VOV4.K’ho- Drim ngai 30/08, tàm Hìu pơrjum Thống nhất, ƀòn dờng Hồ Chí Minh, Thủ tướng Cíñ phủ ồng Phạm Minh Chính neh tìp măt jờng rơ ală mpồl jăt yàng geh tă pơgồp tàm broă lơh bơ̆t bơtàu mờ sền gàr Dà lơgar.

Việt Nam là dùl dà lơgar geh uă bơta pin dờn, jăt yàng geh 43 mpồl gơwèt 16 Yàng neh geh Dà lơgar dờp mờ pà sră cơng tàng dan lơh broă; rlau 26 tơlak 500 rbô nă cau jăt yàng, geh tus 27% khà kờp làng bol gùt lơgar. Tàm Pơrjum, uă cau ala măt là cau duh broă yàng neh geh ală jơnau đơs tă pơgồp bềng bơta jơh nùs jơh tồr mờ geh kơnòl, bal mờ nùs nhơm bơ̆t bơtàu nàng kờñ lam lơh jăt ngan ngồn, geh cồng nha rlau gùng dà, broă lơh mờ kơrnoăt bè pin dờn, jăt yàng bơh Đảng, Dà lơgar he dê tàm tơngai tus.

Đơs tàm dơ̆ pơrjum, Thủ tướng ồng Phạm Minh Chính đơs nền, Đảng, Dà lơgar he sùm ờ tŭ lơi tam gơl lơh jăt gùng dà broă lơh sền dờng màng mờ ai niam gơnoar khăt gơboh pin dờn, jăt yàng bơh làng bol dê. Tàm tơngai tus, Thủ tướng sồr: Kwang đơng lam bồ ală mpồl cau jăt yàng pơn jăt tai hòi jà ală cau duh broă yàng, cau dong broă yàng, cau jăt yàng lơh jăt jơnau sồr, gùng dà broă lơh bơh Đảng dê, kơrnoăt boh lam Dà lơgar dê. Lơh jăt sùm gùng dà bơto pơlam lơh broă yàng tam klăc bal, lòt bal mờ jơi bơtiàn. Lơh kơ̆ kơl jăp wơl mpồl tam klăc dờng jơi bơtiàn, tam klăc bal ală yàng.

Cau mblàng Lơ Mu K’Yến