Jat rơndăp ù tiah càr Dăk Lăk tơngai bơh nam 2021- 2030, rơndăp broă tus nam 2050, thị xã Buôn Hồ là tiah drà brê bơnơm kơnhoàl ù tiah, tiah tờm tiah dềt Tây Nguyên dê. Do kung là tiah tờm kă bro kwơ màng bơh gùng kềng lơh sa tàm tơrbŏ bal đah tiah Tây Nguyên, tiah jat kềng gah dà lềng đah Jum tàm gùl lơgar mờ tiah đah Tô mat tơngai lik lơgar Campuchia dê.

Bơh rơndăp ù tiah bal, Ủy ƀan Ñân zân thị xã Buôn Hồ neh lơh rơndăp broă lơh tam gơl rơndăp ù tiah bal thị xã Buôn Hồ tus nam 2045 mờ neh geh Ủy ƀan Ñân zân càr ring bal. Jơnau kờñ wèt tus bơt bơtàu mờ bơtàu tơnguh thị xã Buôn hồ gơs dùl tàm ală anih tờm cíñ trị, lơh sa, niam chài, khoa họk kĩ thuật mờ lòt nhơl tiah đah tô càr Dăk Lăk dê. Rơndăp ù tiah ờ mìng là cơng tàng adat boh lam ai broă lơh rơndap ù tiah, bơcri priă bơt bơtàu, bơtàu tơnguh tiah drà lơm, mờ gam geh gơtha kwơ màng tàm rơndăp broă lơh bơt bơtàu mờ bơtàu tơnguh thị xã; lơh geh bơta gơn kơnờm, tŭ tơngai niam ai thị xã Buôn Hồ in bơtàu tơnguh mờ ngui niam bơta ƀuơn bơta pràn, gơ hòi gơ jà uă ngan rlau jơh priă jền ai bơcri priă bơtàu tơnguh in.