Tàm gùl tơngai ơm rlô bơkang mơya ală ngai do, ƀlàng hìu bơsram kâp dùl Nguyễn Đình Chiểu tàm xã tiah nhàr lơgar Ia Rvê, kơnhoàl Ea Súp, càr Dăk Lăk dê kung gam nggồr nggàc sơl săp ñŏ nhơl tơm bơh bơr chờ hờp chờ hờñ ngan.

               Ală ơdŭ bơto wơl sră kàl rlô bơkang jơh nùs ngan bơh ơruh pơnu lơh broă dong kờl is dê

Tàm ală ơdŭ bơsram, ală oh mi ơruh pơnu lơh broă dong kờl is jơh nùs ngan bơto wơl sră ai ală oh dềt in. Bơto wơl sră ndang mơkung nhơl bal jơnau nhơl, jơnau lòng chờ hờp den tàng ală oh kờñ ngan. Gam ơm kơ̆p rò kòn tus bal ơdŭ bơsram wơl sră kàl rlô bơkang, bi Cầm Thị Nga ơm tàm thôn 4, xã Ia Rvê, kơnhoàl Ea Súp, càr Dăk Lăk yal, hìu geh 2 nă kòn dềt den tàng pah tŭ tus kàl rlô bơkang là hìu bơnhă kơlôi rơcăng ngan tài bơh xã ờ huan ngan geh anih nhơl ai kơnòm dềt in, ngòt ală oh ơm tàm hìu lòt jăt gơ̆p bơyô lòt tus hờ dà dờng, dà croh nhơl ngòt gơtìp bơta gơ aniai. Bơh tŭ geh ală cau lơh broă dong kờl is rê bơto wơl sră kàl rlô bơkang ai ală oh in den bi gŏ gơlơh iang nùs ngan, ngan là tŭ kơno ală kòn đơs là kờñ ngan geh lòt bơsram tàm ơdŭ. Bi Cầm Thị  Nga, đơs: Ơm tàm hìu den kòn ờ gŏ bài kờñ bơsram mơya lòt bè do den oh kờñ bơsram rlau. Ơm tàm hìu sồr bơsram is den ờ gŏ tŭ lơi mờ khai kờñ bơsram ờ. Kòn yal là lòt tus ndo chờ hờp ngan, kờñ ngan ală bi ơruh pơnu lơh broă dong kờl is. Đơs bal là ai ală kòn in lùp bơsram tơnơ̆ hơ̆ khin chài tơm bơh bơr rlau, kung chờ hờp ngan den kung là dong kờl geh kwơ ngan ai ală kòn do in.

                               Jơnau nhơl mờ mblàng yal adat ờdo ờdă gùng lòt ai kơnòm dềt in

Geh lơh bơh gùl nhai 07 pa do, ală ơdŭ bơto wơl sră kàl rlô bơkang tàm hìu bơsram kâp dùl Nguyễn Đình Chiểu là broă lơh tàm Broă lơh Kàl rlô bơkang tơrlir bơh ơruh pơnu kơnhoàl Ea Súp dê tàm tiah nhàr lơgar. Jăt mờ hơ̆, 15 nă cau lơh broă dong kờl is tờm ngan bơh kơnhoàl dê mờ 65 nă cau lơh broă dong kờl is bơh ală thôn, ƀòn dê neh tam pà mpồl lòt còp mờ pơndờm pơnđiang ală oh dềt tus bal bơsram ală ơdŭ cribơyai, tề lam bơto pơlam bơta gĭt wă kàl rlô bơkang. Tus bal dong kờl làng bol pơs wàs lơh sàng goh tiah ơm kis, pès koh kơl jơh ntê chi klăp klê, tam chi, mblàng yal rơcăng sơndră kòp bơtờp. Bi Trang Nguyệt Quế, ơruh pơnu lơh broă dong kờl is tàm xã Ia Rvê pà gĭt, tơnơ̆ tŭ tơngai ờ ru ngan mờ broă bơsram tàm hìu bơsram đại họk, bi lời 2 nhai rlô bơkang nàng tus bal lơh ală broă lơh niam dong kờl is tài mpồl bơtiàn mơkung lơh geh tai bơta chài ai să tờm in mơkung pơgồp bal bơta pràn he dê tus mờ làng bol tàm tiah kal ke. Bi Trang Nguyệt Quế, đơs: Oh gŏ gơlơh chờ hờp ngan, mŭt tàm do den oh gŏ gơlơh là oh geh tă pơgồp dùl êt lơi hơ̆ nàng ai làng bol in sền gŏ bè là khi kung gam geh sền gròi dong kờl. Tài bơh oh gơtùi tă pơgồp geh dùl bơnah dà kơlhề bơta pràn bơh oh dê ai broă là ală bơyô bơsram wơl sră kàl rlô bơkang mờ dong geh làng bol tàm do in. Pơnyơu bè là broă mblàng yal bè kòp sốt xuất huyết ờ mìng tàm ală làng bol mờ oh dềt kung gam geh sền gròi sơl mờ bơta dơ̆ bàr là oh geh tàp ai ală oh dềt in là broă he gơtùi pin dờn ñă ntàu đơs tềng đăp mpồl gal cau.

