VOV4.K’ho- Mho ngai 19/09, Thủ tướng Cíñ phủ ồng Phạm Minh Chính neh hòi điện thọai cribơyai mờ Thủ tướng Cíñ phủ lơgar Lo ồng Lý Khắc Cường. Bàr nă Thủ tướng đơs nền bơta kwơmàng bơh bơta gĭt gơ̆p đah bàr lơgar Việt Nam mờ Lo dê gơwèt mờ tơl lơgar, jờng rơ ngan ală cồng nha lơh geh tàm bơta gĭt gơ̆p đah 2 lơgar dê tàm tơngai lài. Lơh broă bal kă bro gàr sùm gơguh tai, jơnau gơkòl jŏ jòng tàm ală mpồng nhàr lơgar rơhời geh bơsong.

Bơcri priă bơh lơgar Lo dê tàm Việt Nam pơn jăt tai gơguh. Lơh broă bal rơcăng sơndră mờ kòp bơtờp geh gàr sùm cồng nha. Bè gùng dà lơh broă bal tàm tơngai tus, bàr nă Thủ tướng ring bal sơlơ tìp mat kwang bàng kâp dờng mờ ală kâp, dong kờl ală broă lơh broă bal gơlòt mŭt ngan ngồn tàm uă broă lơh, bơtàu tơnguh song niam, bơnĕ bơnài mờ kơ̆ kơl jăp jŏ jòng; ai tơl bơta ƀươn tìp măt, lơh kwèng, lòt rê bơh làng bol bàr lơgar dê.

Thủ tướng ồng Phạm Minh Chính sồr bàr gah jơh nùs pơgồp bal nàng ai priă lơh geh bơh kă bro đah 2 gah gơguh sùm kơ̆ kơl jăp mờ tàm pơnring bal; sồr lơgar Lo ai tơl bơta ƀươn bè lơh sir niam sră pơ àr ai phan bơna kă bro đah 2 lơgar in, sơlơ blơi phan bơna, ngan là lơh mhar tơngai pờ mpồng drà kă bro ai phan lơh geh bơh sươn sre lơgar Việt Nam dê; lơh wơl jơh ală broă lơh tàm ală yô mpồng nhàr lơgar mờ tơnguh uă pràn jak lơh sir niam sră pơ àr ai phan kă bro đah 2 lơgar in; pơgồp bal lam lơh mờ ngui niam tŭ niam tus bơh ală hiệp địñ kă bro khăt gơboh is uă gah.

Cau mblàng Lơ Mu K’Yến