VOV4.K’ho- Mho ngai 23/09, Thủ tướng Cíñ phủ ồng Phạm Minh Chính đơng lam pơrjum “Bơtàu tơnguh drà kă bro khoa họk mờ kông nghệ ndrờm bal, geh cồng nha, lơh pa mờ mŭt gơ rờm bal”.

Anih tàm dơ̆ pơrjum

Pơrjum geh bơyai lơh jat broă lơh pơrjum tơn mờ pờ tơlik tơn tàm internet tus 63 càr, ƀòn dờng. Pơrjum nàng kờñ sền sơ wì ală bơta, sền gĭt di ală bơta ờ pràn, bơta gơ kòl, bơta kal ke, bơta lòng, bơh hơ̆ sền gĭt gùng dà broă lơh, ai tơlik kơnòl broă, gùng dà broă lơh nàng bơyai lơh, mŭt lơh niam rlau drà kă bro khoa họk mờ kông nghệ. Đơs tàm pơrjum, Thủ tướng ồng Phạm Minh Chính đơs sùm: bơtàu tơnguh drà kă bro khoa họk mờ kông nghệ pal ai bơta kơlôi sơnơng khoa họk lơh bơnàng jă, cau jak chài là bơta gơn kơ nờm, mpồl lơh sa kă bro là tiah tờm, di pal mờ tŭ tơngai bơh dơ̆ lơh sa mờ măy mok dơ̆ 4 dê mờ broă lơh mŭt gơrờm bal lơh sa tàm dunia, sồr pal geh broă lơh dùl ròt bal, di pal, dơ̆ lĕ bal mờ bơtàu tơnguh drà kă bro phan bơna, drơng broă ala, cau lơh broă mờ priă jền; pơgồp bal drà kă bro tàm lơgar mờ drà kă bro jơh gùt lơgar mờ tàm tiah do, di pal mờ jơnau hơ dunia bơh Việt Nam mờ kơrnoat boh lam dunia dê.

Cau mblàng K’Hạnh