Lơh jăt bơhiàn tam klăc bal, mờ nùs nhơm dong kờl bal, tam pà bal, Tỉñ ủy càr Dăk Nông lam lơh dơ̆ tă pơgồp dong kờl làng bol gơtìp bơh mìu càl rơbut dờng sồ 03 lơh aniai. tơnơ̆ mờ dơ̆ pơrjum lam sồr, Anih duh broă Mặt trận Dà lơgar Việt Nam càr Dăk Nông neh dan cih măt dong kờl 1 tơmàn đong.

Tỉñ ủy càr Dăk Nông hòi jà ală làng bol tàm càr tus bal pơgồp bơta pràn, cau geh ờ uă tă ờ uă, cau geh uă tă uă nàng dong kờl làng bol ală càr gơtìp bơh mìu càl rơbŭt dờng sồ 03 lơh aniai sơrlèt mờ kal ke, bơsong bơta hoàc huơr tơnơ̆ mờ mìu càl dờng dà tih dà cò. Tỉñ ủy càr Dăk Nông jào Anih duh broă Mặt trận Dà lơgar Việt Nam càr in lơh anih dờp priă tă pơgồp bal, dong kờl bal làng bol gơtìp aniai, gàr niam di tŭ, geh cồng nha. Ồng Trần Minh Quân, Phó Củ tịc Anih duh broă Mặt trận Dà lơgar Việt Nam càr Dăk Nông pà git, tềng đăp măt dan cih măt dong kờl 1 tơmàn đong. Ồng Trần Minh Quân pà git: “Bŭ lah là càr gam kal ke, mơya lơh jăt bơhiàn bơh jơi bơtiàn dê tam klăc bal, dong kờl bal, geh jơnau sồr bơh Duh broă sùm Tỉñ ủy den Anih duh broă Mặt trận Dà lơgar càr hòi jà, lam sồr ală làng bol kis tàm càr. Ală cau geh tơl den tă uă rơlao, ală cau ờ geh tơl rơlao den tă dùl bơnah lơi, tềm pềr bơnah lơi nàng dong kờl làng bol đah Tô Dà lơgar gơtìp bơh trồ tiah, mìu càl rơbŭt dờng lơh aniai”.

Ală broă lơh hòi jà geh broă sền gròi bơh gal làng bol kis tàm ƀòn dờng Buôn Ma Thuột, càr Dăk Lăk dê, hơ̆ là bơyai lơh ai ală “rơndeh lòt 0 đong” nàng pơn diang phan ngui phan sa dong kờl làng bol tàm tiah gơtìp dà tih dà cò hờ đah Tô Dà lơgar. Bi Bùi Xuân Phong, cau tờm hìu rơndeh Phong Thương, lòt gơl gùng Thái Bình – Buôn Ma Thuột pà git, ală “dơ̆ rơndeh lòt 0 đong” nàng dong kờl pơn diang jơh phan ngui phan sa geh tă pơgồp nàng cèng tus ală càr Thái Nguyên, Lào Cai, Yên Bái… nàng dong kờl làng bol.

Bi Bùi Xuân Phong pà git: “Geh uă ngan rơndeh gam kơ̆p hờ bơdìh, mờ nùs nhơm bal là 15 jơ mho ngai 14 nhai 09 den mpồl rơndeh geh rơ̆p lòt bơh do tus tàm ală càr Đah tô. Tàm do jăt nùs nhơm là rơndeh lơi bềng phan den ai lòt mơ. Chờ ngan tài mìng bơh 8 jơ mang òr bol añ tơlik broă lơh do, mơya tus drim do den làng bol tàm càr Dăk Lăk tus dong kờl uă ngan. Tềng đăp măt là ưn ngài jơh ală cau geh nùs nhơm niam”.

