Rê wơl anih ơm tiă gan dà dờng Srêpôk, tiah he mờ cau ling bal neh geh tŭ đềt mềr jơh gùt tŭ tơngai lơh kơnòl broă pờ gùng, Đại tá Lê Xuân Bá, lài do là Kwang atbồ Trung đoàn 4 ling lơh gùng, Sư đoàn 470, Ƀinh đoàn 12 ờ gơtùi pồn bơta ngoh rơngac. Chu ñàng kah kơlôi ală cau ling bal neh chơt phi să, ồng Bá sơñio tê hờ anih ơm tiă gan dà dờng, yal: tàm bồ kàl prang nam 1973, mpồl ling ồng dê geh jàu kơnòl broă lơh rbàng gùng bơh gùng 19 mut tàm tiah đah jum Tây Nguyên, gàr niam gùng lòt Buôn Ma Thuột. Tàm anih do, ồng mờ cau ling bal lơh dùl gùng trồm ai rơndeh sơtăng mờ dùl nơm rbàng pơr đồng ai oto, ling pơndiang phàu dờng, ling ù gờl tiă gan dà dờng Srêpôk in. Tàm bơta tam lơh cui rơcai, broă pờ gùng pal gàr bơta ndơp ndơr mờ pal lơh jat jơnau sồr “Lòt ờ lời tềl, trŭ gơm ờ geh nhŭ, đơs ờ geh sap ntas”: “Rơndeh sơtăng, rơndeh sơ zap là geh dùl gùng is. Dùl gùng là lơh dùl nơm gùng trồ bơh gah đah do hòi là àr đah tô, đah ne hòi là àr đah jum. Ơnàng bơh anih ơm do dê là 6 thơk, jòng tus àr đah ne là 200 thơk. Gơ là dùl kuơ̆ lŭ den tàng ngui rơndeh ƀen ai lŭ tuh, hơ̆ sồng lơh gơ in ring nàng gơ gơs gùng trồm ai rơndeh sơtăng, rơndeh sơ zap in lòt. Tơnơ̆ tŭ lơh gơs den git nđờ rhiang nơm rơndeh sơtăng, rơndeh sơ zap lòt gan gùng trồm do”.

Jat jơnau ồng Bá dê yal, rbàng pơr đồng geh mat sơnđan là LPP geh pơgồp bal bơh ală plung lòs tàm rơndap kơ̆ mờ gơp, măt rbàng geh lơh mờ dơm chi. Trồm rbàng geh lơh gơs bơh ală pơnai lŭ dờng tàm rơndap ring nàng mòn gơs gùng lòt. Broă lơh geh lơh gơs neh jun ală ƀinh đoàn tờm ngan, rơndeh sơtăng, rơndeh rơndồ ờs mờng rê hờ tiah đah jum mat tơngai lik dà lơgar,t ơnơ̆ do tus bal Dơ̆ tam lơh Hồ Chí Minh nam 1975.

Tàm tŭ lơh gùng trồm, ƀă rbàng tơrbŏ 2 gah dà dờng Srêpôk, bol sò tơm cuh aniai cui rơcai ngan. Mờ nùs nhơm tam lơh khin cha jak chài, kràñ cê jơh nùs sền gàr broă lơh, 57 nă ling bơh Trung đoàn 4 ling lơh gùng mờ Tiểu đoàn ling ù gờl 21 gơ wèt Sư đoàn 470 neh khin cha jak chài chơt phi să tàm tiah anih ơm tiă gan dà dờng. Đại tá Đặng Đình Đường, lài do là kwang atbồ Sư đoàn 470 kah wơl, tàm ală nam nhai hơ̆, nùs nhơm mờ bơta kơ̆p kờñ ngan “kong phi să ai dà lơgar in geh kis” dong tơl nă kwang bàng, cau ling sơrlèt gan tơl kal ke, bòl glar nàng lơh gơs kơnòl broă: “Git bol sò tơm cuh aniai cui rơcai bè hơ̆, mơya bol hi git là pờ gùng, ai rơndeh lòt rê nàng rơndeh mờ cau in mut tàm tiah tam lơh nàng tam lơh mờ bol sò tơm. Bơta kuơmàng là tàm hơ̆, den tàng phi să bè lơi kung ờ gŏ pơlai soh, mìng là gơtùi tơrmù lơyah tus khà lơi gơ dê. Ai jơh ală oh mi, cau ling bal bol hi dê, kờp bal mờ 57 nă ling neh phi să tàm do den khi kung sơnơng bè hơ̆ sơl”.

