơl dà tuh sơl, bŭ lah neh mŭt tàm tơngai trồ prang dờng ngan bơh kàl prang dê. Bơdìh mờ khà dà geh prăp bơh ală tơnao dơng dà, dà dờng, dà croh tàm càr, bơh dà geh prăp bơh ală tơnao dềt do neh pơgồp bal uă ngan tàm broă sơndră mờ trồ prang ai phan tam tàm tiah do in. 8 nam lài, càr Lâm Đồng neh sơn đờm lơh jăt Rơndăp broă dong kờl bơtàu tơnguh broă lơh tơnao dà dềt drơng tàm broă lơh ƀòn lơgar pa. Jăt mờ hơ̆, tơl tơnao dà dềt geh bă ù lơh bơh 500 thơ̆k vuông, khà dà geh 1 rơbô 500 khối geh làng bol lơh geh càr dong kờl 50% khà priă. Tus tŭ do rơndăp broă lơh do neh lơh geh rơlao 3 rơbô nơm tơnao dà, di pal mờ broă kờñ tuh dà ai 12 rơbô lồ ù tam phan in. tơnguh khà bă ù lơh sa suơn sre geh tơl dà tuh tàm càr do tus 62 rơbô lồ.

Tềng đăp mờ bơta kal ke bơh kàl prang, bal mờ broă mblàng yal, lam làng bol tuh dà tềm pềr, di pal, càr Lâm Đồng kung gam lơh pràn broă atbồ mờ lơh rơlao 440 broă lơh bơtơ̆t rơbòng dà bè lơi nàng geh cồng nha. Jăt ồng Nguyễn Danh Dụng, lơh broă tàm Anih atbồ lơh bơtơ̆t rơbòng dà kơnhoàl Đức Trọng yal, broă tam pà dà tàm ală rơbòng sre gam geh sền gròi mờ pơgồp bal nền nòn đah ală anih lơh broă gơrềng bal. Ồng Nguyễn Danh Dụng pà git: “Broă atbồ kung bè drơng tuh dà tàm kơnhoàl den Anih lơh broă do sùm lơh broă mờ gơnoar atbồ tàm ală xã, lam sồr ală mpồl lơh broă ngui dà lơh sa suơn sre xã atbồ niam ală gơl rơbòng dà tàm ƀlàng sre, ai dà tus nàng làng bol in lơh sa niam ngan, tềm pềr ngan, geh cồng nha ngan”.

Gam tàm càr Gia Lai, tài trồ tơngai duh jŏ ngai, trồ tiah prang ờ tơl dà, lơh gơtìp tus mờ bơta ồs sa tào gơtìp tàm uă tiah. Pa do, tàm xã Kông Lơng Khương, kơnhoàl Kbang neh gơtìp dơ̆ ồs sa lơh rơlao 40 lồ tào gơtìp ồs sa jơh. Gơnoar atbồ tàm do bal mờ ală mpồl lơh broă gơrềng bal gam tơrgùm cau lơh broă, măi mok nàng lơh gơs broă sreh tơnhào tào làng bol in. Dơ̆ ồs sa tào neh lơh hoàc huơr tus mờ bă ù tam tào gam tàm tơngai sreh tơnhào bơh 24 hìu làng bol kis tàm ƀòn Dơng, Mơ Hven-Ôr mờ Hbang gơwèt xã Kông Lơng Khương, kơnhoàl Kbang dê. Dơ̆ ồs sa gơtìp tàm tŭ cà khồm pràn, lơh ồs sa rề mhar mờ ờ jai sền gròi. Ồng Cáp Văn Trung, kis tàm xã Tân An, kơnhoàl Đăk Pơ là hìu ơpah ù tam tào tàm ƀòn Dơng, xã Kông Lơng Khương pà git: Ồs sa tào lơh làng bol lơh broă sa gơtìp gơmù priă geh bơh 10% tus 15% pơn drờm mờ uă ù tam tào ờ gơtìp ồs sa. Ồng Cáp Văn Trung pà git: “Hìu añ geh 20 lồ tào gơtìp ồs sa, hìu măi sơdàng dong kờl măi mok tus sreh tơnhào kung mhar. Añ kung kơ̆p kờñ đah hìu măi ai tơl bơta niam bè priă blơi tào di pal nàng làng bol in bañ gơtìp hoàc huơr uă”.

Ồng Mã Văn Tình, Kwang atbồ cơl dŭ lơh broă sa suơn sre mờ bơtàu tơnguh ƀòn lơgar kơnhoàl Kbang, càr Gia Lai pà git, kơnhoàl Kbang là dùl tàm ală tiah tam tào uă ngan càr Gia Lai dê mờ uă ù tam nam 2023-2024 mờr 10 rơbô lồ. Bơh bồ kàl sreh tơnhào tào, kàl lơh sa do tàm kơnhoàl neh gơtìp kờp jơh 5 dơ̆ ồs sa tào mờ kờp jơh bă ù gơtìp hoàc huơr là 45 lồ 7 sào. Ồng Mã Văn Tình pà git tai: “Kơnhoàl neh rơcang pơgồp bal mờ Hìu măi sơdàng mờ đơng lam UɃÑZ xã bal mờ ală gah lơh broă tờm lơh ndrờm bal ală broă dong kờl làng bol in nàng tơmù hoàc huơr”.

Hìu măi sơdàng An Khê neh ai phan lơh broă, rơndeh, cau lơh broă nàng sreh lài jơh bă ù tam tào neh gơtìp ồs sa. Ồng Nguyễn Hoàng Phước, Phó Kwang atbồ Hìu măi sơdàng An Khê pà git: “Lài ngan dong kờl làng bol sreh tơnhào mhar, hòi jà geh 200 nă mờ 3 nơm măi sreh tơnhào, blơi tào den blơi mờ khà priă tào ris bè ờs. Bă ù tam tào ờtìp ồs sa kung uă, lơh hoàc huơr uă ngan tus mờ broă rơndăp lơh blơi tơnhào dê. Kơ̆p kờñ ngan đah gơnoar atbồ xã bal mờ làng bol tàm tơngai tus, tàm hơ̆ uă ngan là tàm tơngai trồ prang pal jơh nùs sền ngăc, geh ală broă lơh nàng rơcang kơrian lài bơta di gơlan lơh gơtìp ồs sa tào”.