Dơ̆ wă rò geh bơyai lơh yŭ rơyùm tàm Hìu lơh broă Quôk hội ơm tàm bơnơm Capital tàm càr lơgar Canberra bơh lơgar Australia dê, jat bơhiàn kuơmàng lời ai kwang atbồ Cíñ phủ in còp ngan ngồn lơgar Australia. Tàm nùs nhơm ram mhŭ bơta lơh bơyô bal, Thủ tướng ồng Anthony Albanese jà Thủ tướng Phạm Minh Chính guh hơđang kơnă pơn iờ să kung là tŭ 19 ròt dơ̆ cuh phàu kơnong dơ̆ dùl dơ̆ mpong ntas tàm bơnơm Capital. Bồng bi dà lơgar Việt Nam geh dŏ gờm chờ wă rò Thủ tướng Phạm Minh Chính mờ Pơ ùr mờ mpồl kwang bàng kâp dờng lơgar Việt Nam.

Tơnơ̆ dơ̆ wă rò, bàr Thủ tướng bơyai lơh pơrjum. Thủ tướng Australia mờ Thủ tướng ồng Phạm Minh Chính sền dơ̆ jàu ală sră nggal lơh broă bal; mờ kung tìp mat cau lơh ƀău yal bè cồng nha dơ̆ pơrjum, tàm hơ̆ yal lơh Bơta git gơp lơh broă bal jŏ jòng tơl làm đah Việt Nam mờ Australia.

Tàm 2 ngai tus bal Pơrjum Kwang kấp dờng kwơ màng tơngkah kir sơnrai 50 nam bơta gĭt gơ̆p Asean mờ Australia, Thủ tướng Cíñ phủ ồng Phạm Minh Chính neh lời tŭ tơngai nàng tìp mat jơh ală kwang kấp dờng ală lơgar Asean, Australia, New Zealand mờ Tổng thư kĭ Asean.

Tàm ală dơ̆ tìp mat, Thủ tướng Cíñ phủ ưn ngài bơta lơh broă bal, dong kờl bal, tam pà bal mờng chài lơh  broă bơh ală lơgar dê tàm broă bơtàu tơnguh wơl mờ bơtàu tơnguh lơh sa; tơngŏ bơta kơ̆p kờñ sơlơ tơnguh lơh broă bal tàm ală lơgar kwơ màng bơh Asean dê mờ bơta gĭt gơ̆p đah lơgar Việt Nam mờ ală lơgar, ngan là bè cíñ trị- lơh broă mờ lơgar ndai, lơh sa- kă bro- bơcri priă, lơngăp lơngai- sền gàr Dà lơgar, bơto bơtê, khoa họk- kông nghệ...; pơn jat tai lơh broă bal niam nàng bơt bơtàu dùl Asean tam klăc bal, tơrgùm dùl, sơlơ tơnguh lơh broă bal tàm mpồl, lơh jat niam gơnoar broă tờm tàm broă bơsong ală broă lơngap lơngai, rơndăp broă tàm tiah do dê. Di dơ̆ do, Thủ tướng Cíñ phủ neh jà kwang đơng lam bồ kấp dờng ală lơgar ai mpồl kwang bàng ala mat kấp Ƀộ trưởng tus bal dơ̆ cribơyai rài tơnơ̆ do Asean digơlan geh bơyai lơh tàm Hà Nội tàm ngai 23/4/2024.