Pơrjum nàng kờñ lam lơh jat ngan ngồn Nghị quyết sồ 23 bơh Ƀộ Cíñ trị dê bè bơtàu tơnguh tiah Tây Nguyên; tàm hơ̆ tơrgùm tàm 3 tơngume tờm là: Ràng tơlik, yal tơnggit rùp hin, ù tiah niam chài, kòn bơnus mờ yal tơnggit phan lơh gơs bơh suơn sre tiah do dê; Yal broă lơh lơh broă bơh Cíñ phủ dê lơh jat Nghị quyết sồ 23 bơh Ƀộ Cíñ trị dê; hòi jà bơcri priă tiah Tây Nguyên. Tàm pơrjum, ală kwang bàng neh geh uă jơnau đơs cribơyai niam ngan, song dơ pă, geh kơnòl, jơh nùs mờ ai tơlik uă broă lơh dipal, di mờ bơta geh ngan mờ gơtùi lam lơh jat ngan ngồn; bơh hơ̆ ai tơlik bơta lơh ngan, bơta ring bal uă nàng sơlơ chồl pràn bơtàu tơnguh mhar, kơ̆ kơljap ai tiah Tây Nguyên in, pơgồp bơnah ai Nghị quyết sồ 23 bơh Ƀộ Cíñ trị dê mut tàm ngan ngồn rài kis, mpồl bơtiàn.

Tơnơ̆ tŭ iat ală jơnau đơs cribơyai, jơnau đơs tàm pơrjum, Thủ tướng Cíñ phủ ồng Phạm Minh Chính neh mblàng lơh loh bơta pràn, bơta ƀuơn, tŭ niam pơn rơ, bơta pràn tàm pơrlòng mờ ală bơta ờ niam bơh tiah Tây Nguyên dê. Mờ kung đơs loh jơnau kờñ, broă geh jàu tờm ngan tàm broă lơh bơh Cíñ phủ dê, bơh hơ̆ ai tơlik 2, 3 broă jàu mùl màl bè khà gơguh GRDP kờp bal geh bơh 7 tus 7,5%; tus nam 2030, GRDP kờp bal dùl nă cau geh mờr 130 tơlak đông, ndrờm mờ 5 rbô dolar Mỹ. Khà tam gơl gơs tiah drà geh pơgap bơh 37,2 tus 40,7%; khà xã tơl khà ƀòn lơgar pa pơgap 85%.