VOV4.K’ho- Ngai do (01/6), là Ngai dunia kơnòm dềt. Bal mờ gùt lơgar, tàm tiah Tây Nguyên di dơ̆ do kung geh uă broă lơh ngan ngồn gơ wèt tus mờ kơnòm dềt. Nhai 6 kung là “Nhai lơh broă tài kơnòm dềt”, gah lơh broă geh gơnoar mờ ală mpồl cau neh sền gròi tus ală broă lơh nhơl ñŏ, lơh prài bồ tơngoh nàng ală sau in geh dùl kàl rlô bơkang chờ hờp, ờdo ờdă.  

Nam bơsram mờr jơh, ală Anih tờm, Hìu niam chài tàm càr Kon Tum neh lam lơh broă rơndap lơh broă lơh kàl rlô bơkang nam 2022 mờ sơn đờm dờp ơruh pơnu, kơnòm pa tàu, kơnòm dềt tàm ală ơdŭ bơsram bơta chài bè: võ thuật, re dà, sềr rùp, dà Mỹ... 

Ơdŭ bơto bơta chài lơh broă Đội tàm càr Kon Tum

Bơdìh mờ ală ơdŭ bơsram bơta chài geh pờ tàm ală Anih tờm, Hìu niam chài bơh ală mpồl atbồ, ală ơruh pơnu, kơnòm pa tàu, kơnòm dềt gam geh uă bơta sac rơ wah ndai bơh broă tus bal tàm ală mpồl kờñ gơboh bơh cau dùl nă să lam lơh. Bi Nguyễn Thị Tuyết Mai, Kwang atbồ Cơldŭ Bơto bơtê, Bơto pơlam Đoàn - Hội- Đội mờ bơta chài bơsram broă lơh, Anih tờm Niam chài Tàp pràn să jan Ơruh pơnu kơnòm pa tài kơnòm dềt càr Kon Tum pà git, mpồl neh rơcang lài ai jơnau digơlan khà ală ơruh pơnu, kơnòm pa tàu, kơnòm dềt tus bal ală ơdŭ bơsram bơta chài tàm kàl rlô bơkang nam do gơguh uă nisơna: “Bơdìh mờ cau pơgru bơh Anih tờm dê den tŭ do bol hi geh jà ală cau lơh broă bal, ală pơgru geh bơto bơtê geh ƀằng kâp, geh bơta chài ờs mờng bè tàp pràn să jan nàng pờ ală ơdŭ bơsram bơta chài, bơta jak lơh broă Đội. Bè phan bơna den Mpồl Kwang atbồ anih tờm kung sền gròi ngan, blơi phan ngui kung bè phan bơsram, bơto bơtê ală oh in, lơh gơlik ală oh in dùl broă lơh geh cồng nha, geh bơta niam”.

Pa do, Sở Văn hóa, Thể thao mờ Zu lịc càr Kon Tum bơyai lơh Pơrlòng “Kơnòm dềt mblàng jơnau yal tơnggit sră”, gơ hòi gơ jà mờr 80 nă kơnòm bơsram tus bơh ală hìu bơsram mầm non, kâp 1 mờ kâp 2 tus bal. Ală oh dềt neh ai tơnggŏ bơta chài mblàng jơnau, yal tơnggit sră bơh he dê bơh rlau 40 jơnau yal niam ngan. Pơn rơ ngan là ală jơnau yal yau, krơh cau niam broă niam, jơnau yal bè mè mờ Bác Hồ kờñ gơboh. Oh Nguyễn Lê Thảo Ngọc, kơnòm bơsram odŭ 5A, hìu bơsram kâp 1 sồ 1, thị trấn Plei Kần, kơnhoàl Ngọc Hồi pà git: “Oh pa yal jơnau yal là mè khin cha jak chài Nguyễn Thị Thứ. Oh kờñ pơyua jơnau đơs tus tơl nă cau là he gam kis tàm dùl dunia ring lơngai. Jơnau yal do tơngkah bol he kis bè lơi gơ in dipal mờ bơta phi să bơh rơnàng bèp ồng lài do dê. Oh neh geh tŭ tus bal Pơrlòng do mờ oh gŏ do là dùl anih nhơl niam ngan. Ờ mìng bè hơ̆ mờ gam cèng wơl uă jơnau gơtha niam mờ geh kuơ rài kis dong bol oh geh tài uă bơta pơn jờng nàng bơsram sră”.

Ai tàm càr Dăk Lăk, Tỉñ đoàn neh bơyai lơh Broă lơh jờng rơ kơnòm dềt lơh jat niam “5 jơnau Bác Hồ bơto sồr”. Tơngai lài, ală broă lơh, srơh bơh kơnòm dềt càr Dăk Lăk dê tă pơgồp tàm suơn bơkàu rbô broă niam nàng bal mờ gơp bơt bơtàu ƀòn tờm pas sơm, niam bơnĕ.

