Tàm pang sră, Thủ tướng cih nền: Satềp Chơl Chnam Thmay là bơta niam chài krơi is ngan bơh làng bol kòn cau Khmer dê, là lơh chờ dờng tàm nam, geh kwơ màng krơi is, sơn đờm nam pa mờ uă nùs nhơm pin dờn, jơnau kơ̆p kờñ, răc dan kờñ geh rài kis hờm ram, gơboh gơbài; kung là dơ̆ tơlik jơh nùs nhơm ròng siam, kah kơlôi tus mờ rơnàng mò pàng lài do.

Di tàm dơ̆ do, ala măt kwang đơng lam Đảng mờ Dà lơgar, Thủ tướng pơyoa tus làng bol, oh mi bal mờ ală cau kơ đơng yàng kòn cau Khmer nùs nhơm đềt mềr, jơnau còp să nền nòn mờ jơnau chờ gờm niam bơnĕ ngan. Mờ rơlao 1 tơlăk 300 rơbô nă cau, làng bol kòn cau Khmer là dùl bơnah ờ gơtùi tam cah is bơh mpồl bơtiàn ală jơi bơtiàn kòn cau lơgar Việt Nam dê, geh gơnoar kwơ màng tàm broă bơ̆t bơtàu mờ sền gàr Dà lơgar. Thủ tướng sồr ală kấp, gah lơh broă, ală tiah rơcang niam ală broă lơh nàng làng bol kòn cau Khmer wă rò Satềp Chol Chnam Thmay nam 2024 tam klăc bal, chờ hờp, niam bơnĕ, lơngăp lơngai, tềm pềr, di pal mờ bơta niam rài kis gơguh jăk, bơhiàn ờs mờng niam bơnĕ bơh kòn cau dê.