Kung tàm tiah do sơl, tơnơ̆ ngai đah jum dà lơgar geh tơngklàs, 14 nă kwang bàng, cau ling gơ wèt Kwang àng làng bol geh phàu crong Dăk Lăk (tŭ do là Mpồl ling sền gàr tiah nhàr dà lơgar càr Dăk Lăk) neh chơt phi să khin cha jak chài tàm dơ̆ tam lơh mờ bol Pol Pot nàng sền gàr wil tơl ù tiah ndu gơn rơh bơh dà lơgar dê.

Lòt gan mờr 50 nam, tus tŭ do, tềl lời wơl kah yau gam sùm là jrong dơm chi tồt pơr đồng hơ đang mat ù mờr 20 phơng. Bơh nam 2013, Anih ơm tiă gan dà dờng Srêpôk geh dờp là tiah tềl kah yau kuơmàng. Bơh hơ̆ tus tŭ do, tiah do gơ gơs anih tiơng pơn rơ tàm broă bơto bơtê kah yau ờs mờng kac màng ai cau kơnòm să in. Rềp mờ anih ơm tiă gan dà dờng, hìu tơrñang cih mat ală cau ling khin cha jak chài chơt màng neh geh lơh mờ jàu ai Pôs ling sền gàr tiah nhàr dà lơgar Srêpôk in sền gàr mờ atbồ. Gùng bơh anih ơm tiă gan dà dờng tus gùng dờng 14C kung geh lă mờ cài sàng goh, niam bơnĕ ngan, ƀuơn ai tơl nă cau in tus còp. Nàng lơh gơlik ù tiah niam tàm ƀlàng tiah tềl kah yau, ală kwang bàng, cau ling Pôs ling sền gàr tiah nhàr dà lơgar Srêpôk neh lơh 2 broă lơh ơruh pơnu, tam ală bơta tờm chi sa plai bè pơ nat, kruac,kwêt. Broă tam chi, pơs wàs, lơh niam ƀlàng hìu tơrñang cih mat kung geh ală kwang bàng, cau ling sền gàr tiah nhàr dà lơgar lơh sùm. Thiếu tá Phạm Văn Hiếu, Ƀí thư Đảng ủy, Cíñ trị viên Pôs ling sền gàr tiah nhàr dà lơgar Srêpôk, Mpồl ling sền gàr tiah nhàr dà lơgar càr Dăk Lăk pà git: “Là mpồl atbồ, sền gàr tiah nhàr dà lơgar, tàm hơ̆ geh tiah tềl kah yau kuơmàng do den kwang bàng, cau ling sùm cih kah dà kơl hề bơh ală rbàng bèp ồng dê, ngan là ală cau ling khin cha jak chài, cau ling chơt màng neh chơt phi să neh tam lơh mờ sền gàr gơnoar tờm lơngăp lơngai is jơi bơtiàn. Là rơnàng cau tơnơ̆ mờ rơnàng cau tàm pơ dờn den kwang bàng, cau ling bol hi sùm git wă tơl làm bơta pơn iờ să mờ geh kơnòl, pơn jat tai bơto pơlam nùs nhơm mờ mờng chài, pràn jak lơh broă nàng pơn jat tai jat jơng bèp ồng nàng sền gàr kơ̆ gơnoar tờm lơngăp lơngai tiah nhàr dà lơgar bơh dà lơgar dê tàm bơta pa”.

Tam lơh neh tơn jơh bơh jŏ, mơya ală tềl lời wơl gam prap tàm anih ơm tiă gan dà dờng Srêpôk là ală bơta kuơ kah yau dờng màng ngan, là tềl crih crài ngan bè dơ̆ tam lơh khin cha jak chài bơh làng bol he dê. Hơ̆ là tềl tơngkah tơl nă làng bol bè ală tă pơgồp, phi să khin cha jak chài bơh rơnàng bèp ồng dê neh phi să ai broă lơh tơngklàs jơi bơtiàn, tơrgùm dùl dà lơgar in.