VOV4.K’ho- Drim ngai 09/08, Thủ tướng Cín phủ ồng Phạm Minh Chính, Củ tịc Ủy ƀan Dà lơgar bè tam gơl sồ đơng lam pơrjum pờ tơlik tơn tàm internet gùt lơgar sền wơl 6 nhai lam lơh jat Rơndap broă lơh bơtàu tơnguh ngui dữ liệu bè làng bol ơm kis, sồ yal mat mờ lơh nền điện tử drơng broă tam gơl sồ dà lơgar tơngai bơh nam 2022-2025, bơta wèt sền tus nam 2030 (Rơndap broă lơh sồ 06).

Pơrjum tàm anih lơh broă tàm Hà Nội mờ pờ tơlik tàm internet

Pơrjum geh tàm tơrbŏ tàm Hìu lơh broă Cíñ phủ mờ anih tàm tơrbŏ bal ală Ƀộ, ngàñ, càr, ƀòn dờng gơwèt dà lơgar; ală kơnhoàl, thị xã, sơnah ƀòn, xã tàm gùt lơgar; mờ kờp jơh rlau 10 rơbô anih tàm tơrbŏ bal bơh kấp xã tus dà lơgar mờ rlau 130 rơbô 700 nă kwang bàng tus bal.

Pơrjum tàm anih lơh broă tàm Hà Nội mờ pờ tơlik tàm internet

Đơs tàm pơrjum, Thủ tướng Cíñ phủ ồng Phạm Minh Chính đơs sùm, do là dùl rơndap broă lơh geh bơta đơng lam ngan, kràñ cê jơh nùs ngan, kwơ màng ngan, tơrgùm lơh jat Rơndap broă lơh sồ 06, mờ 7 broă lơh nền đơng lam, 5 mpồl kơnòl broă, gùng dà broă lơh mờ tŭ tơngai lam lơh ngan ngồn. Thủ tướng sồr ală kwang bàng cribơyai, mblàng lơh loh, tam pà bal ală bơta mờng chài niam, jơnau bơsram niam, broă lơh bơceh pa bơh mpồl lơh broă, ală tiah he dê; đơs ală gùng dà broă lơh tờm tàm tơngai tus nàng lơh jat rơndap broă lơh do geh cồng nha.

Cau mblàng K’Hạnh