VOV4.K’ho- Ngai 27/01, Thủ tướng Cíñ phủ ồng Phạm Minh Chính, Kwang atbồ Mpồl đơng lam dà lơgar rrơcang sơndră kòp Kovid-19 neh đơng lam pơrjum pờ tơlik tơn tàm internet mờ 63 càr, ƀòn dờng bè broă lơh rơcang sơndră kòp Kovid-19, cribơyai ală kơnòl broă, broă lơh rơcang sơndră kòp Kovid-19, ngan là tàm dơ̆ sa tềp bơhiàn; rơcang pờ mpồng wơl hìu bơsram mờ pờ mpồng nhơl chờ, bơtàu tơnguh wơl lơh sa- mpồl bơtiàn.

Đơs tàm pơrjum, Thủ tướng Phạm Minh Chính pà git, dơ̆ pơrjum nàng kờñ kờp sền, git broă gơlik geh bơh kòp bơtờp dê, ngan là sền sơ wì bè ală broă gơlik geh, pal gròi sền nàng geh broă lơh rơcang lài bơsong di tŭ, ờ gơtìp rơmơp ndơl. Bơh hơ̆ pơgồp bơnah nàng làng bol geh wă rò sa tềp ờdo ờdă, chờ hờp, niam bơnĕ. Kuơmàng, broă lơh jat broă cit sơnơm vaccine jal mhar bồ nam pa nam 2022. Lơh ngan tus jơh nhai 1 nam 2022, cit tơl 2 ding sơnơm vaccine ai kơnòm dềt bơh 12 tus 17 sơnam in, tus jơh quý 1 nam 2022 cit jơh ding dơ̆ 3 ai cau bơh 18 sơnam rlau hơđang in.

Cau mblàng K’Duẩn