Geh gal làng bol tus cèng phan dong kờl, bơh ală kơnòm bơsram, ală mlŏ, wa sền gàr, cau lơh broă, cau ling mờ geh bal cau kra dờng sơnam. Mò Trần Thị Cảnh 81 sơnam, kis tàm ƀòn dờng Bà Rịa, càr Bà Rịa – Vũng Tàu pà git: mò gam tàm càr Dăk Lăk nàng còp kòn ùr. Tŭ git jơnau yal geh broă lơh do den neh sồr oh kòn pơn diang lòt blơi ƀung mi nàng dong kờl làng bol tàm tiah dà tih dà cò lơh aniai. Mò Trần Thị Cảnh pà git: “Moăt ngan, ờ git lơh bè lơi, añ neh kra bloh. Gŏ tàm internet mpồl bơtiàn geh tơlik broă lơh do den tàng añ kung tus bal lơh mơ, tă pơgồp ờ uă phan nàng tam pà bal mờ làng bol”.

Broă lơh nùs nhơm dong kờl is nàng dong kờl làng bol tàm tiah dà tih dà cò Đah tô geh bơyai lơh ờ git kờp ngai mang. Lơh ngan tŭ trồ mang, mpồl cau kung gam pơn jăt tai tus tềng ƀlàng dờng ngai 10 nhai 03, ƀòn dờng Buôn Ma Thuột, càr Dăk Lăk nàng pơgồp bal ală thùng ƀung mi, dà hùc, piang ro, phe, ào, mpha, ào pơr đồng, dà toh nàng pơn diang tus ală “dơ̆ rơndeh 0 đong” nàng pơyoa tus dong kờl làng bol đah tô dà lơgar gam gơtìp hoàc huơr uă ngan bơh mìu càl rơbŭt dờng Yagi. Bal mờ bơklao mờ kòn dềt pơn diang thùng ào mpha tus tềng tiah tơrgùm phan, lŏ Lê Thị Bảo Hiên, kis tàm sơnah ƀòn Tân Lợi, ƀòn dờng Buôn Ma Thuột pà git: “Añ gŏ làng bol kis tàm ƀòn dờng Buôn Ma Thuột tơlik gŏ, drim do lòt lơh broă hơ̆ sồng git jơnau yal do den tàng lòt lơh broă rê là trồ mang lơh ngan tơrgùm ào mpha wơl. Ndul jơgloh ờ hềt sào tơn. Añ kờñ pơyoa nùs nhơm bơh cau kòn Buôn Ma Thuột dê tus mờ làng bol kis tàm tiah Đah tô in. Kơ̆p kờñ làng bol geh lơngăp lơngai, pràn kơl dang”.

Mờ gùng dà broă lơh “cau geh broă lơh tă broă lơh, cau geh phan tă phan”, broă pơn diang phan tàm rơndeh pơn diang dờng nàng di tŭ cèng tus hờ đah tô geh lơh niam bơnĕ ngan. Jùt dà kơlhề ndang, hùc dà ndang, bi Nguyễn Văn Cơ kis tàm sơnah ƀòn Tân Lợi, ƀòn dờng Buôn Ma Thuột yal: “Añ geh sền tàm facebook gŏ jơnau yal hòi jà klao pơnu tus pơrdŭ phan, neh lòt tus tàm do den añ dong kờl tơn bal mờ ală cau in. Kung neh 03 jơ bloh, ală oh mi do dăp lài neh geh 2, 3 rơndeh bloh. Gŏ moăt ngan, sơđàc ngan cau kis tàm tiah đah tô, añ dong kờl geh phan lơi den dong kờl, lơh gơtùi broă lơi den lơh”.

Mìng tàm dùl ngai mang, làng bol càr Dăk Lăk neh tă geh 05 rơndeh pơn diang phan, tơl nơm rơndeh mờr 20 tấn phan ngui sa nàng jun tus làng bol tàm ală càr đah Tô gam gơtìp gơrềng uă ngan tài bơh dà tih dà cò lơh aniai.