VOV4.K’ho- Mho mang ngai 19/09, tàm Hìu lơh broă Cíñ phủ, Pơrjum pờ tơlik tơn tàm internet bơh Thủ tướng Cíñ phủ mờ ală Kwang atbồ Anih lơh broă ala mat lơgar Việt Nam tàm lơgar ndai bè lơh pràn broă lơh cribơyai broă mờ lơgar ndai lơh sa neh geh bơyai lơh jat broă lơh pơrjum tơn mờ pờ tơlik tơn tàm internet.

Thủ tướng Cíñ phủ đơng lam pơrjum pờ tơlik tơn tàm internet mờ ală Kwang atbồ Anih lơh broă ala mat lơgar Việt Nam tàm lơgar ndai

Do là pơrjum sơnrờp Thủ tướng Cíñ phủ đơng lam tơn bè broă lơh cribơyai broă mờ lơgar ndai lơh sa. Pơrjum geh tơrgùm cribơyai, sền sơ wì tŭ niam mờ bơta lòng tàm bơta bè tŭ do, ngan là ală tŭ niam mờ Việt Nam pal ngui niam, lơh uă ngan rlau jơh là tăc phan mờ lơgar ndai, bơcri priă, nhơl chờ nàng kờñ hòi jà uă ngan rlau jơh tơl bơta pràn drơng broă bơtàu tơnguh wơl mờ bơtàu tơnguh lơh sa- mpồl bơtiàn; bơh hơ̆ geh jơnau đơs ală broă lơh nàng lơh pràn broă lơh cribơyai broă mờ lơgar ndai lơh sa tàm jơh bal tàm lơgar mờ lơgar ndai nàng kờñ sơr lèt gan bơta kal ke tềng đap mat mờ lơh geh bơta bơtàu tơnguh mhar nàng lơh ngan ngồn ală jơnau kờñ bơtàu tơnguh lơh sa- mpồl bơtiàn. Đơs tàm dơ̆ pơrjum, Thủ tướng Cíñ phủ ồng Phạm Minh Chính sồr ală Đại sứ, Kwang đơng lam bồ ală Ƀộ, ngàñ, mpồl lơh sa kă bro, ngui niam bồ tơngoh jak, cribơyai, đơs ală broă lơh lơh pràn di tŭ ală broă lơh cribơyai broă mờ lơgar ndai lơh sa tàm jơh bal tàm lơgar mờ lơgar ndai; geh ală jơnau đơs, jơnau dan bè broă lơh, gùng dà broă lơh, bơta pràn nàng kờñ tơnguh uă cồng nha broă lơh cribơyai broă mờ lơgar ndai lơh sa.

Cau mblàng K’Hạnh