Tàm dơ̆ wă rò, 2 gah ring bal pơn jat tai sơlơ tơnguh tàm pơgơl mpồl kwang bàng kấp dờng mờ ală kấp, ală ngàñ mờ ală tiah; đơs nền broă tìp mat sùm đah ală kwang đơng lam bồ 2 lơgar dê pơgồp bơnah bơt bơtàu, bơtàu tơnguh nùs nhơm pin dờn cíñ trị mờ bơtàu tơnguh tơl làm lơh broă bal đah 2 gah.

Kwang atbồ lơgar Philippines Marcos Jr. ring bal mờ jơnau sồr bơh Thủ tướng Phạm Minh Chính dê bè broă lơh pràn lơh broă bal tàm ală gah gam uă bơta ƀuơn, bơta pràn, bè: bơto bơtê, khoa họk kông nghệ, lòt nhơl, niam chài, tìp mat lơh kwèng làng bol, lơh broă bal ală tiah. Cribơyai bè ală broă dunia mờ tàm tiah do, 2 nă kwang đơng lam bồ jờng rơ uă ngan broă 2 lơgar sùm pơgồp bal niam tàm ală dơ̆ cribơyai tàm tiah do mờ tàm dunia bè Asean, Liên hợp quôk, APEC, ASEM; đơs sùm broă gàr niam bơta tam klăc bal mờ gơnoar broă tờm bơh Asean dê, dùl nùs bal bơt bơtàu dùl mpồl bơtiàn Asean kơ̆ kơl jăp, pràn kơl dang, tam klăc bal, pràn is.