Dăk Lăk wèt tus broă lơh kàl rlô bơkang tus ală kơnòm bơsram tiah kal ke

Pơn rơ là broă lơh, srơh tàm pơrlòng lơh jat niam 5 jơnau Bác Hồ bơto sồr; tam klac bal dong bơyô lòt tus hìu bơsram bal mờ gơp wèt tus rơnàng tơnơ̆ do, ală srơh Trần Quốc Toản, guàng tê bơyô... mờ ală broă lơh kis git jơnau git adat, hùc dà kah tô dà. Bơh ală srơh neh geh ală krơh kơnòm dềt pơn rơ jak mờ jak ngan. Oh Dương Thị Ngọc Anh, kơnòm bơsram ơdŭ 9, hìu bơsram kâp 3 kòn cau ơm wơl tơn kơnhoàl M’Drăk yal: “Oh chờ hờp ngan. Oh kung git tai uă bơyô lơh ngan bè oh mờ uă krơh niam ndai jat 5 jơnau Bác Hồ bơto sồr dê tai. Mờr tus den oh geh pơn jat tai tus bal ală broă lơh, srơh bơh ìu bơsram, ơdŭ bơsram, kơnhoàl dê lam lơh dilah geh mờ oh geh pơn jờng ală bơyô ndai kung lơh ngan bè oh”.

Sền gròi tus bơta niam nhơl ñŏ bơh kơnòm dềt dê tàm ƀòn lơgar tàm kàl rlô bơkang, Tỉñ đoàn Dăk Lăk neh bơyai lơh bơto pơlam bơta chài, mờng chài lơh broă ai kwang bàng đoàn, mpồl tàm thôn, ƀòn, tổ zân phố tàm càr. Hơ̆ là ală bơta chài bè: driau pơn jờng tàm ală dơ̆ pơrjum mpồl bal; mblàng yal bè broă lơh đoàn, mpồl bơh ală pang mạng xã hội; đơs tềng đap uă cau mờ ală bơta chài pal geh bơh Ƀí thư Ci đoàn dê in. Bi Vũ Lê Thanh Ngân, Ci đoàn 5, sơnah ƀòn Tân An, ƀòn dờng Buôn Ma Thuột yal: “Tus ndo geh lam lơh nhơl ñŏ kàl rlô bơkang ai kơnòm dềt in tàm ƀòn lơgar den añ geh ngui uă ngan bơta chài mờ añ neh bơsram. Pơn yơu mờ bơta chài lơh broă mpồl, bơta chài driau pơn jờng mờ pal lơh bè lơi nàng gơtùi tơrgùm bơta gơ hòi gơ jà tus ală ơruh pơnu, añ gơtùi bơsram bơh ală kwang bàng Đoàn xã, sơnah ƀòn ndai nàng ai mờng chài ai să tờm he in, lơh bè lơi nàng gơtùi lam lơh dùl broă lơh nhơl ñŏ geh cồng nha”.

Bi Trần Doãn Tới, Phó Ƀí thư Tỉñ đoàn, Củ tịch Hội đồng Đội càr pà git, ală kâp ƀộ đoàn pơgồp bal jơh nùs mờ ală gah broă lơh, ală hìu bơsram tàm tŭ dờp kơnòm bơsram rê nhơl ñŏ kàl rlô bơkang tàm ƀòn lơgar, tơnguh cồng nha atbồ, lơh gơlik anih nhơl ai kơnòm dềt in, tơrmù tus khà lơyah ngan rlau jơh ală bơta aniai ală oh in tàm kàl rlô bơkang: “Lài ngan là bơto bơtê bè bơta chài ai mpồl kwang bàng đội kâp xã in. Dơ̆ 2 là sơlơ tơnguh broă lơh pơgồp bal đah Hội đồng đội xã mờ Hội đồng đội bơh ală liên đội tàm ƀòn lơgar. Dơ̆ 3 là tơnguh bơta chài lơh broă pơgồp bal mờ ală mpồl, gah broă lơh, anih lơh broă geh gơnoar tàm broă git loh bè khà kơnòm dềt mờ git bè broă lơh jat Adat kơnòm dềt nam 2017”.

Bal mờ hơ̆, Tỉñ đoàn Dăk Lăk gam pơn jat tai hòi jà mpồl bơtiàn tă pơgồp nàng bơt bơtàu ală anih nhơl kơnòm dềt in, pờ ală sàl rlô bơkang kơnòm dềt in. Pờ ală ơdŭ bơsram sră kàl rlô bơkang wèt tus ală kơnòm dềt tàm ală tiah kal ke, tiah sar lơgar ngài nàng sơlơ bơto bơtê jơnau git wă ai ală oh in tơnơ̆ tŭ tơngai jŏ jòng pal bơsram pờ tơlik tàm internet.

Cau mblàng K’Duẩn