                        Mblàng yal ai kơnòm dềt in bè sền gàr tiah ơm kis, lơh niam wơl sồ siă đù

Tàm xã Ia Lôp, kơnhoàl Ea Súp, bal mờ mpồl ơruh pơnu lơh broă dong kờl is dùl bă tiah, kàl rlô bơkang nam do gam geh mpồl Kàl rlô bơkang tơlir càr Bình Dương dê tus bal dong kờl. Tàm 10 ngai geh mat tàm xã, ală ơruh pơnu lơh broă dong kờl is bơh càr Bình Dương dê neh lam lơh broă lơh ơruh pơnu “Sòl àng gùng ƀòn” jòng rlau 1 kơi sồ, kham kòp mờ pà sơnơm ờ sa priă ai làng bol in, jàu pà 20 nơm măy jồr dà ai ală hìu bơnhă in; pà phan ngui bơsram ai kơnòm dềt in; bơyai lơh Ngai cau lơh broă dong kờl is kis git jơnau gĭt adat di tơngkah kir sơnrai 75 nam Ngai Cau ling sồt să- Cau ling chơ̆t màng; mblàng yal kơrnoăt boh lam, mblàng yal rơcăng sơndră kòp bơtờp ai làng bol in; khòm tơrgùm sồ siă, pơs wàs lơh sàng goh tiah ơm kis, pès koh jơh ntê chi klăp klê, lơh niam wơl ală gơl gùng, rbòng dà. Ồng Lang Văn Sơn, Phó Ƀí thư Đảng ủy, Củ tịc Hội đồng Ñân zân xã Ia Lốp, đơs: Ală mpồl lơh broă dong kờl is rê tus den kung dong geh uă ngan ai làng bol tàm xã in. Kwơmàng là ală broă lơh mpồl bơtiàn, dong bơyai lơh ală broă lơh bè kham sơm kòp, hơ̆ sồng pà phan, lơh ồs đèng pờ àng, hơ̆ sồng dong kờl ală hìu bơnhă cíñ săc ngai lơh broă. Bàr pe ală broă lơh bơyai lơh ai kơnòm dềt in tàm dơ̆ kàl rlô bơkang là geh kwơ ngan.

Bơh bồ nhai 6 nam do, càr Dăk Lăk neh ai ală mpồl ơruh pơnu lơh broă dong kờl is Kàl rlô bơkang tơlir tus lơh broă tàm jơh 15 kơnhoàl, thị xã mờ ƀòn dờng tàm càr. Tus tŭ do, ală mpồl do neh dong kờl lơh pa mờ lơh niam wơl rlau 73 kơi sồ gùng lòt, lơh 43 gơl gùng drà Àng- tơlir- sàng goh- niam, 14 nơm hìu kờñ gơboh kòn bơnus, 14 anih pơrjum nhơl chờ hờp ai kơnòm dềt in. Kham sac rwah kòp tơnơ̆ tơngai gơbàn kòp Kovid-19 ai gĭt nđờ rbô nă làng bol in, tam gĭt nđờ jơ̆t rbô tờm chi. Bi Nguyễn Phạm Duy Trang, Ƀí thư Đoàn Dà lơgar, Củ tịc Mpồl duh broă đội Dà lơgar đơs: ơruh pơnu Dăk Lăk neh lơh jăt di broă rơndăp lơh bơh Đoàn dà lơgar dê tàm broă lam lơh ală broă lơh, lơh jăt niam ală broă pa tàm broă lơh. Bi Nguyễn Phạm Duy Trang, đơs: Dăk Lăk neh rơcăng lài lơh mờ lam lơh ală broă mờ neh lơh jăt di ală broă rơndăp lơh kung bè là ală jơnau sồr bơh Đoàn Dà lơgar dê. Lài ngan là gơwèt mờ 3 kơnòl broă “Broă tờm- pa- bơtàu tơnguh mhar” tàm jơnau sồr bơh Đoàn Dà lơgar dê. Hơ̆ là kham sac rwah kòp tơnơ̆ tơngai gơbàn kòp Kovid-19 kung bè bơto pơlam huềng nùs ai đoàn viên, ơruh pơnu, kơnòm dềt in. Dơ̆ bàr là broă tơrgùm lơh mờ lơh niam wơl ală hìu jă brê tàm ală hìu bơsram. Dơ̆ pe là broă bơyai lơh ală mpồl ơruh pơnu lơh broă dong kờl is tam gơl sồ den kung neh geh càr lơh geh mờ tŭ do là tơrgùm ngan.

Ală broă lơh, bơnah broă geh kwơ ngan gơ jăt bal mờ bơ̆t bơtàu ƀòn lơgar pa, sền gàr tiah ơm kis, sền gròi ai kơnòm dềt in, gàr ờdo ờdă rài kis mpồl bơtiàn bơh ơruh pơnu càr Dăk Lăk dê tàm broă lơh Ơruh pơnu lơh broă dong kờl is kàl rlô bơkang nam do neh pơgồp bơnah pơndờm pơnđiang, dong kờl làng bol mờ ală oh dềt geh rài kis kal ke, ngan là tàm ală tiah sar lơgar ngài, tiah kal ke. Bơh hơ̆ lời wơl uă tềl lời wơl, pơgồp bơnah lơh gơs rùp să niam bơnĕ rơnàng kơnòm să dê tàm nùs nhơm làng bol tiah do dê.

Cau cih H’Xíu- Cau mblàng Lơ Mu K’Yến